Matie 6 - U TIENU MAAMA TILI 2013

Mi ŋanma tienma

¹ Fangi mani yi yula ki da tiendi yi tuonŋama asala nni ke bi niba n le. Yi yaa tiendi yeni, yi kan baa panpaaniba kuli yi Baa yua n ye tanpoli kani.

² Lanwani, a yaa tieni mi ŋanma, ŋan da piebi kakaci nani palalie danba n tiendi maama li bali maama bangima diena nni leni i sani nni, ke bi niba n kpiagi ba. N waani yi i moamoani, bi baa bi panpaani n yeni.

³ Ama a yaa tieni mi ŋanma, da cedi a ganu n bandi a jienu n tiendi yaala,

⁴ ke a ŋanma n yaa tiendi ŋasiili nni. A Baa yua n nua ŋasiili nni n baa guani a la.

Jesu n yedi yaala i jaandi po

⁵ Yi yaa jaandi, yin da tie nani palalie danba yaaba n bua ki yaa se li bali maama bangima diena nni leni a sankada nni ki jaandi, ke bi niba n le. N waani yi i moamoani, bi baa bi panpaani n yeni.

⁶ Ama fini, a yaa baa jaandi, kua a dieli nni ki luoni a buliñoabu, ki jaandi a Baa yua n ye likani ŋasiili nni. Wani a Baa yua n nua ŋasiili nni n baa guani a la.

⁷ Yi yaa jaandi, yin da figili mi maama fanma fanma, nani bi nilanba n tiendi maama. Bi tama ke U Tienu baa cengi ba kelima bi macianma po.

⁸ Da tiendi mani nani bani, kelima yi Baa U Tienu bani yin luo yaala hali ke yi daa mia o.

⁹ Diidi mani yin baa yaa jaandi maama: Ti Baa yua n ye tanpoli, Teni bi niba kuli n bandi ke a gagidi ki ŋani.

¹⁰ Teni a diema n cua, A yanbuama mo n tieni ki tinga po, Nani man tiendi tanpoli po maama.

¹¹ Pa ti yaa jiema n baa dagidi ti dinla.

¹² Tieni sugili ti tudima po Nani timoko n tieni sugili yaaba n tudi ti po maama yeni.

¹³ Da tuo tin baa mi tulinma nni, Ama ŋan gaa ti o Biado kani.

¹⁴ Yi yaa puni yaa niba n tudi yi po sugili, yi Baa yua n ye tanpoli mo baa pa yi sugili.

¹⁵ Ama yi yàá puni bi niba sugili, yi Baa moko kan pa yi sugili yi yaa tagili po.

Jesu n yedi yaala mi ñoalolima po

¹⁶ Yi yaa luo bu ñoabu yaa yogunu, da biidi mani yi nunmu nani palalie danba, yaaba n biidi bi nunmu ki baa waani bi niba ke bi luo bu ñoabu yeni. N waani yi i moamoani, bi baa bi panpaani n yeni.

¹⁷ Ama fini, a yaa luo bu ñoabu, ŋan fa a nunga ki sogi tulale,

¹⁸ ke bi niba n da bandi ke a luo bu ñoabu. Ama a Baa yua n ye ŋasiili nni bebe n yaa bani. Wani a Baa yua n nua ŋasiili nni n baa guani a la.

Tanpoli ŋalimani

¹⁹ Da biliti mani yi ŋalimano ŋanduna nni, ti lulugidi leni i tantonmoani n baa yaa bolindi naankani, a suuda n baa kua ki su naani.

²⁰ Ama yin yaa biliti yi ŋalimano tanpoli po, ti lulugidi leni i tantonmoani n kan bolini naankani, a suuda mo n kan kua ki su naankani.

²¹ Yi ŋalimano n ye naankani, yi yantiana mo baa yaa ye lankane.

Ti gbanandi yenma

²² Bu nunbu n tie ti gbanandi fidisanga. Lanwani, a nunbu yaa ŋani, a gbanandi kuli baa yaa yieni bonŋanla.

²³ ama a nunbu yàá ŋani, a gbanandi kuli baa yaa ye li biigili nni. Yaa yenma n ye a niinni yaa tie biigili, laa biigili baa yaa yabi boncianla.

A kan fidi ki yaa tuuni canbaanba lie po

²⁴ Oba kuli kan fidi ki yaa tuuni canbaanbilie po, kelima o yàá baa nani o canbaankpialo ki bua o canbaanlielo, o nan baa yaa taabi o kpialo ki fali o lielo wani. Yi kan fidi ki yaa taa ki tuuni U Tienu leni ŋalimani po.

Dugi U Tienu po

²⁵ Li tie lani yaa po ke n yedi yi, da yagi mani yi yama yi miana yema po, li bonjekaala leni li bonñokaala po leni yi gbanandi bonyiekaala po. Yii bani ke li miali cie mi jiema, ke ti gbanandi mo cie ti tiayiekaadi?

²⁶ Diidi mani ti bonyugiditi, baa coagi, baa yendi, baa wuo ki kuodi liba a buana nni. Ama yi Baa yua n ye tanpoli n dindi ba. Yii bani ke yi pia mayuli ki cie ti bonyugiditi?

²⁷ Yi siiga ŋme yaa yanyagidi po n baa teni wan fidi ki foagidi o miali dana ba waamu?

²⁸ Lanwani, be yaa po ke yi bangi li bonyiekaala po? Diidi mani mi moapuuma n ye maama. Maa tuuni, maa pia gaali,

²⁹ ba yeni, n yedi yi ke ba o bado Salomon leni o kpiagiciandi kuli, waa den bobi ki pundi mi siiga ba yenma.

³⁰ U Tienu yaa bobindi yaa muadi n ye ku muagu nni dinla, ke bi baa fa ki taa ti ki cuoni u mu u fanu nni, laa pia kuli tama ke o baa yieni yi mo, yinba yaaba yaa dandanli n ki fuu. Yeni ka?

³¹ Lani yaa po, da yagini mani yi yama ki tua: ‹Ti baa je be? Ti baa ño be? Ti baa yie be?›

³² Laa bonla kuli tie yaaba n ki bani U Tienu n lingi yaale. Yi Baa yua n ye tanpoli bani ke laa bonla kuli tie yi po tiladi.

³³ Yin kpa lingi mani U Tienu diema leni o yaa teginma, lani, laa bonla kuli baa yuandi ki pugini yi po.

³⁴ Lanwani, da yagini mani yi yama saala po, kelima saala baa yaa pia o yanyagidi o yuli po. Daali kuli pia li yaa fala, ke li dagidi.