Matie 8 - U TIENU MAAMA TILI 2013

Jesu cili o tuonli Galile diema nni 8—18 Jesu ŋanbi o gbaado

¹ Jesu n den jiidi li juali po, bi niba boncianla den ŋua o.

² O gbaado den cua ki gbaani o nintuali ki yedi: «N Daano, a yaa bua, a baa fidi ki ŋanbi nni.»

³ Jesu den tandi o nuu ki sii o ki yedi: «N bua, ŋanbi.» Lanyogunu o gbaadima den gbeni o po ke o ŋanbi.

⁴ Jesu den yedi o: «Ŋan fangi a yuli ki da yedi niloba liba. Ama, gedi ki ban waani a yuli o kopadiciamo, ki padi Musa n den bili yaa padili, lan tua bi po siedi ke a ŋanbi.»

Jesu paagi minteela kobiga yudaano naacemo

⁵ Jesu n den kua Kafarnawum nni, minteela kobiga yudaano den tuogi o

⁶ ki mia o ki yedi: «N Daano, n naacemo dua ke ti yianwabidi cuo o, ki go koani o boncianla.»

⁷ Jesu den yedi o: «N baa cua ki paagi o.»

⁸ Minteela kobiga yudaano yeni den guani ki yedi o: «N Daano, mii pundi ŋan kua n diegu nni, maadi mayenma bebe, n naacemo baa paagi.

⁹ Mini yua ke toaba die nni, nmoko pia min die yaa toatieba. N yen yedi one: ‹Gedi,› wan gedi, ki yedi oyua mo: ‹Cua na,› wan cua. N yen yedi n naacemo: ‹Tieni line,› wan tieni.»

¹⁰ Jesu n den gbadi laa maama, li den paki o, ke o yedi yaaba n ŋua o: «N waani yi i moamoani, baa yinba Isidayeli yaaba siiga, n daa laa yaa dandancianli n tie ne buolu.

¹¹ N waani yi i moamoani ke bi niba boncianla baa ña puoli leni nintuali kuli, ki cua ki taani ki kali leni Abalahama, Isaaka leni Jakob, u saajekaanu kani tanpoli diema nni.

¹² Ama bi baa lu yaaba n bi baa yaa tie tanpoli diema yaaba yeni, niinpo li biigicianli nni, a bubula leni mi ñincegima n baa ye naankani.»

¹³ Li yaa puoli, Jesu den yedi minteela kobiga yudaano: «A kuni, lan tua a po nani ŋan daani maama!» Lanyogunu liga o naacemo den paagi.

Jesu paagi a yiama boncianla

¹⁴ Jesu den gedi Pieli deni ki sua ke Pieli cuadinaa dua leni ti gbananbiendi.

¹⁵ Jesu den sii o nuu ke o gbananbiendi kagidi o po, ke o fii ki gaa o cangu.

¹⁶ Ku yenjuaboandigu, bi den cuani Jesu kani, cicibiadimu danba boncianla. O den maadi bebe ki deli ki ñani mu cicibiadimu yeni, ki go paagi a yiama kuli.

¹⁷ O den tieni yeni ke o saawalipualo Esayi n den maadi yaa maama n tieni: Wani o ba n den taa ti tadingu, Ki tugi ti yiani.

Yaaba n bua ki ŋoadi Jesu

¹⁸ Jesu n den laa ke ku niligu lindi o, o den waani o ŋoadikaaba ban duodi ki gedi napo yaa boanjaali.

¹⁹ Li bali maama banda siiga yendo den cua o kani ki yedi o: «Canbaa, n baa yaa ŋua ŋa ŋan caa naani kuli.»

²⁰ Jesu den guani ki yedi o: «I coli pia i fali, ti bonyugiditi mo pia a tiana, ama o Joa Bijua wani naa pia wan baa yaa dua naani.»

²¹ O ŋoadikaaba siiga nitoa den yedi o: «N daano, pa nni u sanu min da kpa gedi ki ban piini n baa no.»

²² Jesu den guani ki yedi o: «Yaa ŋua nni, ki cedi bi tinkpiba n piini biyaba.»

Jesu duani ku tafaaciangu

²³ Jesu den kua ku ñinbiagu nni ke o ŋoadikaaba ŋoadi o.

²⁴ Ban den ye mi ñincianma nni, ku faabiadigu den fii ke a ñinguona fii ki baa milini ku ñinbiagu. Ama Jesu wani den dua ki goa.

²⁵ O ŋoadikaaba den nagini ki fundi o ki yedi: «Ti Daano, fii ki faabi ti, ke ti baa bodi.»

²⁶ O den yedi ba: «Be n teni ke yi jie nanda, yinba yaaba yaa dandanli n ki fuu?» Lanwani, o den fii ki sedi ki funi leni ku faagu leni mi ñincianma, ke likuli duani salam.

²⁷ Ti jawaandi den cuo o yegininlieba kuli ke bi yieni biyaba: «O tie ŋme yo, ke ba ku faagu leni mi ñincianma kuli tuo ki tieni wan yedi yaala?»

Jesu deli ki ñani mu cicibiadimu nibilie niinni

²⁸ Jesu n den pundi napo yaa boanjaali, Gadala yaaba dogu tinbianu nni, mu cicibiadimu danba bonbilie den ñani a takula po ki tuogi o. Bi den bia boncianla hali ke niloba kan den tuo ki tagini lipo sanu.

²⁹ Bi den tiani o po: «Be n ye tinba leni fini siiga, U Tienu Bijua? Naani a cua ne ki baa duoli ti ke u yogunu daa pundi yo?»

³⁰ Li den sua ke u duokuliciamu nagi likani ki gbi i moajiini.

³¹ Mu cicibiadimu den miadi Jesu ki tua: «A yaa deli ti, ŋan cedi tin gedi ki ban kua u duokulu na niinni.»

³² O den yedi mu: «Gedi mani.» Mu den ñani bi jaba yeni niinni ki ban kua i duoli nni. Lani, u duokulu kuli den digi mi joayidima po ki baa mi ñincianma nni ki bodi lienni.

³³ Yaaba n den kpaa ba den sani ki gedi ki ban waani u dogu po yaala n tieni kuli leni yaala n tieni mu cicibiadimu danba.

³⁴ Lane, u dogu nni yaaba kuli den ñani ki baa tuogi Jesu. Ban den laa o, bi den mia o ke wan ña bi tinga nni.