Mise 4 - U TIENU MAAMA TILI 2013

Mi yanduanma leni mi diema guaniŋanbima 4—5 Jerusalemi mi yanduanma dociamu

¹ U yogunu yaa pundi, O Diedo bili ke o diegu n ye yaa juali po, Baa kpedi ki cie a joabila kuli, Ba a joaciama moko. I nibuoli baa yaa tigibi ki caa likani.

² I nilanbuoli boncianla baa yaa caa likani ki tua biyaba: «Cua mani tin do o Diedo juali yuli po, Wani Jakob Tienu diegu kani, Ke wan bangi ti o sani, Ke tin yaa cuoni yini yaa niinni.» Kelima li tie Siyon po yo, Ke li bali maama baa ña, O Diedo maama baa ña Jerusalemi dogu nne.

³ O baa tua i nibuoli boncianla bujialo, O baa tua yaa nilanbuoli n pia u paalu, Ki ye hali foagima koanpaado. Bi baa taa bi jugisiemu ki maa a cecela, Ki taa bi kpaana mo ki maa ti moaciedi. Nibuoluba kan go fii ki tuogi uyuu. Bi kan go bangi bu toabu n tiendi maama.

⁴ Nilo kuli baa yaa kaa o duventiidi Leni o kankanŋuuke soangu nni. Yua n baa teni bi niba n jie kan go yaa ye, Kelima Li Miali Diedo U Paaciamu Kuli Daano Ñoabu n maadi ki yedi ke li baa yaa tie yeni.

⁵ Nilanbuolu kuli baa yaa ŋua o tienu, Timo n yaa ŋua Li Miali Diedo ti Tienu, Hali yaa yogu n tuu yaa yogu.

Isidayeli yaaba baa ña ti yonbidi nni ki kpeni

⁶ O Diedo yedi: «Li daali kpendi, Yaa daali ke n baa guani ki taani n pe yaaba n poagili. N baa guani ki taani ban den deli ki yadi yaaba, Min den faligi bani yaaba yeni.

⁷ N baa taa yaaba n poagili yeni, Ki teni ban tua yaaba n baa sieni, Ki teni ban den deli ki gedini yaaba foagima yeni, N tua yaa nibuolu n pia u paalu. Lanyogunu, mini o Diedo baa yaa die ba Siyon juali nni hali yaa yogunu n tuu yaa yogu kuli.

⁸ Fini Siyon juali li toaguudidieli, A baa guani ki baa a kpiagidi Nani mi kpiama yeni, Jerusalemi mo n guani ki baa o bali.»

Isidayeli yaaba baa le fala ki yuandi ki baa mi faabima

⁹ Yinba Jerusalemi yaaba, be teni ke yi buudi moala? Naani yin kaa pia bado, kaa go pia tundika yeni yaa po yo? Lani n teni ke yi mua ki yalini Nani u maditugukoanu n cuo yaa pua yeni?

¹⁰ Yeni de, Siyon yaaba, yaa yalini ki duni mani, Nani yaa pua n ye leni u maditugukoanu yeni. Moala yi baa ña u dogu na niinni, Ki gedi ki ban kpaa yi gbandiena li fuali nni. Yi baa gedi hali Babilonni ki ban baa mi faabima. Lanpo, mini o Diedo baa faabi yi yi yibalinba nuu nni.

¹¹ Moala i nilanbuoli boncianla taani Ki bua ki tuogi leni yi bu toabu, Ki maadi yi maama ki tua: «Tin kua Siyon dogu nni ki joagini u. Tin sedi ki ñuadi u dogu yeni bolinma.»

¹² Ama i nilanbuoli yeni niba Naa bani mini o Diedo yantiana. Baa bani min jagi ke n baa tieni yaala. Mini n taani ba nani ban yen taani a dibaba u jalu nni maama yeni.

¹³ Siyon yaaba, Fii mani ki ŋmaa yi yibalinba, Nani yaa ne n cuoni u jalu nni, Ki ŋmaadi i di yeni. N baa teni yi yina n tua kuboandi. Yi taawoga mo n tua kumoandi. Yi baa ŋmaa ki midi yaa nilanbuoli n yabi, Ki gagidi ki bili bi piama mini ki tinga kuli Diedo po.

¹⁴ Moala Siyon yaaba, yinba yaaba N pia yaa toagola n yabi, Badi mani yi yula li paboanli be, Ki taani yi toagola kuli, Kelima yibalinba taagi ki baa baa yi. Bi baa pua yinba Isidayeli yaaba Yudaano kpianu u gbiamu.