Mise 6 - U TIENU MAAMA TILI 2013

Isidayeli tudima leni o Diedo ninñingbadima 6—7 U Tienu buni leni Isidayeli yaaba

¹ Cengi mani o Diedo n yedi nni yaala: «Fii ki bu a buudi a joaciama nintuali, Ŋan tua a siedinba, A joabila moko n gbadi a yedima!

² N den yedi: ‹Yinba a joaciama Leni ki tinga tanpuupaala, Cengi mani o Diedo n baa bu yaa buudi, Kelima o pia ti buudi ki baa bu leni o niba. O bua ki bu leni bani Isidayeli yaaba.›

³ O yedi: ‹N niba, n tieni yi be? N coagi yi leni be? Waani nni mani!

⁴ Yi koani leni nni kelima n den ñani yi Ejipiti po? Yi koani leni nni kelima n den faabi yi leni ti yonbidi? Yi koani leni nni kelima n den soani Musa, Alono Leni Miriam ke bi tua yi liiga yaaba ki gobidi yi?

⁵ N niba, tiadi mani Moabi bado Balaki n den jagi Ke o baa tieni yi yaa bonbiadila, Ki go tiadi Beori bijua Balaam N den guani o yaa maama. Tiadi mani yaala n den tieni Li sancenli nni kuli, Ki cili Sitimi ki pundi hali Giligali. Tiadi mani lani kuli ki bandi mini o Diedo N den tieni yi po yaa ŋanbili kuli.› »

U Tienu n bua bi nisaaliba n ŋoadi o maama

⁶ N baa cua o Diedo nintuali leni be? N baa pugi tanpolijoma Tienu leni be? Naani n baa cua leni yaa naabila N pia binyenli yenli yo Ki padi o po a padijuukaana?

⁷ Naani petona tuda tuda n baa mangi o Diedo pali? Naani o Diedo bua yaa kpama n baa gbieni i kpenciame? Naani n baa taa n bonjakpiage ki padi n yiema po? Naani n baa taa n bimadige ki padi n tuonbiadi po?

⁸ U Tienu den bangi fini o nisaalo yaala n ŋani Leni o Diedo n guu a kani yaala. Lani n tie ke ŋan yaa ŋua yaa bujiali n tiegi, Ki bua mi teginma, Ki go yaa cuoni wani a Tienu nintuali leni li yumiinli.

U Tienu baa cuo i janbi leni ku tugutongu danba

⁹ O Diedo maadi leni u dogu niba, ki yedi: Juda yaaba leni u dogu nitaanli cengi mani, O Diedo baa faabi yaaba n fangi o yeli.

¹⁰ «Naani n baa cedi bi nibiadiba n yaa kubi Bi diedi nni ban den janbi Ki baa yaa ŋalimano, Leni yaa bonbiigikaala n ki dagidi, Mini U Tienu n solini yaala?

¹¹ Naani yaaba n kubi i boandi bonbiigikaala, Ki ŋuuni bi boaga nni i janbi bonbiigikaala Tiegi mini U Tienu po?

¹² U dogu nni piada mabindi a luoda, Ki pua mi faama ki janbidi bi lieba.

¹³ Li tie lani yaa po ke n teni ke fala Baa yinba u dogu na yaaba. N baa bolini yi kelima yi tuonbiadi po.

¹⁴ Yi baa yaa di ki kan guo, Koma kan ña yi po. Yin baa bili yaa kpaandi ke tin faa ki todi yi, Kan kuani yi fuomiba. Ba yin baa bili yaala mo, N baa teni bu toabu n bolini likuli.

¹⁵ Yi baa coagi ti jaadi ki kan yendi. Yi baa yaa ŋoali ki ñandi olivie kpama, Ama yi nan kan sogi ma. Yi baa yaa tuodi mi daama, Ama yi kan ño ma.

¹⁶ Yikuli ŋoadi o bado Omiri N den bili yaa bogidibiada, Leni Omiri bijua Akabi puoliŋuani n den tiendi yaala kuli. Yi ŋua ki kubi ban den jagi ki bili yaa bonbiadila. Li tie lani yaa po ke n baa taa yi Ki teni yi yibalinba ban bolini yi. Fini u dogu mo, n baa teni a niba n tua Bi niba po laadi bonla. Ban den fiagi n niba yaa fe baa jiidi yi yula po.»