Mise 3 - U TIENU MAAMA TILI 2013

Isidayeli yudanba tagili

¹ N den yedi Jakob puoliŋuani yudanba, cengi mani: «Naani laa tie yinba ka baa bangi mi teginma?

² Ama yi nani yaala n ŋani tienma, Ki bua yaala n bia yaa tienma. Yi pidi n niba gbandi, Ki kogidi bi nandi ki ŋaani a kpaba.

³ Yi ŋmani n buolu niba ki pidi bi gbandi. Yi mudi bi kpaba ki jia ba bonjena jena, Nani ti nansagiditi bi nani ti nanŋaaditi yeni.

⁴ Li tie lani yaa po yo, ke yi yaa ti kpaani, Ki miadi o Diedo wan faabi yi yaa yogunu, O kan lebidi yi liba kelima yi soani yaa tuona n bia. Lanyogunu o baa buli yi o nunga.»

U Tienu fu leni bi saawalipuaba

⁵ O Diedo yedi yaa saawalipuaba n boandi o niba, Ke bi yaadi ki ŋaa o sanu: «N niba yaa puni yi bonŋmankaala, Se yin yaa tua ba ke mi yemanma baa yaa ye. Ama bi yàá puni yi bonŋmankaaliba mo, Yin yaa tua ba ke bu toabu baa cua.

⁶ Lani yaa po yinba bi saawalipuaba yeni, Yi yogunu tuoni u bianu, Yi yienu baa kua, Yi kan go le bonlekaaliba kuli. Yi kan go fidi ki pua saawali liba kuli po.»

⁷ Yaaba n pua saawali kuli baa pii bi nunmu i fe po, Kelima U Tienu kan lebidi bi po liba.

⁸ Ama mini, o Diedo Fuoma ye n niinni, Ki gbieni nni u paalu, O go puni nni mi teginma leni li papaali, Ke min waani Jakob puoliŋuani bi tagili, Ki waani Isidayeli yaaba bi tuonbiadi.

Mise waani ke Jerusalemi baa bodi

⁹ Jakob puoliŋuani yudanba, Yinba Isidayeli yaaba koanbala, Yinba yaaba n nani yaa bujiali n tiegi, Ki kpigini i moamoani, cengi mani!

¹⁰ Yi maa ki pugidi Siyon dogu mi soama nni, Ki go maa Jerusalemi dogu mo li nikpali nni.

¹¹ Jerusalemi bujiaba gaani a suuna ki ja ti buudi, Likani kopadicianba bangi li bali maama ti ñuadi po, Bi saawalipuaba mo pua saawali i ligi po. Ama leni lani kuli, bi baa ki dugi o Diedo po ki tua: «Naani o Diedo ki ye leni ti? Fala kan nandi ti abada.»

¹² Lanwani yi tuada yeni po, Bi baa ko Siyon nani u kuanu yeni, Jerusalemi baa tua kulinjagbeli, Ku tiigu mo baa pini U Tienu diegu n ye yaa juali yuli po.