Mi Coadima 16 - U TIENU MAAMA TILI 2013

Kore yiema

¹ Levi buolu yua yendo den ye ki yi Kore, ki tie Kehati buolu, Yitisehari bijua. O den ye leni Rubeni buolu nibitaa, lani n tie Eliabi bijaba Datan, Abirami leni Peleti bijua Oni.

² Bi den fiini mi yiema Musa po. Isidayeli yaaba yudanba siiga, niba kobilie n piimuu, yaaba n den tie nikpiaga ki caa a taana, mo den ŋoadi bi puoli.

³ Bi den taani ki gaani ki cebini Musa leni Alono, ki yedi ba: «Moamoani, yi ji pendi u bianu! Isidayeli yaaba nitaanli kuli tie yaaba n gagidi ki ŋani, ke o Diedo mo ye bi siiga. Be yaa po ke yi fiini yi baa, ki baa diedi o Diedo nitaanli kuli?»

⁴ Musa n den gbadi lani, o den labini leni li paboanli.

⁵ O den maadi leni Kore leni o cagili yaaba kuli, ki yedi: «Saala tiŋaagu, o Diedo baa doagidi, ki waani yua n tie o yua leni yua n gagidi ki ŋani. Lani, o baa teni wan nagini o. Wan baa gandi yua kuli, o den baa cedi wani yo n nagini o kani.

⁶ Tieni mani nanda. Kore, fini leni a cagili kuli n taa mi fantama tiadi.

⁷ Saala, yin tieni lienni u mu, ki go tieni lienni tulale, ki sedi o Diedo nintuali. O Diedo n gandi yaa nilo yeni, wani n baa yaa tie yua n gagidi ki ŋani. Yinba Levi buolu, yinba n ji pendi u bianu!»

⁸ Musa den yedi Kore: «Cengi mani, yinba Levi buolu!

⁹ U Tienu gandi yi Isidayeli yaaba siiga, ki nagini yi o baa kani, ke yi tuuni li gbandieli nni, ki go cedi ke yi ye Isidayeli yaaba nitaanli kani ki todi ba. Naani lani kuli daa dagidi yi?

¹⁰ U Tienu tuo ke fini Kore leni a kpiiba Levi buolu nagini o kani, ke yi go bua ki gaa li kopadiciantuonli.

¹¹ Lani n teni ke yi fiini mi yiema o Diedo po, kelima Alono mo nan tie ŋme yo, hali ke yi baa yaa yenbidi o po?»

¹² Musa den soani ke bi yini Eliabi bijaba, Datan leni Abirami. Ama bi den yedi: «Tii kpendi!

¹³ A ñani ti mi naaŋanma leni ti siadi n dua naani, ki cuani ti mi fanpienma ne niinni, ki baa kpa ti. Li daa dagidi a? A bua ki diedi te!

¹⁴ Laa tie ke a bua ki kuani ti mi naaŋanma leni ti siadi n dua yaa diema nni ka. A kan boagidi ti i kuani leni duven tiidi kuani ka, lan tua ti faali. A tama ke bi naa niba tie juama yo? Tii kpendi!»

¹⁵ Musa pali den beni boncianla, ke o den yedi o Diedo: «Da gaa ban padi yaa padili yeni paabu. Mii gaa bi kani ba ŋunbo, mii didi go tieni bi siiga oba kuli biadima.»

Kore leni o cagili panpaani

¹⁶ Musa den yedi Kore: «Saala, fini leni a cagili yaaba n den taani o Diedo nintuali leni Alono.

¹⁷ Yi siiga yuakuli n den taa o fantantiagu ki tieni lienni tulale, ki cua o Diedo nintuali, yuakuli leni o fantantiagu. Li baa yaa tie kobilie n fantantiadi piimuu. Fini leni Alono moko, den baa yaa kubi yuakuli o fantantiagu.»

¹⁸ Bi den taa yuakuli o fantantiagu, ki tieni lienni u mu leni tulale, ki cua ki sedi u Kadikaanu Gbandieli buliñoabu kani, ki taani Musa leni Alono.

¹⁹ Kore den taani o cagili yaaba kuli, ki fii Musa leni Alono po, u Kadikaanu Gbandieli buliñoabu kani. Lani, o Diedo kpiagidi den doagidi li nitaanli kuli po.

²⁰ O Diedo den maadi Musa leni Alono, ki yedi:

²¹ «Paadi mani ki ña yaa nitaanli n tie ne siiga, ke n baa bolini ba yenma.»

²² Musa leni Alono den labini bi nunmu po, ki yedi: «Fini U Tienu, U Tienu yua n puuni yaala n fo kuli li miali. Naani a baa fiini a pali li nitaanli kuli po, niyendo yaa tuonbiadi po?»

²³ O Diedo den maadi leni Musa, ki yedi:

²⁴ «Maadi leni li nitaanli ki yedi: Sani ki foagidi mani leni Kore, Datan leni Abirami n ye yaa kaanu.»

²⁵ Musa den fii ki teli Kore, Datan leni Abirami po, ke Isidayeli nitaanli mo ŋoadi o puoli.

²⁶ O den maadi leni li nitaanli, ki yedi: «Foagidi mani leni laa nibiadiba gbandiena. Ban die yaala mo kuli, yin da sii la, ke yimoko n da ti kpe kelima bi tuonbiadi po.»

²⁷ Bi niba den sani ki foagidi leni Kore, Datan leni Abirami n ye naani. Datan leni Abirami den ñani, ki sedi bi gbandiena buliñoana kani, bani leni bi puoba, bi bila leni bi yaabila kuli.

²⁸ Musa den yedi: «Line n baa teni yin bandi ke o Diedo n soani nni, ke min tiendi yaa bonla kuli, mii tiendi la leni n yaa paalu ka.

²⁹ Yaa niba n tie ne, yaa kpe nani bi niba kuli n ku yaa kuuma, bi yaa baa, nani bi niba kuli n baadi yaa panpaani, laa tie o Diedo wani ka soani nni.

³⁰ Ama o Diedo yaa tieni bonlidinkaala, o yaa teni ke ki tinga yaadi ki ñoabu ki nali ba leni bi bonpiakaala kuli, ke bi jiidi bi tinkpiba yekaanu nni, ki fo, yi baa bandi ke bi naa niba fali o Diedo.»

³¹ Musa n den li maadi ki gbeni laa maama yaa yogunu yo, ke Datan leni Abirami n den se yaa kaanu, den pudi ki yagidi.

³² Ki tinga den yaadi ki ñoabu ki bolini ba, bani, bi diedi leni Kore niba leni bi bonpiakaala kuli.

³³ Bi den jiidi bi tinkpiba yekaanu ki fo, bani leni bi bonpiakaala kuli. Ki tinga den guani ki mundi ba, ke bi bodi ki ñani li nitaanli siiga.

³⁴ Isidayeli yaaba, yaaba n den se ki lindi ba, n den gbadi bi bubuumu, bi den sani, kelima bi den jie ki tinga n da bolini bani moko!

³⁵ U mu den ñani o Diedo kani, ki buoni, kobilie n niba piimuu yaaba n den se ki kubi tulale yeni.