Mi Coadima 30 - U TIENU MAAMA TILI 2013

¹ Musa den togidi Isidayeli yaaba, o Diedo n den teni o yaa ñoamabona kuli.

Yaa bali maama n ye i ñoaniani po

² Musa den maadi leni Isidayeli buoli yudanba, ki yedi: «Diidi o Diedo n teni yaa ñoamabonli nne:

³ Li yaa tie ke nilo niani o Diedo ñoanianu, bi o yaa loli o yuli leni poliba, o kan kandi, o baa kubi o maama. O baa tieni wan ñani yaa maama o ñoabu nni kuli.

⁴ Jafaano yua n da kaa o baa deni, yaa niani ke o baa pa o Diedo paabu, ki loli o yuli leni poliba,

⁵ ke o baamado gbadi la kaa yedi liba, wani o jafaano yeni baa kuani o ñoanianu leni o poli kuli.

⁶ Ama o baa yaa yie o po, wan gbadi la yaa daali, wan bi loli o yuli leni yaa ñoanianu leni yaa poli kuli, baa kagidi o po. O Diedo baa tieni o po sugili, kelima o baa n yie o po.

⁷ Li yaa tie ke o ñiigi, ki nan den mali ki niani u ñoanianu, ki loli o yuli leni yaa maama n ñani o ñoabu nni,

⁸ o calo yaa gbadi wan tieni yaala, ki nan ŋmini kaa yedi liba wan gbadi la yaa daali yeni, o baa kubi o ñoanianu. Wan bi loli o yuli leni yaa pola yeni mo baa yaa baa ki ye o po.

⁹ Ama o calo yaa yie lipo wan gbadi la yaa daali, o kagidi o pua yeni po, wan den niani yaa ñoanianu leni wan den loli o yuli leni yaa poli yeni. O Diedo baa tieni o po sugili.

¹⁰ Kpepuoli bi puoñaka yaa loli o yuli leni yaa ñoanianu kuli, o baa kuani o cuu.

¹¹ Pua yaa ye o calo deni, ki niani ñoanianu, bi ki loli o yuli leni poliba,

¹² ke o calo yeni gbadi ki ŋmini kaa yie o po, o baa kuani wan den niani yaa ñoaniani leni wan den loli o yuli leni yaa poli kuli.

¹³ Ama o calo n gbadi la yaa daali yeni, o yaa yie o po, yaa poli leni yaa ñoanianu n den jagi o po yeni kuli, baa kagidi. O calo kagidi la, o Diedo mo baa tieni o po sugili.

¹⁴ O calo pia u sanu ki kubi, bi ki kagidi o po, wan den niani yaa ñoanianu, ki poli leni mi ñoalolima yeni.

¹⁵ Li yaa tie ke o calo ŋmini, kaa tua o pua liba kuli, o tuo o pua n niani yaa ñoanianu leni wan den loli o yuli leni yaa poli. O kubi la, kelima waa tua o pua liba kuli, wan den gbadi la yaa daali.

¹⁶ Ama li yaa tie ke wan den gbadi la yaa daali pendi, ke o yuandi ki yie lipo, o baa tugi o pua tuonbiadi panpaani.»

¹⁷ Lani n tie o Diedo n den teni Musa yaa mabilikaama, mi taayema po, pua leni o calo siiga, bibaa leni o bisalo siiga, wan da ye o jafanma nni, ki kaa o baadiegu nni yaa yogunu.