Matie 9 - U TIENU MAAMA TILI 2013

Jesu paagi yaa joa yaa gbanandi n kpe

¹ Jesu den kua ku ñinbiagu nni, ki duodi mi ñincianma ki guani o dogu po.

² Lanyogunu bi den cuani o kani, yua yaa gbanandi n kpe ke o dua ku kaagu po. Jesu n den laa bi dandanli, o den yedi yua yaa gbanandi n kpe: «Paagi a pali, n bijua, a baa a tuonbiadi sugili.»

³ Lane ke li bali maama banda, bi tianba den maliti bi yama nni ki tua: «O naa joa sugidi U Tienu.»

⁴ Jesu den bandi ban maliti yaala, ki yedi: «Be n teni ke yi maliti yaala n bia yi yama nni?

⁵ Be n dingi ki cie ki yedi: ‹A baa a tuonbiadi sugili› bi ki yedi: ‹Fii ki yaa cuoni?›

⁶ N bua yin bandi ke o Joa Bijua pia li bali ŋanduna nni, ki baa fidi ki pa bi niba bi tuonbiadi sugili.» Lani, o den yedi yua yaa gbanandi n kpe yeni: «Fii ki taa a kaagu ki yaa kuni.»

⁷ O joa yeni den fii ki ñani ki ban kuni.

⁸ Ku niligu n den laa lani, ti jawaandi den cuo ba, ke bi kpiagi U Tienu leni wan puni bi nisaaliba laa paalu buolu.

Jesu yini Matie

⁹ Jesu n den fii lankani ki suagi liiga, o den laa ban yi yua Matie ke o ka o tuonli kani ki gaani li lubili. O den yedi o: «Ŋoadi nni.» Matie den fii ki ŋoadi o.

¹⁰ Jesu n den kaa Matie diegu nni u saajekaanu kani, bi lubigaaba leni i tagibiadi danba kuli den cua boncianla, ki taani leni o ŋoadikaaba, ki kaa ki di leni o.

¹¹ Farisieninba n den laa lani, bi den yedi o ŋoadikaaba: «Be yaa po ke yi canbaa di leni bi lubigaaba leni i tagibiadi danba?»

¹² Jesu den gbadi ki yedi ba: «Yaaba n pia laafia ka bua lotoli, ama a yiama.

¹³ Gedi mani ki ban bandi yaa maama n tie ne bundima: ‹Mi ninñingbadima n mani n po, laa tie a pada ka.› Mii cua ki baa yini yaaba n tiegi ka, ama ti tuonbiadi danba.»

Mi ñoalolima maama leni kpanjatoama

¹⁴ Jan ŋoadikaaba den cua Jesu kani ki yedi o: «Be yaa po ke tinba leni Farisieninba yen luo bu ñoabu, ke a yaa ŋoadikaaba wani naa luo?»

¹⁵ Jesu den guani ki yedi ba: «O puocaano calo danlinba baa gaa lede ki biidi bi pala wan da ye leni ba li puocaali nni yaa yogunu? Ama a dana kpendi ke bi baa cuo o puocaano calo ki ñani o bi siiga. Lanyogunu, bi baa loli bu ñoabu.»

¹⁶ O go den yedi: «Niloba kan taa cabipanli ki biini li liadikpeli, kelima li cabipanli baa dadi li bonkpeli, lan padi ki pugini.

¹⁷ Bi kan didi taa o duvenpaano ki piagi ti dayuakpedi nni, kelima o yaa pudi yaa yogunu, ti dayuakpedi baa padi, duven n wuli, ti dayuadi mo n bodi. Ama bi yen piagi o duvenpaano ti dayuapandi nni, ke duven leni ti dayuadi kuli n yaa ye.»

Jesu pia u paalu ki cie u yianu leni mi kuuma

¹⁸ Jesu n den maadi leni ba yeni, bi yudanba siiga nni yendo den cua ki gbaani o nintuali ki yedi: «N bisalo kpe moala moala ne, ama ŋan cua ki ban maani o po a nii, o baa faadi.»

¹⁹ Jesu den fii ki ciani o, wani leni o ŋoadikaaba.

²⁰ Lanyogunu, yaa pua yaa soama n den wuliti hali piiga n binalie den cua ki nagini o puoli po ki sii o liadicuadi,

²¹ kelima o den tua o yama nni: «N yaa li baa ki sii o liadili bebe, n baa paagi.»

²² Jesu den jigidi ki laa o ki yedi: «Paagi a pali, n bisalo, a dandanli paagi a.» Lanyogunu, o pua yeni den paagi cain.

²³ Jesu den pundi ki kua o yudaano yeni deni. Wan den sua ke ti baantiadi cua ki biga kuuma po ki piebi mu yelimu, ke bi niba mo tiendi ku fuugu, o den yedi:

²⁴ «Ña mani, kelima ki bonpuoga na naa kpe ka, o goa yo.» Lani yaa po, bi den ñuadi o.

²⁵ Wan den ñani bi niba kuli, o den kua ki biga n dua naani, ki cuo o nuu ke o fii.

²⁶ Laa laabaalo yadi mi diema yeni niinni kuli.

Jesu noadi juamalie

²⁷ Jesu n den fii lankani ki suagi liiga, juamalie den ŋua o ki tangi: «Davidi Bijua, gbadi ti po mi ninñima!»

²⁸ Jesu n den kua li dieli nni, a juama yeni den cua o kani. Jesu den buali ba: «Yi daani ke n baa fidi ki tieni yi po yin miadi yaala?» Bi den guani ki yedi o: «Mm, ti Daano.»

²⁹ Lani, o den sii bi nuni ki yedi: «Lan tieni yi po nani yin daani maama.»

³⁰ Lanyogunu, bi nuni ji den nua. Jesu den teni ba li ñoamabonli ki yedi: «Fangi mani yi yula ke oba n da bandi.»

³¹ Ama bi den ñani ki kpaani o yeli laa diema nni kuli.

Jesu deli ki ñani o muulo po ki cicibiadiga

³² Laa jaliediba n den fii ki ñani, bi niba den cuani Jesu kani ki cicibiadiga daano ke o tie muulo.

³³ Jesu n den deli ki ñani ki cicibiadiga yaa yogunu, o muulo yeni den yaadi ki maadi. Li den lidini yaa niba n taani likani, ke bi tua: «Ti daa bi laa li naa bonla Isidayeli diema nni.»

³⁴ Ama Farisieninba wani den tua: «Mu cicibiadimu bado n puni o u paalu ke o deli ki ñandi mu cicibiadimu bi niba niinni.»

Mi ninñima cuo Jesu ku niligu po

³⁵ Jesu den gaandi i dociami leni i dowaali nni kuli, ki bangi U Tienu maama li bali maama bangima diena nni, ki wangi U Tienu diema Laabaaliŋamo, ki paagidi bi niba bi yianbuoli leni bi tadinbuoli kuli po.

³⁶ Wan den diidi ku niligu, mi ninñima den cuo o, kelima bi den coagi. Bi yama mo den yagi nani yaa pe n ki pia yankpaalo yeni.

³⁷ Lani yaa po, o den yedi o ŋoadikaaba: «U jetaagu yabi, bi tuonsoanba mo nan wa.

³⁸ Lanwani, yin mia mani u jetaagu Diedo, wan soani bi tuonsoanba o jetaagu po.»