Mi cilima 5 - U TIENU MAAMA TILI 2013

Ki cili Adama ki ban pundi Nowe yogunu

¹ Line n tie Adama yaabila yela tili. U Tienu n den tagi o nilo yaa yogunu, o den tagi o wani U Tienu yaa nannanli nni.

² O den tagi o joa leni o pua, o den seligi ba. Wan den tagi ba yaa daali, o den yini ba bi nisaaliba.

³ Adama n den pia bina kobiga n piitaa yaa yogunu, o den mali o bijua yua n naani leni o hali bonŋanla. O den cili o yeli Seti.

⁴ Adama n den mali Seti yaa yogunu, o go den tieni bina kobinii, ki go mali a bonjala leni a bonpola.

⁵ Adama bina kuli taanma tie bina kobiyia n piitaa, li yaa puoli, o den kpe.

⁶ Seti n den pia kobiga n binamuu yaa yogunu, o den mali Enosi.

⁷ Seti n den mali Enosi yaa yogunu, o go den tieni kobinii n binalele, ki go mali a bonjala leni a bonpola.

⁸ Seti bina kuli den tie kobiyia n piiga n binalie, li yaa puoli, o den kpe.

⁹ Enosi n den pia bina piiyia yaa yogunu, o den mali Kenani.

¹⁰ Enosi n den mali Kenani yaa yogunu, o go den tieni kobinii n piiga n binamuu, ki go mali a bonjala leni a bonpola.

¹¹ Enosi bina kuli den tie kobiyia n binamuu, li yaa puoli, o den kpe.

¹² Kenani n den pia bina piilele yaa yogunu, o den mali Malaleeli.

¹³ Kenani n den mali Malaleeli yaa yogunu, o go den tieni bina kobinii n piinaa, ki go mali a bonjala leni a bonpola.

¹⁴ Kenani bina kuli den tie bina kobiyia n piiga, li yaa puoli, o den kpe.

¹⁵ Malaleeli n den pia piiluoba n binamuu yaa yogunu, o den mali Yeledi.

¹⁶ Malaleeli n den mali Yeledi yaa yogunu, o go den tieni bina kobinii n piitaa, ki go mali a bonjala leni a bonpola.

¹⁷ Malaleeli bina kuli den tie kobinii n piiyia n binamuu, li yaa puoli, o den kpe.

¹⁸ Yeledi n den pia kobiga n piiluoba n binalie yaa yogunu, o den mali Enoki.

¹⁹ Yeledi n den mali Enoki yaa yogunu, o go den tieni bina kobinii, ki go mali a bonjala leni a bonpola.

²⁰ Yeledi bina kuli den tie kobiyia n piiluoba n binalie, li yaa puoli, o den kpe.

²¹ Enoki n den pia piiluoba n binamuu yaa yogunu, o den mali Matusalemi.

²² Enoki n den mali Matusalemi yaa yogunu, Enoki den cuoni leni U Tienu hali bina kobitaa, ki go mali a bonjala leni a bonpola.

²³ Enoki bina kuli den tie kobitaa n piiluoba n binamuu.

²⁴ Enoki den cuoni leni U Tienu, li yaa puoli, waa go den ye, kelima U Tienu den taa o.

²⁵ Matusalemi n den pia kobiga n piinii n binalele yaa yogunu, o den mali Lemeki.

²⁶ Matusalemi n den mali Lemeki yaa yogunu, o go den tieni kobilele n piinii n binalie, ki go mali a bonjala leni a bonpola.

²⁷ Matusalemi bina kuli den tie kobiyia n piiluoba n binayia, li yaa puoli, o den kpe.

²⁸ Lemeki n den pia kobiga n piinii n binalie yaa yogunu, o den mali bonjaga,

²⁹ ki yini o Nowe ki yedi: «Wani n baa baagi ti leni ti nii tuonfala, ya n cua kelima o Diedo n den soli yaa tinga yaa po.»

³⁰ Lemeki n den mali Nowe yaa yogunu, o go den tieni kobimuu n piiyia n binamuu, ki go mali a bonjala leni a bonpola.

³¹ Lemeki bina kuli den tie kobilele n piilele n binalele, li yaa puoli, o den kpe.

³² Nowe n den pia bina kobimuu yaa yogunu, o den mali Sem, Kam leni Jafeti.