Mise 1 - U TIENU MAAMA TILI 2013

Yaa buudi n jagi Isidayeli leni Juda diema po 1—3

¹ O Diedo n doagidi yaa maama Mise po, Moleseti dogu yua, Juda badiba Yotam, Akasi leni Esekiasi bala yogunu. O den laa yaala n baa ti tieni Samari leni Jerusalemi dogi.

U Tienu baa bu o niba bi tuonbiadi po

² Yinba i nibuoli kuli, cengi mani! Ki tinga, fini leni yaala n ye a niinni kuli, Diadi a tubili ki cengi bonŋanla. Li Miali Diedo U Tienu yua n ye O kaangagidiŋamu nni, Baa tua siedi yi tuonbiadi po.

³ Diidi mani, o Diedo ñani o diegu nni Ki jiidi ki cuoni a juana yula po.

⁴ O ŋmaadi a juana ke a nandi Nani ti sindi n yen nandi U mu kani maama yeni, Ki tiini ti joaloandi nni Nani yaa ñima n tiini ki ji li juali yeni.

⁵ Lani kuli baa tieni kelima Jakob Puoliŋuani biadima po. Lani kuli baa tieni kelima Isidayeli Yaaba tuonbiadi po. Jakob puoliŋuani yiema ŋoadi ŋmenba? Laa tie Samari ka yo? Juda yaaba buŋoadima ŋoadi ŋmenba? Laa tie Jerusalemi ka yo?

⁶ Lani yaa po, o Diedo yedi: «N baa teni Samari dogu n tua diegbengu, N baa teni wun tua ban baa ŋuu Duven tiidi naankani. N baa pieni ki lu Samari tana kuli Ku joaloangu nni, Ki mudi u dogu hali ki ban nandi a tanpuuna.

⁷ N baa teni ban mudi ban den kpie yaa buli, Ki buoni bi niba n den puni i buli yeni yaa paabu kuli u mu nni. N baa bolini bi buli kuli, kelima bi den baa yi A budiena puoconcona panpaani nne. Bi go baa taa yini yo ki pa bi conconma po.»

Fala baa Jerusalemi

⁸ Mise go den yedi: «Lani n teni ke n baa mua ki figindi, N baa cuoni taapiena leni mubima, Ki doagidi n paboanli. N baa yaa mua ki tangi nani i tanboe yeni. N baa duni ki kpaani nani ti tataadi yeni.

⁹ Samari poagilima bia hali boncianla Ke bi kan fidi ki buu ma. Mi tandi ki pundi hali Juda diema po, Ki kua Jerusalemi, n niba n ye yaa dogu nni.

¹⁰ Mua mani yinba Juda yaaba, ki da pa li laabaalo mo Gati nni. Yinba Beti-Leafila dogu yaaba, doagidi yi paboanli, Ki yaa bilini mi tama nni.

¹¹ Yinba Safiri dogu yaaba, Gedi mani ti yonbidi mi mubima leni i fe nni. Tisaanani dogu yaaba kan go tuo ki ña kelima ti jawaandi po. Beti-Haetiseli dogu yaaba paboanli Teni ke yi kan baa bi todima.

¹² Maloti dogu yaaba digibi ki jie bi miana po, Kelima fala ñani o Diedo kani ki jiidi, Ki pundi hali Jerusalemi buliñoana kani.

¹³ Lakisi dogu yaaba, doali mani yi toateliti, Kelima yinba n den kuani Siyon yaaba ti tuonbiadi nni. Isidayeli niyiekaaba moko den ye a yaa kane.

¹⁴ Li tie lani yaa po yo ke yinba Juda yaaba Kan go yaa die Moleseti-Gati dogu. Akisibi baa boandi Isidayeli badiba, Ban den dugi ke bi baa baa mi todima yaaba yaa kani.

¹⁵ Yinba Madesa dogu yaaba, N baa teni nitoaba n diedi yi. Isidayeli yaaba baa sani leni bi kpiagidi kuli, Ki ban wuoni Adulami dogu nni.

¹⁶ Yinba Juda yaaba, kuo mani yi yula Kelima li paboanli cuo yi yi bibuadimu po. Teni mani yi yula n pidi nani o yobilo yeni, Kelima yi bila caa ti yonbidi ki baa foagidi leni yi.»