Mi Coadima 26 - U TIENU MAAMA TILI 2013

¹ o Diedo den maadi Musa leni o kopadiciamo Alono bijua Eleasari, ki yedi:

² «Yin ŋoadi mani buolu buolu, ki coadi Isidayeli yaaba nitaanli kuli, yaa jaba n pia bina piilie leni yaaba n cie yeni, yaaba n baa fidi ki gedi toabu.»

³ Musa leni Eleasari den maadi leni Isidayeli yaaba Moabi tiali nni, ki kuu Jurden kpenu, ki tiegi leni Jeriko dogu. Bi den yedi ba:

⁴ «Ti baa coadi yaa jaba n pia bina piilie leni yaaba n cie yeni, nani o Diedo n den puogi Musa leni Isidayeli yaaba, yaaba n den ñani Ejipiti diema nni maama.»

⁵ Isidayeli bijakpelo Rubeni bijaba yaa yela den tie bine: Enoki cuuli, ke bi yaaja tie Enoki. Palu cuuli, ke bi yaaja tie Palu.

⁶ Hetisiloni cuuli, ke bi yaaja tie Hetisiloni leni Karmi cuuli, ke bi yaaja tie Karmi.

⁷ Laa cuuna n den tie Rubeni buolu, ke bi coali kuli den fii piinaa n tudataa n kobilele n niba piitaa (43 730).

⁸ Palu bijua den tie Eliabi.

⁹ Eliabi mo yaa bijaba n tie: Nemueli, Datan leni Abirami. Datan leni laa Abirami den tie nikpiaga li nitaanli nni. Bi den taani ki fii Musa leni Alono po, bani leni Kore cagili yaaba, bani yaaba n den fiini mi yiema o Diedo po.

¹⁰ Ki tinga den yaadi ki ñoabu ki nali bani leni Kore, o cagili yaaba n den kpe ke u mu den buoni kobilie n niba piimuu yaa yogunu. Li den bua ki waani ke yaa niba n sieni n fangi bi yula.

¹¹ Kore bijaba wani naa den kpe.

¹² Simeon buolu, ki ŋoadi cuuli cuuli yaaba den tie: Nemueli cuuli, ke bi yaaja tie Nemueli, Yamini cuuli, ke bi yaaja tie Yamini, Yakini cuuli ke bi yaaja tie Yakini.

¹³ Sera cuuli, ke bi yaaja tie Sera, Sawuli cuuli, ke bi yaaja tie Sawuli.

¹⁴ Bani n den tie Simeon buolu, ke bi coali kuli den fii piilie n tudalie n niba kobilie (22 200).

¹⁵ Gadi buolu, ki ŋoadi cuuli cuuli den tie: Tisefoni cuuli, ke bi yaaja tie Tisefoni, Hagi cuuli, ke bi yaaja tie Hagi, Suni cuuli, ke bi yaaja tie Suni,

¹⁶ Osini cuuli, ke bi yaaja tie Osini, Edi cuuli, ke bi yaaja tie Edi,

¹⁷ Alodi cuuli, ke bi yaaja tie Alodi, Aleeli cuuli, ke bi yaaja tie Aleeli.

¹⁸ Bani n den tie Gadi buolu, nani bi coali n den tie maama. Bikuli den fii tuda piinaa n niba kobimuu (40 500).

¹⁹ Juda bijaba Eri leni Onani. Ama Eri leni Onani den kpe Kanana diema nni.

²⁰ Diidi Juda bijaba nani bi cuuna n tie maama nne: Sela cuuli, ke bi yaaja tie Sela, Peretisi cuuli, ke bi yaaja tie Peretisi, Sera cuuli, ke bi yaaja tie Sera.

²¹ Peretisi bijaba tie: Hetisiloni cuuli yaa yaaja tie Hetisiloni. Hamula cuuli, ke bi yaaja tie Hamula.

²² Bani n tie Juda buolu, nani bi coali n den tie maama. Bikuli den fii piilele n tudaluoba n niba kobimuu (76 500).

²³ Isakari bijaba ki ŋoadi, cuuli cuuli den tie: Tola cuuli, ke bi yaaja tie Tola, Pufa cuuli, ke bi yaaja tie Pufa,

²⁴ Yasubi cuuli, ke bi yaaja tie Yasubi leni Simironi cuuli, ke bi yaaja tie Simironi.

²⁵ Bani n den tie Isakari buolu, nani bi coali n den tie maama. Bikuli den fii piiluoba n tudanaa n niba kobitaa (64 300).

²⁶ Sabuloni bijaba, ki ŋoadi cuuli cuuli den tie: Seledi cuuli, ke bi yaaja tie Seledi, Elon cuuli, ke bi yaaja tie Elon leni Yaleeli cuuli, ke bi yaaja tie Yaleeli.

²⁷ Bani n den tie Sabuloni buolu. Bikuli den fii tuda piiluoba n niba kobimuu (60 500).

²⁸ Josefi bijaba, ki ŋoadi bi cuuna, den tie Manase leni Efrayimi.

²⁹ Manase buolu den tie: Makiri cuuli, ke bi yaaja tie Makiri. Makiri den mali Galaadi. Galaadi cuuli yaaja den tie Galaadi.

³⁰ Galaadi bijaba den tie: Yeseli cuuli, ke bi yaaja tie Yeseli. Heleki cuuli, ke bi yaaja tie Heleki.

³¹ Asiriyeli cuuli, ke bi yaaja tie Asiriyeli, Sikemi cuuli, ke bi yaaja tie Sikemi.

³² Semida cuuli, ke bi yaaja tie Semida, Heferi cuuli, ke bi yaaja tie Heferi.

³³ Heferi bijua Selofadi naa den mali bonjaga, ama o den mali bonpola yo. Diidi Selofadi bisiaba yeni yela nne: Mala, Noa, Hogila, Milika leni Tirsa.

³⁴ Bani n den tie Manase buolu, nani bi coali n den tie maama. Bikuli den fii piimuu n tudalie n niba kobilele (52 700).

³⁵ Diidi Efrayimi mo yaa bijaba nne, nani bi buolu n den tie maama. Sutela cuuli, ke bi yaaja tie Sutela, Bekeli cuuli, ke bi yaaja tie Bekeli, Tahani cuuli, ke bi yaaja tie Tahani.

³⁶ Diidi Sutela bijaba nne: Elani cuuli, ke bi yaaja tie Elani.

³⁷ Bani n den tie Efrayimi buolu, nani bi coali n den da maama. Bikuli den tie piitaa n tudalie n niba kobimuu (32 500). Bani kuli n den tie Josefi bijaba, nani bi buolu n den tie maama.

³⁸ Benjamen bijaba, ki ŋoadi cuuli cuuli den tie: Bela cuuli, ke bi yaaja tie Bela, Asibela cuuli, ke bi yaaja tie Asibela, Ahilami cuuli, ke bi yaaja tie Ahilami,

³⁹ Sufami cuuli, ke bi yaaja tie Sufami leni Hufami cuuli, ke bi yaaja tie Hufami.

⁴⁰ Bela bijaba tie Ardi leni Naama. Ardi buolu yaa yaaja n tie Ardi, Naama buolu yaa yaaja den tie Naama.

⁴¹ Bani n den tie Benjamen buolu, ki ŋoadi bi coadi n den da maama. Bikuli den fii piinaa n tudamuu n niba kobiluoba (45 600).

⁴² Diidi Dan bijaba nne, ki ŋoadi cuuli cuuli den tie: Suhami cuuli, ke bi yaaja tie Suhami. Bani n tie Dan buolu.

⁴³ Suhami cuuli coali den taani ki fii piiluoba n tudanaa n niba kobinaa (64 400).

⁴⁴ Aseri bijaba, ki ŋoadi cuuli cuuli den tie: Yimina cuuli, ke bi yaaja tie Yimina, Jisifi cuuli, ke bi yaaja tie Jisifi, Beria cuuli, ke bi yaaja tie Beria.

⁴⁵ Beria bijaba yaa puoliŋuani tie: Heberi cuuli, ke bi yaaja tie Heberi, Malikieli cuuli, ke bi yaaja tie Malikieli.

⁴⁶ Aseri bisalo den yi Sela.

⁴⁷ Bani n den tie Aseri buolu, ki ŋoadi bi coali n den da maama. Bikuli den fii piimuu n tudataa n niba kobinaa (53 400).

⁴⁸ Nefitali bijaba, ki ŋoadi cuuli cuuli den tie: Yatiseeli cuuli, ke bi yaaja tie Yatiseeli, Guni cuuli, ke bi yaaja tie Guni,

⁴⁹ Yetiseri cuuli, ke bi yaaja tie Yetiseri, Silemi cuuli, ke bi yaaja tie Silemi.

⁵⁰ Bani n tie Nefitali buolu, ki ŋoadi nani bi coali n den tie maama. Bikuli den fii piinaa n tudamuu n niba kobinaa (45 400).

⁵¹ Bani n tie ban den coadi Isidayeli siiga yaaba, ke bi coali kuli den fii kobiluoba n tudiyenli n kobilele n niba piitaa (601 730).

U Tienu waani ban baa boagidi mi diema maama

⁵² O Diedo den maadi leni Musa, ki yedi:

⁵³ «Ŋan boagidi mi diema, ki teni cuuli kuli li yaa biinu, nani li niba n da maama.

⁵⁴ Yaa cuuli yaa niba n yabi ki cie, ŋan teni ba yaa biinu n yabi ki cie. Yaa cuuli yaa niba n wa ki cie, ŋan teni ba yaa biinu n wa ki cie. Ŋan teni cuuli kuli, nani ban coadi ki sua ke li niba da maama.

⁵⁵ Ama yi baa toa tiatia yo, ki boagidi mi diema, ki teni buolu kuli u yaa biinu, nani u niba n da maama.

⁵⁶ Yi baa toa tiatia yo, ki jagi yaa buoli n yabi ki cie n baa gaa yaa biini leni yaa buoli n wa ki cie mo n baa gaa yaa biini.»

Bi coadi Levi buolu mi taaliema

⁵⁷ Diidi ban den coadi Levi buolu, ki ŋoadi nani bi cuuna n tie maama: Gersoni cuuli, ke bi yaaja tie Gersoni, Kehati cuuli, ke bi yaaja tie Kehati, Merari cuuli, ke bi yaaja tie Merari.

⁵⁸ Libini cuuli, Hebiron cuuli, Mali cuuli, Musi cuuli leni Kore cuuli kuli den tie Levi buolu yo. Kehati den mali Amirami.

⁵⁹ Amirami pua den yi Yokebedi, ki tie Levi bisalo, ban den mali o po yua Ejipiti po. Wani n den mali Amirami po Alono, Musa leni bi naataanpuoga Miriam.

⁶⁰ Alono bijaba den tie: Nadabi leni Abihu, Eleasari leni Itamari.

⁶¹ Nadabi leni Abihu den kpe, kelima bi den cuani o Diedo nintuali mi fantanlanma.

⁶² Ban den coadi yaa jaba, ki cili yaa bonjala n den pia ŋmaalo leni yaaba n den cie yeni kuli, den taani ki fii piilie n niba tudataa (23 000). Baa den coadi ki taani ba Isidayeli yaaba siiga, kelima bani Levi buolu ki den pia tinbiinu Isidayeli yaaba siiga.

⁶³ Bani n den tie Musa leni o kopadiciamo Eleasari n den coadi yaaba, Moabi tiali nni, ki kuu Jurden kpenu, ki tiegi Jeriko dogu.

⁶⁴ Musa leni o kopadiciamo Alono n den coadi yaaba Sinayi fanpienma nni yeni kuli, ba niyendo ki den sieni, ki go ye ban den yuandi ki coadi yaaba yeni siiga.

⁶⁵ Baa den sieni, kelima o Diedo den yedi: «Bi baa kpe mi fanpienma nni, ke li kan sieni ba niyendo, li yàá tie Yefune bijua Kalebi leni Nun bijua Josue yaa ka.»