Matie 3 - U TIENU MAAMA TILI 2013

Jan Batisi saawalo

¹ Lanyogunu, Jan Batisi den kua Jude fanpienma nni ki wangi U Tienu maama,

² ki tua: «Lebidi mani yi pala kelima tanpoli diema nagini.»

³ Jan n tie o saawalipualo Esayi n den maadi yua yaa maama ki yedi: «O nilo kpaani mi fanpienma nni ki tua: ‹Yin bogini o Diedo sanu, Ki naadi mani o sani.› »

⁴ Jan den laa ti yuoyuokobidi tiadi ki ñaagi o ciaga ku gbanñagidigu. O den ŋmani i naaci, ki di ku muagu nni siadi.

⁵ Jerusalemi dogu yaaba, Jude diema yaaba leni yaa dobila n baali Jurden kpenu yaaba kuli, den kpendi o kani.

⁶ Bi den tuodi ki doagidi bi tuonbiadi, ki cedi ke Jan batisi ba Jurden kpenu nni.

⁷ Wan den laa ke Farisieninba leni Sadusieninba boncianla kpendi o kani ke wan batisi ba, o den yedi ba: «Yinba, u waalabi-buolu na, ŋme fandi yi yin sani ki cia U Tienu pabienli yaali n baa cua na?

⁸ Yin yaa tuuni yaa tuona n doagidi ke yi lebidi yi pala.

⁹ Yin da se ki tua yi pala nni: ‹Ti pia Abalahama ke o tie ti yaaja.› N kadi ki waani yi ke U Tienu baa fidi ki teni yaa tana n tie ne n tua Abalahama puoliŋuani.

¹⁰ Ba moala bi caani li yali i tijiini po. Yaa tibu n ki luoni yaa bonluonkaala n ŋani kuli, bi baa pedi bu, ki lu u mu nni.

¹¹ Mini n batisi yi mi ñima nni, ke lan doagidi ke yi lebidi yi pala. Ama yua n ŋua n puoli pia u paalu ki cie nni. Mii pundi ba yua n baa pidi o cacaadi. Wani, o baa batisi yi U Tienu Fuoma Yua leni u mu nni.

¹² O kubi o kaaligu o nuu nni. O baa ŋanbi o jalu cain, ki wodi ki kuodi mi bima li buali nni, ki nan sia mi fenma leni yaa mu n ki pia gbindima.»

Jan batisi Jesu

¹³ Lanyogunu Jesu den ñani Galile ki cua Jurden kpenu kani, ki mia Jan ke wan batisi o.

¹⁴ Ama Jan den bua ki yie ki yedi: «Li bi pundi fine n batisi nni, ke a mo nan cua mini yaa kani?»

¹⁵ Jesu den guani ki yedi o: «Cedi lan yaa tie yeni moala. Lani n tie tin tieni yaala n tiegi kuli.» Lanwani, Jan den tuo.

¹⁶ Wan den batisi o yaa yogunu, Jesu den ñani mi ñima nni. Tanpoli den luodi ke Jesu laa ke U Tienu Fuoma Yua ñani lipo ki ji nani ki kpaajiega yeni ki ti jagini o po.

¹⁷ Lanyogunu u nialu den maadi tanpoli po ki yedi: «One n tie n Bibuadiga, n pali n mani yua yaa po hali boncianla.»