Mi cilima 6 - U TIENU MAAMA TILI 2013

U Tienu jagi ke o baa bolini o tagima

¹ Bi niba n den cili ki pugidi boncianla ki tinga nni kuli yaa yogunu ki maa a bonpola,

² U Tienu bijaba den laa ke bi niba bisiaba ŋani hali bonŋanla, lane bi den taa bi siiga ban bua yaaba ke bi tua bi puoba.

³ Lanwani, o Diedo den yedi: «N Fuoma kan yaa ye o nilo niinni yaa yogunu kuli, kelima o nisaalo tie ti gbanandi bebe, o bina ji baa yaa tie kobiga n piilie.»

⁴ U Tienu bijaba n den kua bi niba bisiaba kani ke bi mali bi po a bila, lanyogunu ti niciandi den ye ki tinga nni. Bani n tie kpiama yaaba, yaaba n den bili jama hali puoli po yogunu.

⁵ O Diedo den laa ke bi niba biadima den yabi ki tinga po, ke bi pala yantiana den koa mi biadima nni daali kuli.

⁶ O Diedo pali den biidi leni wan den tagi o nisaalo ki tinga nni, ke o mua ke o yàá bi tagi o.

⁷ O Diedo den yedi: «N baa bolini min den tagi yaa nilo ki ñani o ki tinga nni cain, ki cili o nilo ki yaa caa hali ti denyandi, li bonbalinkaala leni tanpoli bonyugiditi, kelima n lebidi n yama. N mua ke n yàá den tagi ba.»

⁸ Ama Nowe wani den baa U Tienu ŋanbili.

U Tienu jagi ke o baa faabi Nowe

⁹ Diidi Nowe yaabila maama nne: Nowe den tie niteginka leni papiendaano laa yogunu niba kuli siiga. Nowe den cuoni leni U Tienu.

¹⁰ Nowe den mali bonjalataa: Sem, Kam leni Jafeti.

¹¹ U Tienu nintuali, ki tinga kuli den joagini ki biidi cain. Ki tinga den gbie leni mi biadima.

¹² U Tienu den nuali ki tinga ki sua ke ki joagini ki biidi, kelima mialifo kuli den tiendi yaala n joagini ŋanduna nni.

¹³ Lani yaa po, U Tienu den yedi Nowe: «N bili ke gbanandi kuli yaa juodima pundi, kelima bi gbieni ki tinga leni mi biadima. Diidi, n baa bolini bani leni ki tinga kuli.

¹⁴ Ŋan taa yaa tibu n yi goferi daadi ki tagi ku ñinbiagu. A baa boagidi ku diebila bila, ki boali ku tugu nni leni ku puoli kuli yaa sinboanma n ye ki tinga nni.

¹⁵ Diidi ŋan baa tieni ku maama: ku ñinbiagu yeni foaginu baa yaa tie nukpanduna kobitaa, ku pianu baa yaa tie nukpanduna piimuu, ku kpedima mo baa yaa tie nukpanduna piitaa.

¹⁶ A baa tieni ku ñinbiagu yeni kali nni li bonli, li foaginu baa yaa tie nukpandunyenli. A baa tieni ku ñinbiagu yeni kunkunu bu buliñoabu, ku tugu nni baa yaa pia a dietuatuada bonataa.

¹⁷ Lanwani, nmo baa yini ki tabolinkaaga n cua ki bolini ki tinga, ki bolini mialifo kuli. Yaala n ye ki tinga nni kuli baa kpe.

¹⁸ Ama n baa kuani o ŋantaado leni fini. A baa kua ku biagu nni, fini leni a bijaba, a pua leni a bijaba puoba.

¹⁹ Bonfuodila buolu kuli siiga, ŋan taa bontonga leni bonsiaga, ki kuani ba ku ñinbiagu nni a kani, ban da kpe.

²⁰ Yanbuolu kuli bilie lie, i nuani, ti denyandi, li bonbalinkaala, likuli baa cua a kani ki baa ki yaa ye.

²¹ Ŋan taa jebuolu kuli ki bili a kani lan yaa yabi, ke lan tua mi jiema fini leni bani kuli po.»

²² Nowe den tieni yeni. O den tieni U Tienu n den puogi o yaala kuli.