Mi Coadima 12 - U TIENU MAAMA TILI 2013

Mi gbaadima cuo Miriam

¹ Musa den taa yaa pua n ñani Kusi buolu nni. Miriam leni Alono den yenbidi Musa po, kelima o pua yeni po.

² Bi den yedi: «Naani o Diedo maadi leni Musa bebe yo? Naani waa maadi leni tinba wani?» Lani, o Diedo den gbadi.

³ Musa den tie yaa nilo n pia li yumiinli hali boncianla, ki cie nisaalimiali kuli u tingbanu po.

⁴ Lanyogunu, o Diedo den yedi Musa, Alono leni Miriam: «Yinba nibitaa yeni kuli n ña ki gedi u Kadikaanu Gbandieli po.» Bani nibitaa yeni kuli den ñani ki gedi.

⁵ O Diedo den jiidi ku tawaligu nni, ki sedi li gbandieli buliñoabu kani. O den yini Alono leni Miriam, ke bani nibilie yeni kuli nagini.

⁶ O den yedi: «Cengi mani bonŋanla min baa yedi yi yaala: Saawalipualo yaa ye yi siiga, mini o Diedo yen doagidi n yuli o kani li bonlekaala leni ti dangidi nni.

⁷ Ama laa tie yeni leni n naacemo Musa. O tie nidugika n diegu kuli po.

⁸ N maadi leni o, ke o gba n nialu. N doagidi n yuli o kani, ke laa tie wuoli nni, hali ke o laadi o Diedo nannanli. Lanwani, be yaa po ke yii jie, ki yenbidi n naacemo Musa po?»

⁹ O Diedo pali den beni bi po, ke o den tagini ki ban caa.

¹⁰ Ku tawaligu den kagidi ki ŋaa li gbandieli. Mi gbaadima den pudi Miriam gbanu po, ki pieni paipai. Alono den gbegi ki diidi o, ki sua ke mi gbaadima n cuo o.

¹¹ Lanwani, Alono den yedi Musa: «N daano, ti pia i tagili. Ama, n mia ŋa, ŋan da tuni ti, tin tieni yaa tuonbiadi ti yanluoma nni yeni fala.

¹² Ŋan da cedi Miriam n tua maakaamuali, yua yaa madi yogunu, yen sua o nandi boagidima mali ki bedi no.»

¹³ Musa den kpaani ki yedi o Diedo: «O, U Tienu, n mia ŋa, paagi o!»

¹⁴ Lani, o Diedo den yedi Musa: «Naani o baamado n yaa bi sii o nunga nni ki soli o, o kan yaa bi ye leni i fe, hali danalele ka? Ñani o mani li nagili nni hali danalele. Li yaa puoli, o baa guani ki kua.»

¹⁵ Bi den ñani o li nagili nni, hali danalele. Isidayeli yaaba ki den fii ki suagi liiga. Bi den ye likani, hali a dana n ban tuoni, ke o guani ki kua li nagili nni.

¹⁶ Li yaa puoli, bi den fii Hatiseloti yeni, ki ban kpaa bi nagili Paran yaa fanpienma nni.