Matie 5 - U TIENU MAAMA TILI 2013

Jesu n bangi yaala li juali po 5—7

¹ Jesu n den laa ku niligu, o den doni li juali po. Wan den kali, o ŋoadikaaba den nagini o kani.

² O den bangi ba, ki yedi:

Li pamanmoanli

³ «Li pamanli ye leni yaaba n tie luoda bi pala nni, kelima tanpoli diema tie bi yaame.

⁴ Li pamanli ye leni li yumiinli danba, kelima ki tinga baa tua bi biinu.

⁵ Li pamanli ye leni yaaba n pia li pabiidili, kelima bi baa diedi ki tinga.

⁶ Li pamanli ye leni mi teginma koma leni mi ñuñuunu n pia yaaba, kelima bi baa guo.

⁷ Li pamanli ye leni mi ninñingbadima danba, kelima bi baa gbadi bi po mi ninñima.

⁸ Li pamanli ye leni bi papiendanba, kelima bi baa le U Tienu.

⁹ Li pamanli ye leni mi yanduanma danba, kelima bi baa yini ba U Tienu bila.

¹⁰ Li pamanli ye leni ban wangi yaaba fala kelima mi teginma po, kelima tanpoli diema tie bi yaame.

¹¹ Li pamanli ye leni yi, bi niba yaa sugidi yi, ki wangi yi falabiado ki maadi yi po mi mabiadima kelima n po.

¹² Yin mangi mani yi pala ki yaa ye leni li pamancianli, kelima yi panpaani baa yaa yabi tanpoli po. Bi niba den wangi bi saawalipuaba yaaba n den ye ke yi daa ye, o falabiado yene.

Mi yaama leni mi yenma kpanjama

¹³ Yinba n tie mi yaama ŋanduna po. Mi yaama yaa ti luo mi manu, bi baa taa be ki go mangi ma? Maa go pia fuomiba, se ban lu ma niinpo bi niba n ŋmaa ma.

¹⁴ Yinba n tie mi yenma ŋanduna po. Yaa dogu n ye li juali yuli po, kan fidi ki wuoni.

¹⁵ Bi kan go cuoni ki fidisanga mo, ki taa li sancianli ki ŋoagini ka, ama bi baa tuani ka u fidisantuankaanu, kan yendi yaaba n ye li dieli nni kuli po.

¹⁶ Lani, yin cedi yi yenma n yendi bi niba kani, ke ban le yi tuonŋama ki kpiagi yi Baa yua n ye tanpoli po.

Jesu n yedi yaala li bali maama po

¹⁷ Yin da tama ke n cua ki baa bolini li bali maama leni bi saawalipuaba maama ka. Mii cua ki baa bolini ma, ama n cua ki baa Kuani ma.

¹⁸ N waani yi i moamoani, hali tanpoli leni ki tinga n baa yaa ye, ba yaa dianyendu n wa ki cie i diani nni, kan ña li bali maama nni hali likuli n baa tieni ki dudi.

¹⁹ Yua n miidi li bali maama nni ba yaama n wa ki cie siiga mayenma, ki go bangi bi niba ban yaa tiendi yeni, o baa tua yua n wa ki cie tanpoli diema nni. Yua mo n tiendi man bili yaala ki go bangi ma, o baa yaa tie niciamo tanpoli diema nni.

²⁰ N waani yi, yi teginma yaa cie li bali maama banda leni Farisieninba, yi kan kua tanpoli diema nni.

Jesu n yedi yaala li pabienli po

²¹ Yi gbadi ke bi den yedi bi nikpiaba: ‹Ŋan da kpa o nilo, yua n kpa o nilo, bi baa bu o buudi ki cuo o.›

²² Ama mini n yedi yi, yua n bieni o pali o lielo po kuli, li pundi ban bu leni o, yua n yedi o lielo: ‹O yanpiidaano na›, li pundi ke yi cancantieba taancianli n cuo o. Yua n yedi o lielo: ‹O yanluodaano na,› li pundi ban cuo ki kuani o ku fantanbuogu nni.

²³ Lanwani, a yaa cua li padibinbinli kani ki baa pa a paabu, ki tiadi likani ke a lielo pia leni a maama,

²⁴ ŋan cedi a paabu likani, ki kpa gedi ki ban mangi leni a lielo yeni, ki yuandi ki guani ki pa U Tienu a paabu.

²⁵ A koanginka yaa cuo ŋa ki caani a li bujiali kani, ŋan mangi leni o tontoni ki daa pundi, ke wan da ti teni o bujialo n cuo ŋa ki teni a sandalima, wan kuani a li kpaadidieli nni.

²⁶ N waani a i moamoani, a kan ña lienni kali a ban pani ki gbeni, kaa sieni ba tanga.

Jesu n yedi yaala mi conconma po

²⁷ Yi gbadi ke bi den yedi: ‹Ŋan da conbi.›

²⁸ Ama mini n yedi yi, ke yua n noanli pua ke o yama kua o niinni, o conbi leni o o pali nni no yo.

²⁹ A jiennunbu yaa tie a po li tingbali bonla, ŋan logidi bu ki lu foagima, kelima a gbanan-buoyendu yaa bodi, li baa ŋani a po ki cie ban lu a gbanandi kuli ku fantanbuogu nni.

³⁰ A jienu yaa tie a po li tingbali bonla, ŋan jia ku ki lu foagima, kelima a gbanan-buoyendu yaa bodi, li baa yaa ŋani a po ki cie ban lu a gbanandi kuli ku fantanbuogu nni.

Jesu n yedi yaala li puoñanli po

³¹ Bi go den yedi: ‹Yua n ñani o pua, wan teni o li puoñatili.›

³² Ama mini n yedi yi, ke yua n ñani o pua, ke laa tie mi conconma po ka, o teni ke laa pua tua puoconconli. Yua n taa puoñaka mo, o conbi.

Jesu n yedi yaala yaaba n polini po

³³ Yi den gbadi ke bi waani bi nikpiaba: ‹Ŋan da poli ki niani ki naa tieni. Ama ŋan poli ki niani o Diedo ke a baa tieni yaala, ŋan tieni la.›

³⁴ Ama mini n yedi yi: Yin da poli baa leni tanpoli, kelima li tie U Tienu bali kalikaanu,

³⁵ ba leni ki tinga kelima ki tie o taaŋmaakaanu, ba leni Jerusalemi kelima li tie o badiciamo dogu.

³⁶ Ŋan da poli leni a yuli, kelima a kan fidi ki teni ba yuyengu n pendi, yaa ka kun boandi.

³⁷ Yi yaa yedi: ‹Mm, lan yaa tie mm.› Yi yaa yedi: ‹Aa-a mo, lan yaa tie aa-a.› Yaala n pugini kuli ji ñani o Biado kane.

Jesu n yedi yaala li pantuuli po

³⁸ Yi den gbadi ke bi yedi: ‹Nunbu n baa pa nunbu panli, ñinli mo n baa pa ñinli panli.›

³⁹ Ama mini n yedi yi, yin da yie o nibiado po, nilo yaa pabi a a jienkpianu po, ŋan pegidi ki teni o a ganu mo.

⁴⁰ Nilo yaa bua ki yini a ti buudi ki gaa a liadibiga, ŋan teni o a liadicianli mo.

⁴¹ O nilo yaa tieni a u paalu ke ŋan ciani o kilo dajenli, ŋan ciani o dajena lie.

⁴² Pa yua n mia ŋa, da buli a nunga yua n bua ŋan ledi o po.

Mi buama yibalinba po

⁴³ Yi gbadi ke bi den yedi: ‹Ŋan bua a lielo ki nandi a yibali.›

⁴⁴ Ama mini n yedi yi: Yaa bua mani yi yibalinba, ki yaa jaandi yaaba n faligidi yi po.

⁴⁵ Yeni yi baa yaa tie yi Baa yua n ye tanpoli bila, kelima o yen tendi, ke o yienu pudi bi nibiadiba leni bi niŋanba kuli po, ki yen tendi ke ki taaga mi bi niteginkaaba leni yaaba n ki tiegi kuli po.

⁴⁶ Li yaa tie ke yi bua yaaba n bua yi bebe, yi baa baa be yaa panpaani yo? Bi lubigaaba wani ki tiendi yeni ka yo?

⁴⁷ Yi yaa fuondi yi kpiiba bebe, yi tieni be ke li pia mi paadima? Baa bi nilanba wani ki tiendi yeni ka yo?

⁴⁸ Yin gagidi ki yaa ŋani nani yi Baa yua n ye tanpoli n gagidi ki ŋani maama.