Mi cilima 7 - U TIENU MAAMA TILI 2013

Nowe kua ku ñinbiagu nni

¹ O Diedo den yedi Nowe: «Ŋan kua ku biagu nni, fini leni a diegu nni yaaba kuli, kelima n laa ke a tiegi mini U Tienu nintuali, mi naa nifiima kuli siiga.

² Ŋan taa ki kubi a kani yaa yandi n ŋani kuli siiga yantonga leni yansiaga, bondilie lie yeni, hali taalimilele yanbuolu kuli po. Yaa yandi n ki ŋani siiga, a baa taa bondilie lie yantonga leni yansiaga yanbuolu kuli po.

³ A go baa taa tanpoli bonyugiditi, bontonga leni bonsiaga bondilie lie yeni, hali taalimilele, ke bi yaa buolu mo n yaa ye ki da bodi ki tinga nni.

⁴ Li sieni danalele ke n baa teni ki tabolinkaaga n mi dana piinaa leni ñiadi piinaa. Lani, n baa bolini min den tagi yaala ke li fo ki tinga nni kuli.»

⁵ Nowe den tieni o Diedo n den puogi o yaala kuli.

Ki tabolinkaaga

⁶ Ki tabolinkaaga n mini yaa binli ki tinga nni, Nowe den pia bina kobiluoba.

⁷ Nowe den kua ku ñinbiagu nni leni o bijaba, o pua leni o biyuamu ki faabi leni ki tabolinkaaga ñincianma.

⁸ Yaa yandi n ŋani leni yaa yandi n ki ŋani, ti bonyugiditi leni yaa bonfuoda n balini ki tinga nni kuli siiga, bontonga leni bonsiaga

⁹ den kua ku ñinbiagu nni Nowe kani, buolu kuli bondilie lie, bontonga leni bonsiaga nani U Tienu n den puogi Nowe maama yeni.

¹⁰ Danalele n den pendi, ki tabolinkaaga den mini ki tinga nni.

¹¹ Li den tie Nowe binkobiluobidili, cilie piiga n daleleeli. Laa daali lige ke u kulu ñinbuna den pudi boncianla, tanpoli bona kuli mo den luodi.

¹² Ki taaga den mini ki tinga nni dana piinaa leni ñiadi piinaa, ki naa yandi.

¹³ Landaali Nowe den kua ku ñinbiagu nni, wani leni o bijaba Sem, Kam leni Jafeti. O pua leni o biyuamu moko den yegi leni ba ki kua.

¹⁴ Bani leni ti moayandi kuli den kua nani bi buoli n tie maama leni ti denyandi kuli, nani bi buoli n tie maama, yaa bonbalinkaala n balini ki tinga nni kuli nani bi buoli n tie maama, ti bonyugiditi kuli nani bi buoli n tie maama, ba i nuani leni yaala n pia i fiabi kuli nani li buoli n tie maama, bikuli den cua.

¹⁵ Bikuli den kua ku ñinbiagu nni Nowe kani bondilie lie, yaala n tie gbanandi ki pia li miali fuoma kuli.

¹⁶ Yaala n fuo ki pia gbanandi kuli bontonga leni bonsiaga kuli den kua ku ñinbiagu nni, nani U Tienu n den puogi Nowe maama. Lanwani, o Diedo den luoni o po bu buliñoabu.

¹⁷ Ki tabolinkaaga yeni den mini hali dana piinaa. Mi ñima den pugidi ki yugidi ku ñinbiagu ke ku den yugidi ki fii ki tinga tanpoli.

¹⁸ Mi ñima den pugidi ki yabidi boncianla ki tinga nni, hali ke ku ñinbiagu den fii ki puugi u ñingbanu po.

¹⁹ Mi ñima go den pugidi ki go pugidi hali ke a joaciama ya n ye ki tinga nni kuli yula den bodi.

²⁰ Mi ñima go den pugidi hali ke mi den pendi a juana yula, ki go kpedi piiga n nukpanduna muu.

²¹ Yaala n den fo ki tinga nni kuli, ti bonyugiditi, ti denyandi leni ti moayandi, yaala n balini ki tinga nni kuli leni bi niba kuli den kpe.

²² Yaala n den fo kuli, ki pia li miali fuoma li niinni ki ye yaa tinga n kuodi niinni kuli den kpe.

²³ U Tienu den bolini yaala n ye ki tinga nni ki fo, ki cili bi niba ki yaa caa hali ti yandi, li bonbalinkaala leni tanpoli bonyugiditi, bikuli den bodi ki tinga nni cain. Nowe leni yaaba n den ye leni o ku ñinbiagu nni yaa ka, laa den sieni niloba kuli goga.

Nowe ñani ku ñinbiagu nni

²⁴ Mi ñima den baa ki yabi ki tinga po, hali dana kobiga n piimuu.