Matie 7 - U TIENU MAAMA TILI 2013

Ŋan da ja ti buudi

¹ Yin da ja ti buudi, ke U Tienu n da ti jia yimo yaa buudi.

² U Tienu baa bu leni yi nani yin bu leni yi nisaalilieba maama. O go baa taa yin biigidi nitoaba po leni yaa bonbiigikaala ki biigi yimo yaa po.

³ Be n teni ke a nua yaa muagu n ye a lielo nunbu nni, ki naa nua yaa dajenli n caa a yaabu nni?

⁴ Li gaa lede ke a baa yedi a kpiilo: ‹Cedi min ñani a po yaa muagu n ye a nunbu nni, ke li dajenli nan caa a yaabu nni?›

⁵ Fini palalie daano, ŋan kpa ñani yaa dajenli n caa a yaa nunbu nni. Lani, a baa fidi ki le bonŋanla ŋan baa ñani ku muagu yeni maama a lielo yaabu nni.

⁶ Da taa mani yaala n gagidi ki ŋani ki teni i sangbanli, ke ban da ti jigidi ki toadi toadi yi. Da taa mani yi laani, yii yaa dunga n pa ki lu i duoli, ke ban da ti ŋmaa ki piini yi.

Yaa miadi mani U Tienu

⁷ Mia mani, bi baa pa yi, lingi mani, yi baa le. Pua mani bu buliñoabu kani, bi baa luodi yi po.

⁸ Yua n mia kuli baa baa, yua n lingi kuli, o baa le, bi baa luodi yua n pua bu buliñoabu kani, ki bua ki kua kuli po.

⁹ Yi siiga, ŋme yaa biga n baa mia o dupen, wan teni o li tanli?

¹⁰ Bi o baa mia o o jamo, wan teni o o wa?

¹¹ Yinba yaaba n bia yaa bani ki pa yi bila li bonŋanla, laa pia kuli tama ke yi Baa yua n ye tanpoli baa pa yaaba n mia o li bonŋanla.

¹² Lani yaa po, yin bua bi niba n tieni yi po yaala kuli, yimo n tieni la bi po. Lani n tie li bali maama leni bi saawalipuaba kuli bangima.

Yaa buliñoabu n miabi

¹³ Kua mani yaa buliñoabu n miabi kani, kelima yaa buliñoabu n pia leni yaa sanu n pia kuli caa mi bodima po, yaaba n tagi lankani mo n yabi.

¹⁴ Ama yaa buliñoabu n miabi leni yaa sanu n miabi kuli caa yaa miali n kan gbeni kani, yaaba n laadi laa sanu mo naa yabi.

Bu tibu leni bu bonluonkaala

¹⁵ Fangi mani yi yula leni bi saawalipua-faadanba. Bi kpendi yi kani ki dingi nani i pe yeni, ama moamoani po, bi tie nani yaa fuasangbanbiadi n bua ki bolini yi yeni.

¹⁶ Yi baa bandi ba bi bontienkaala kane. Naani yi baa sobidi i cabi ku konkongu po? Bi ki sobidi a kankana a kongoaba po?

¹⁷ Yaa tibu n ŋani kuli baa luoni yaa bonluonkaala n ŋani, yaa tibu n ki ŋani mo baa luoni yaa bonluonkaala n ki ŋani.

¹⁸ Yaa tibu n ŋani kan fidi ki luoni yaa bonluonkaala n ki ŋani, yaa tibu n ki ŋani mo kan fidi ki luoni yaa bonluonkaala n ŋani.

¹⁹ Yaa tibu n ki luoni yaa bonluonkaala n ŋani kuli, bi baa pedi bu ki lu u mu nni.

²⁰ Li tie bi bontienkaala kane ke yi baa bandi ba.

Mii bani yi

²¹ Yaaba n tua nni: ‹O Diedo, o Diedo,› bikuli ka baa kua tanpoli diema nni, se yaaba n tiendi n Baa yua n ye tanpoli yaa yanbuama.

²² Li bujiali daali, bi niba boncianla baa yedi nni: ‹O Diedo, o Diedo, tii den wangi U Tienu maama a yeli po ka? Tii den deli mu cicibiadimu a yeli po ka? Tii go den tiendi mi bancianma boncianla a yeli nni ka?›

²³ Lane n baa kadi ki yedi ba: ‹Kalam, mii bani yi. Fuadi mani n kani, yinba yaaba n tiendi mi biadima.›

A dielieda

²⁴ Lani yaa po, yua n gbadi min maadi yaa maama na, ki tiendi man yedi yaala, o baa yaa tie nani yaa yanfuodaano n den maa o dieli ku tangu po.

²⁵ Ki taaga den mini, a ñingola den puubi, ku tafaagu mo den figi ki pua laa dieli, ama lii den baa, kelima li den puu ku tangu po.

²⁶ Ama yua n gbadi min maadi yaa maama na, ki naa tiendi man yedi yaala, o baa yaa tie nani yaa yanluodaano n maa o dieli mi tanbiima nni.

²⁷ Ki taaga den mini, a ñingola den puubi, ku tafaagu den figi ki pua laa dieli, ke li den baa ki mudi mudi.»

Jesu bali

²⁸ Jesu n den maadi laa maama kuli ki gbeni, ku niligu den ye leni li pakili kelima o bangima po.

²⁹ O den bangi nani yua n pia li bali yeni. Waa den bangi nani li bali maama banda yeni ka.