Mise 2 - U TIENU MAAMA TILI 2013

Fala baa baa yaaba n mabindi a luoda

¹ Fala baa baa yaaba n dua bi duani nni, Ki bogindi mi biadima. Ku tiŋaapanpangu bi yen tieni la kelima bi pia li paalu.

² Bi yama yaa baa yua yaa kuanu nni bi yen fie u, Bi yama yaa didi baa yua yaa diegu nni bi yen fie ku. Bi mabindi o diedaano leni o diegu, Ki mabindi o nilo leni o piama.

³ Li tie lani yaa po yo ke o Diedo yedi: «Diidi, n baa teni u nufanu n pua yaa nibuolu n tie ne. Lanyogunu yi kan go yaani yi yula Ki cuoni leni ti japaadi, Kelima li baa yaa tie fala yogunu yo.

⁴ Landaali yi baa tua bi niba po Li ñuali kpanjama. Yi baa wanli ki yedi: ‹Bi gaa ti diena cain. Bi fie ti biinu ki teni nitoaba. Ŋain, be n teni ke bi fie ti biinu? Ti yibalinba gaa ti kuani ki boagidi.›

⁵ Li tie lani yaa po yo ke yi puoliŋuani siiga, Oba kuli kan baa tinbiinu, O Diedo niba n baa guani ki boagidi yaa tinmu yeni siiga.»

Yaaba n yiedi o saawalipualo maama

⁶ Bi tianba tua: «Cedi wolingu. Yua n yedi ke i fe kan lagidi ti tie yanluodaano.

⁷ Jakob puoliŋuani, Yin maadi yaa maama ne dagidi bi? Naani o Diedo juuni ki gbale? Naani o maani ki tiendi yeni?» Naani o maama ki mani yaaba n kubi mi teginma po ka?

⁸ O Diedo yedi yi: «Hali yogu yi fii ki sedi ki tua n niba yibalinba. Yi fenli yaaba n ñani bu toabu po Ki kpendi ke bi yama dua kpaligolikaadi.

⁹ Yi deli ki ñandi n buolu yaaba puoba bi diebuada nni, Ki fenli bi bila yaaba n tie bi kpiagidi, Min den puni ba yaadi yeni.

¹⁰ Fii mani ki yaa caa! Nekanba kan go yaa tie yi fuodikaanu, Kelima yi tuonbiaciandi n cuani yi fala. Yeni de, yaa fala n bia baa cua nekanba.

¹¹ Yaa nibuolu n tie ne bua yaa nilo n tiini, Ki ŋua u faalu ki pua mi faama ki tua: ‹N baa maadi yi po duven maama Leni mi dabiadima yaa maama.›

U Tienu baa guani ki taani Isidayeli yaaba

¹² Jakob puoliŋuani, n go baa ti taani yikuli. N baa taani yinba Isidayeli yaaba, yaaba n sieni. N baa taani yikuli nekanba nani yanloyenli pe yeni, Bi nani yaa yangoli n taani yankpaakaanyendu yeni. Lanyogunu yi baa kpaani li pamanli kpaani.

¹³ Mini U Tienu baa cibi yi yonbidi kpaadidieli li bonli, Ki kua yi liiga yin tagini li bonli ki ña, Yi yonbidi dogu bilinciamu sani ki ban yaa caa. Mini yi bado n baa kua yi liiga, Mini o Diedo n baa tugi yi yuli.»