Matie 28 - U TIENU MAAMA TILI 2013

Jesu fiima bi tinkpiba siiga 28 Jesu fii bi tinkpiba siiga

¹ U Tienu fuodima daali n den pendi, a daleleeda cilima daali, ku tiŋaapanpangu Mariyama, Magidala yua leni Mariyama toa den gedi ki baa n le li takuli.

² Lanyogunu, ki tinga den digibi boncianla. O Diedo maleki den ñani tanpoli ki jiidi, ki cua ki bindi yaa tanpabigu n den piigi li takuli buliñoabu ki kali ku po.

³ O kaani kuli den yieni nani mi tañigima yeni, o tiayiekaadi mo den pieni paipai.

⁴ Ti jawaandi den cuo yaaba n guu li takuli, ke bi digibi ki baa ki bili bili nani bi tinkpiba yeni.

⁵ Maleki yeni den yedi bi puoba: «Yinba wani n da jie mani, n bani ke yi lingi Jesu ban den joani yua li dapoanpoanli po.

⁶ Waa go ye ne, kelima o fii bi tinkpiba siiga, nani wan den yedi maama. Cua mani ki le wan den dua naankani,

⁷ ki gedi mani tontoni ki ban waani o ŋoadikaaba, ke o fii bi tinkpiba siiga. O gaa yi liiga ki caa Galile. Yi baa le o lanpo. Lani n tie min waani yi yaala.»

⁸ Ba ke ti jawaandi den pia bi puoba yeni, bi pala den mani boncianla, ke bi jaligi ki ñani li takuli kani, ki sani ki baa n pa o ŋoadikaaba li laabaalo.

⁹ Ban den caa yaa yogunu, Jesu den tuogi ba ki yedi: «N faandi yi.» Bi den nagini ki gbaani o nintuali ki cuo o taana, ki kpiagi o.

¹⁰ Jesu den yedi ba: «Yin da jie mani, gedi mani ki ban waani n kpiiba, ke ban gedi Galile, bi baa n le nni lanpo.»

Yaaba n den guudi li takuli n togidi yaala

¹¹ Bi puoba yeni n den ye u sanu nni yaa yogunu, yaaba n den guu li takuli siiga bi tianba den kua u dogu nni ki ban togidi bi kopadicianba yudanba yaala n tieni kuli.

¹² Bi yudanba den taani leni bi nikpela ki juogi, ki teni bi toatieba i ligi boncianla,

¹³ ki yedi ba: «Yin yedi mani ke o ŋoadikaaba den cua ku ñiagu ki suni o ke yi goa.

¹⁴ Guveneeri yaa bandi, ti baa duani o yama ki teni ke liba kan tieni yi.»

¹⁵ Bi toatieba den gaa i ligi ki ban tieni nani ban waani ba maama. Laa faama den yadi Jufinba siiga, ki baa ki ye hali dinla.

Jesu doagidi o yuli o ŋoadikaaba po

¹⁶ Jesu ŋoadikaaba, bi piiga n niyendiba yeni, den gedi Galile, Jesu n den waani ba yaa juali po.

¹⁷ Ban den laa o, bi den labini ki kpiagi o. Ama bi tianba yama den lengidi, ke baa daani ke li tie wani.

¹⁸ Jesu den nagini ki yedi ba: «U Tienu puni nni u paalu kuli, tanpoli leni ki tinga po kuli.

¹⁹ Lanwani, gedi mani ki tieni i nibuoli kuli nni bi ŋoadikaaba, ki batisi ba Baa, Bijua leni U Tienu Fuoma Yua yeli nni, ki bangi ba ban yaa kubi min den yedi yi yaala kuli.

²⁰ N baa yaa ye leni yi yaa yogunu kuli, hali ŋanduna juodima.»