Mi Coadima 10 - U TIENU MAAMA TILI 2013

Ŋanjilifa kakacinba

¹ O Diedo den maadi leni Musa, ki yedi:

² «Duadi kakacinbilie leni ŋanjilifa. A baa tieni ba leni ban pua pua ki tandi yaa ŋanjilifa. Bi yen baa yaa piebi ba, ki yini li nitaanli leni a naga yaa baa fii ki suagi liiga.

³ Bi yaa yen piebi yaa yogunu, li nitaanli kuli baa cua ki sedi a kani, u Kadikaanu Gbandieli buliñoabu kani.

⁴ Li yaa tie ke bi piebi kakaciyendo bebe, bi yudanba leni Isidayeli yaaba niba tudili tudili yudanba baa taani a kani.

⁵ Bi yaa piebi boncianla, yaaba yaa nagili n ye puoli baa fii ki cili li cenli.

⁶ Bi yaa go piebi mi taaliema boncianla, yaaba yaa nagili n ye nuganu po, baa fii ki cili li cenli.

⁷ Yi yaa yen baa piebi, ki yini li nitaanli, yin da piebi boncianla.

⁸ Alono bijaba bi kopadicianba n baa yaa piebi kakacinba. Li baa yaa tie yaa mabilikaama n baa yaa ye yogunu kuli, yinba leni yi puoliŋuani kuli po.

⁹ Yi diema nni, yi yaa fii ki caa bu toabu, ki baa koani leni yi yibalinba yaa yogunu, yin piebi kakacinba boncianla mini o Diedo po, n baa tiadi yi po. Yeni, mini o Diedo yi Tienu baa gaa yi yi yibalinba kani.

¹⁰ Yi pamanli dana nni, yi jaanma dana nni leni yi ŋmapaani dana nni, yi baa yaa piebi kakacinba, ki padi yi padijuukaana leni yi taanyenma pada. Lani n baa tua yi po mi tiadima, yi Tienu nintuali. N tie Li Miali Diedo yi Tienu.»

Isidayeli yaaba yema mi fanpienma nni 10.11—21.35 Isidayeli yaaba fii ki cili li cenli

¹¹ Isidayeli yaaba ñama Ejipiti binlieli, cilie dapiiliedi daali, ku tawaligu den ŋoagidi ki ŋaa siedi gbandieli.

¹² Isidayeli yaaba den fii ki ñani Sinayi fanpienma nni. Bi den fii likani yua ŋua yua ŋua. Ku tawaligu yeni den ban sedi Paran fanpienma nni.

¹³ Bi den ŋoadi o Diedo n den teni Musa yaa ñoamabonli laa cicilifiima po.

¹⁴ Yaa toacaga n den taa leni Juda yaaba jakoandicabili, den kpa fii ki taa u sanu. Aminadabi bijua Nasoni n den tugi Juda toacaga yuli.

¹⁵ Tisuari bijua Netaneyeli mo n den tugi, Isakari buolu toacaga yuli.

¹⁶ Heloni bijua Eliabi mo n den tugi, Sabuloni buolu toacaga yuli.

¹⁷ Bi den lodi lodi li gbandieli, ke Gersoni puoliŋuani leni Merari puoliŋuani taa li, ki tugi.

¹⁸ Yaa toacaga n den taa leni Rubeni buolu jakoandicabili, den fii ki taa u sanu. Sedewuri bijua Elitisuri n den tugi, Rubeni buolu toacaga yuli.

¹⁹ Tisulisadayi bijua Selumieli mo n den tugi, Simeon buolu toacaga yuli.

²⁰ Dewuyeli bijua Eliasafi mo n den tugi, Gadi buolu toacaga yuli.

²¹ Kehati cuuli den tugi, u kaangagidiŋamu gbandieli. Bi yen sieni li gbandieli, ki yaa guu bi yaa pundime.

²² Yaa toacaga n den taa leni Efrayimi buolu jakoandicabili, den fii ki mo taa u sanu. Amihudi bijua Elikama n den tugi, Efrayimi buolu toacaga yuli.

²³ Pedatisuli bijua Gamilieli mo n den tugi, Manase buolu toacaga yuli.

²⁴ Gideyoni bijua Abidani mo n den tugi, Benjamen buolu toacaga yuli.

²⁵ Yaa toacaga n den taa leni Dan buolu jakoandicabili, den juodi ki fii ki taa u sanu. Laa toacaga n den juodi ki ŋua puoli. Amisadayi bijua Ahieseri n den tugi, Dan buolu toacaga yuli.

²⁶ Okilani bijua Pagieli mo n den tugi, Aseri buolu toacaga yuli.

²⁷ Enani bijua Ahila mo n den tugi, Nefitali buolu toacaga yuli.

²⁸ Isidayeli yaaba den ŋoadi yeni, toacaga leni aya, ki fii ki taa u sanu.

Musa lingi yua n baa gobidi ba li sancenli nni

²⁹ Musa den yedi o cuadibaa, Madiani yua, Rewuyeli bijua Hobabi: «Ti caa yaa diema yaa po, ke o Diedo yedi: ‹N baa pa yi ma.› Cua ki yegi leni ti, ti baa tieni a po mi ŋanma, kelima o Diedo niani ke o baa tieni Isidayeli yaaba po mi ŋanma.»

³⁰ Hobabi den guani ki yedi o: «N kan gedi. Ama n baa guani n diema po leni n baadiegu nni.»

³¹ Musa den yedi: «N mia ŋa, ŋan da ŋaa ti, kelima mi fanpienma nni, a bani yaa kaani ke ti baa fidi ki yaa kpaagi ti naga. A baa yaa tie ti po gobidika.

³² A yaa yegi leni ti, ti baa n boagidi leni a, o Diedo n baa tieni ti po yaa ŋanma.»

³³ Bi den fii o Diedo juali kani, ki baa cuoni danataa cenli. O Diedo ŋantaadikpaku den kua bi liiga danataa cenli yeni po, ki baa lingi bi po yaa kaanu ke bi baa fuodi.

³⁴ Li yentunli nni, o Diedo tawaligu yen yiini bi po, bi yaa fii bi nagili kani.

³⁵ Ku ŋantaadikpaku yaa baa gedi yaa yogunu, Musa yen yedi: «Fii, o Diedo, A yibalinba n yadi yadi! Yaaba n nani a mo, n sani a nintuali.»

³⁶ Bi yaa den baa bili ku yaa yogunu mo, o yen yedi: «O Diedo, lebidi ki guani nne, Isidayeli yaaba tuda tuda kani.»