Matie 4 - U TIENU MAAMA TILI 2013

Sutaani tulini Jesu

¹ Lani n pendi, U Tienu Fuoma Yua den gedini Jesu mi fanpienma nni ke Sutaani tulini o.

² Jesu n den loli bu ñoabu dana piinaa leni ñiadi piinaa, mi koma den cuo o.

³ Mi tulinma daano yeni den cua o kani ki yedi o: «A yaa tie U Tienu Bijua ŋan teni a tana na n tua jiema.»

⁴ Jesu den guani ki yedi: «Li diani: O nisaalo kan yaa ye mi jiema bebe po ka, ama o baa yaa ye yaa maama n ñani U Tienu ñoabu nni kuli po.»

⁵ Sutaani den gedini Jesu u dogagidiko Jerusalemi po, ki teni ke o sedi U Tienu diegu yuli po.

⁶ O den yedi o: «A yaa tie U Tienu Bijua, ŋan yugi ki cii tiipo, kelima li diani: ‹O baa teni o malekinba n tebini a ke a taali n da tuudi tanli.› »

⁷ Jesu den yedi o: «Li go diani kaanto: Da biigi o Diedo a Tienu.»

⁸ Sutaani go den gedini o yaa juali n kpedi hali boncianla yuli po, ki waani o ŋanduna diema kuli leni mi kpiagidi,

⁹ ki yedi o: «A yaa gbaani ki kpiagi nni, n baa pa ŋa laa bonla kuli.»

¹⁰ Jesu den yedi o: «Fuadi likani Sutaani, kelima li diani: ‹A baa kpiagi o Diedo a Tienu, ki yaa jaani wani bebe.› »

¹¹ Lane Sutaani den ŋaa Jesu. Lanyogunu malekinba den cua Jesu kani ki tuuni o po.

Jesu gedi Galile diema nni

¹² Jesu n den gbadi ke bi cuo Jan, o den fii ki gedi Galile.

¹³ O den ñani Nasareti ki cua ki ye Kafarnawum dogu nni, yuu n kuu leni mi ñincianma, Sabuloni leni Nefitali buoli yaaba tinmu nni.

¹⁴ O den tieni yeni ke o saawalipualo Esayi n den maadi yaa maama n kua:

¹⁵ «Sabuloni leni Nefitali tinmu yaaba, Mi ñincianma sanu po yaaba, Jurden kandima tinga yaaba, Yinba Galile yaaba bi nilanba,

¹⁶ Yinba yaaba n den ye li biigili nni, Yi laa mi yencianma. Laa yenma yendi bani, Yaaba n den kaa mi kuuma biigili diema nni.»

¹⁷ Lanyogunu Jesu den cili ki wangi o Laabaaliŋamo, ki tua: «Lebidi mani yi pala, kelima tanpoli diema nagini.»

Jesu yini jankpaanbinaa ke bi ŋoadi o

¹⁸ Jesu n den cuoni ki baali Galile ñincianma, o den laa jabilie, Simon ban go yi yua Pieli leni o waalo Andre, ke bi lu i taali mi ñincianma nni, kelima bi den tie jankpaanba.

¹⁹ O den yedi ba: «Ŋoadi mani nni. Nani yin lingi i jami maama, n baa teni yin yaa lingi bi niba moko yeni.»

²⁰ Lanyogunu bi den ŋaa bi taali ki ŋoadi o.

²¹ Jesu den suagi liiga ki go laa Sebede bijaliediba, Jaki leni o waalo Jan. Bi den ye ku ñinbiagu nni leni bi baa Sebede, ki ŋanbidi bi taali.

²² O den yini ba. Lanyogunu bi den ŋaa ku ñinbiagu leni bi baa kuli, ki ŋoadi o.

²³ Jesu den gaandi Galile diema nni kuli ki koa li bali maama bangima diena nni, ki bangi bi niba ki wangi ba U Tienu diema Laabaaliŋamo, ki paagidi bi niba bi yianbuoli leni bi tadinbuoli kuli po.

²⁴ O yeli den ñani Siiri diema nni kuli. Bi den cuani o kani i yianbuoli boncianla, mi yianfulima danba, mu cicibiadimu n die yaaba, mi bisinbilima danba leni ti gbanankpiendi danba kuli. O den paagi bikuli.

²⁵ Bi niba boncianla den ŋoadi o. Yaaba n den ñani Galile, Dekapoli, Jerusalemi, Jude leni ba yaa diema n ye Jurden kpenu kandima, bikuli den ŋoadi o.