Mise 5 - U TIENU MAAMA TILI 2013

Yaa candaano n baa ña Betelemi nni bali jama

¹ Fini Betelemi-Efrata dogu, A wa Juda buoli dogi kuli siiga, Ama yua n baa diedi Isidayeli yaaba Baa ña a yaa niinne, Wani yua n den ye hali yogu.

² Lani yaa po, U Tienu baa ŋaa O niba bi yibalinba nuu nni, Hali yaa pua n baa maa ki bonjaga yeni, Yaa mali ka yaa yogunu. Lanwani, ki biga yeni kpiiba yaaba n sieni, Ki ye foagima baa guani ki kpeni, Bi kpiiba Isidayeli yaaba diema nni.

³ O yaa cua o baa yaa kpaa ba Leni o Diedo paalu, O baa gobidi leni wani, Li Miali Diedo U Tienu kpiagidi. O niba jigi baa yaa co, Kelima yaaba n ye hali ki tinga banlu kuli, Baa yaa kpiagidi wani bi bado.

⁴ Wani n baa cuani mi yanduanma. Asiiri yaaba yaa cua ti diema nni, Ki kua hali ti dieŋama nni, Ti baa teni yudanba boncianla n fii ki sedi bi po.

⁵ Bi baa diedi Asiiri diema leni ki jugisiega, Ki diedi Nemirodi diema mo leni u ŋalikuomu. Bi yaa kua ti diema nni ki ŋmaa ti tinga nni, Ban baa maa yua yeni baa faabi ti bani Asiiri yaaba nuu nni.

Isidayeli yaaba, yaaba n baa sieni

⁶ Lanyogunu Jakob puoliŋuani yii n sieni, Baa yaa ye yaa nibuoli n yabi siiga. Nani yaa mangu n ña o Diedo kani, Bi nani ki taaga n mi yaa ñinboala ti muadi po yeni. Ki taaga yeni naa guu bi niba kani liba, Ki kan go ŋmani bi nisaaliba kani mo liba.

⁷ Jakob puoliŋuani yaaba sieni baa yaa ye Yaa nilanbuoli n yabi siiga, Nani yaa yangbanlo n ye ti fuayandi siiga, Bi nani yaa yangbanbili n ye A pegola siiga yeni. O baa yaa cuoni bi siiga ki co ki dadi ki padi, Ke oba kuli mo kan fidi ki gaa ba o kani.

⁸ Isidayeli yaaba, pua mani yi koanginkaaba, Ki bolini yi yibalinba kuli.

O Diedo baa bolini i buli kuli

⁹ O Diedo go yedi: «Li daali kpendi Ke n baa bolini yin pia yaa taami kuli, Ki go bolini yin pia yaa toateliti kuli.

¹⁰ N baa bolini yaa dogi n ye yi diema nni kuli, Ki go bolini yin den maa yaa diepaala bu toabu po.

¹¹ N baa bolini yin kubi yaa Buligbandi yi nuu nni. A lingida kan go yaa ye yi siiga.

¹² N baa bolini i buli leni i nannana yi siiga. Yi kan go gbaani ki pugi yi nii tuona.

¹³ N baa fobi yi diema nni ti budaadi yeni, Ki go bolini yi dogi kuli.

¹⁴ N pali fii boncianla, Ke n baa tuu li panli yaa nilanbuoli N ki den cengi n yedima.»