Mise 7 - U TIENU MAAMA TILI 2013

Isidayeli yaaba kuli tieni yaala n bia

¹ Ŋain, n tie nani yaa nilo n fii Ki baa n cie o tiidi bonluonkaala u jetaagu yogunu yeni. Ama wan ban pundi waa laa wan baa ŋmani yaala. Waa laa o yama n bi ye yaa kankankpiala nni, Ba bonyenli bu tibu po.

² Bi niteginkaaba kuli bodi mi diema nni, Ba niteginkayendo ki go ye bi niba siiga. Bikuli lingi ki bua ki wuli mi soama. Yuakuli dia o kpiilo ku diagu ki bua ki cuo o.

³ Bi niba kuli nuni maa mi biadima tienma po. Bi yudanba kan tieni puu se bi gaa li suuli. Bi bujiaba moko dia bi niba a suuna. A nikpiaga doagidi bi niapiali.

⁴ Bi siiga yua n ŋani ki cie bia nani li kongoabili yeni, Yua n tiegi ki cie moko bia ki cie ku kontuugu. Bi saawalipuaba n den tuodi ki waani yi yaa daali yeni pundi. Landaali yi gbanu baa wudi.

⁵ Da dugi mani yi yieninlieba po, Ki da jigini yi danlinba. Bandi mani yin baa yaa maadi maama, Yi puoba yaaba n dua ki baali yi kani.

⁶ Landaali, yuakuli yibali baa yaa tie o diegu nni yua yo, Kelima ki bonjaga baa fali o baa, Ki bonpuoga n fiini mi yiema o naa po, Ki biyuaga mo n yaa nani o yaanaa.

⁷ Ama mini, n baa yaa diidi o Diedo yo, N baa yaa dugi n faabima Tienu po, Kelima wani n Tienu baa gaa n miabu.

Ti dugidi U Tienu ninñingbadima po

⁸ N yibali, da mangi a pali. Ba n yaa baa, n baa go fii. Ba n yaa ye li biigili nni, O Diedo tie n yenma.

⁹ N tieni ti tuonbiadi o Diedo po, Lani, n baa juuni ki gaa o pabienli tundifala, Hali wan baa ti tua n candanbaalo, Ki saa n po i moamoani yaa yogunu. O baa gedini nni naankani n yieni, Yeni n baa yaa ñuadi o teginma tuona.

¹⁰ N yibali baa le lani kuli i fe n cuo o, Wani yua n den tua nni, Li Miali Diedo a Tienu ye le? Bi baa ŋmaa n yibalinba nani u sanu nni moamoadi yeni. N nuni baa le lani kuli.

¹¹ Yinba Isidayeli yaaba, bi baa diadi yi diema, Ban baa guani ki maa yi bilinciami yaa daali.

¹² Landaali, ki cili Asiiri ki ban pundi hali Ejipiti, Ki taa Ejipiti ki ban tuoni u kpenciamu Efrati, Ki cili ñincianma ki ban tuoni miyama, Ki didi taa juali ki ban tuoni liyali, A niba baa ña lipo ki kpeni.

¹³ Ama li ŋandunli yaaba baa bodi Kelima bi tuonbiadi po.

U Tienu baa gbadi Isidayeli yaaba po mi ninñima

¹⁴ U Tienu, taa a yankpaagbiamu ki yaa kpaa a niba, Bani yaa nigoli n tie a piama yeni. Bi ye bi bebe li fuasieli nni i tikuani siiga. Ŋan go yaa kpaa ba Basan leni Galaadi diema nni, Nani ŋan den kpa kpaa ba maama.

¹⁵ U Tienu yedi: «N baa teni yin go le mi bancianma, Nani yin den ñani Ejipiti nni yaa yogunu yeni.

¹⁶ I nilanbuoli baa le lani i fe n cuo ba, Ba leni ban pia yaa paalu kuli. Bi baa pii bi ñoana, bi tuba mo n womi.

¹⁷ Bi baa yaa liagi mi tama nani i we, Bi nani yaala n balini ki tinga nni kuli yeni. Ti jawaandi baa cuo ba ban ña bi diepaala nni, Ki cua o Diedo ti Tienu nintuali ki digibi.» U Tienu, bi baa yaa jie ŋa, ki fangi a.

¹⁸ Ŋme n naani leni fini U Tienu, Fini yua n duundi ki ñandi ti tuonbiadi, Ki puuni sugili a niba yiema po. Ŋaa kubi a pabienli yogunu kuli a niba yaaba n sieni po, Kelima mi ninñingbadima mani a po.

¹⁹ A go baa gbadi ti po mi ninñima, Ki ŋmaa ti tuonbiadi a taana tiipo, Ki lu ti tin tingi mi ñincianma nni.

²⁰ A baa waani tinba a niba Jakob puoliŋuani, A buama yaama n ki pia lebidima, Ki go waani tinba Abalahama puoliŋuani a ŋanbili, Nani ŋan den poli ki niani ti yaajanba hali yogunu maama.