Matie 27 - U TIENU MAAMA TILI 2013

Bi gedini Jesu Pilati bujiali kani

¹ Ku tiŋaapanpangu, bi kopadicianba yudanba leni Jufinba nikpela kuli den taani ki juogi, ke bi baa teni ban kpa Jesu.

² Bi den loli o, ki gedini o ki ban teni o Pilati yua n den tie guveneeri.

Juda kuuma

³ Juda, yua n den janbi Jesu n den laa ke bi jia wani Jesu buudi, ki kadi ke bi baa kpa o, o den mua ke yàá bi janbi o. O den taa a kujapienpiitaada ki gedini bi kopadicianba yudanba leni a nikpela kani,

⁴ ki yedi: «N tieni ti tuonbiadi ki janbi yua n ki pia tagili.» Bi den guani ki yedi o: «Lani mo nan ŋua ti? Li ŋua fine!»

⁵ Juda den luni i ligi yeni U Tienu diegu nni ki ñani, ki gedi ki ban soadi o yuli.

⁶ Bi kopadicianba yudanba den gandi gandi i ligi yeni ki yedi: «Laa ŋani laa ligi n kua U Tienu diegu ŋalimano nni, kelima li tie mi soama ligi.»

⁷ Ban den juogi, bi den taa laa ligi ki daa o maado kuanu, ke u tua bi canba kupiikaanu.

⁸ Lani yaa po, ke bi yi laa kuanu mi “soawulima kuanu” hali dinla.

⁹ Lani, o saawalipualo Jeremi n den maadi yaa maama den tieni: «Bi den taa kujapiena piitaa, Isidayeli yaaba n den biigi Ki sua ke o dunga pundi maama,

¹⁰ Ki daa o maado kuanu, Nani o Diedo n den yedi nni maama.»

Jesu sedi Pilati nintuali

¹¹ Jesu den sedi guveneeri nintuali. Guveneeri den buali o: «A tie Jufinba bado bi?» Jesu den guani ki yedi: «Fini n yedi yeni.»

¹² Bi kopadicianba yudanba leni a nikpela den kuli o, ama waa den guani liba.

¹³ Lane ke Pilati den yedi o: «Ŋaa gba ban kuliti a yaala kuli po?»

¹⁴ Jesu naa den lebidi o maamiba. Li den paki guveneeri boncianla.

Pilati jia ki kadi ke ban kpa Jesu

¹⁵ Mi Pendima jaanma kuli, guveneeri den maani ki yen faabi kpaadiyenli, ku niligu n mia o wan faabi yua.

¹⁶ Lanyogunu, bi den pia kpaadiyenli, ke bi yi o Barabasi ke bi niba kuli bani o biadima po.

¹⁷ Ku niligu n den taani, Pilati den yedi ba: «Yi bua min faabi yi po ŋme, Barabasi, bi Jesu ban yi yua Kilisiti?»

¹⁸ O den bani ke bi cuo Jesu ki cuani o li bujiali kani, kelima li nunponbiadili po.

¹⁹ Wan da den li kaa o bujiali kaanu, o pua den soani u tondu o kani ki yedi o: «Ŋan da kua o naa niteginka maama nni, kelima yaa ñiagu n pendi na, n laa fala boncianla ti dangidi nni kelima o po.»

²⁰ Bi kopadicianba yudanba leni a nikpela den tundi ku niligu, ke bi mia Pilati wan faabi Barabasi ki teni ban kpa Jesu.

²¹ Guveneeri go den yedi ba: «Bani nibilie siiga yi bua min faabi yi po ŋme?» Bi den guani ki yedi o: «Barabasi.»

²² Pilati den yedi ba: «N nan baa tieni Jesu, ban yi yua Kilisiti mo lede?» Bikuli den guani ki yedi o: «Joani o li dapoanpoanli po!»

²³ Guveneeri den yedi: «O tieni be biadime?» Bi go den tangi ke li pa: «Joani o li dapoanpoanli po!»

²⁴ Pilati n den laa ke o maama ki baa sedima lipo, ke ku fuugu mo pugidi, o den taa mi ñima ki nidi o nii ku niligu nintuali, ki yedi: «Mii pia tagiliba o naa niteginka soawulima nni. Li ŋua yinbe!»

²⁵ Ku niligu kuli den guani ki yedi o: «O soama n baa tinba leni ti bila po!»

²⁶ Lani, Pilati den faabi bi po Barabasi. O den teni ke bi pua Jesu i baliji, ki ŋa o bi nuu nni, ban ban joani o li dapoanpoanli po.

Loma yaaba toatieba ñuadi Jesu

²⁷ Guveneeri toatieba den kuani Jesu wani guveneeri diegu nni wan ja ti buudi naani, ki taani bi cagili kuli ki lindi o.

²⁸ Bi den landi o tiadi, ki golini o bu kpalimoanbu.

²⁹ Bi den taa i konkoni ki piani nani ki badifogiliga yeni, ki cibini o, ki mubini o jienu li kankagili. Bi den gbaandi o nintuali ki ñuadi o nani o tie bado yeni, ki tua: «Ti fuondi a, fini Jufinba bado.»

³⁰ Bi den siini o po ti ñinsandi, ki taa li kankagili ki pua o yuli po.

³¹ Ban den ñuadi ñuadi o yeni ki gbeni, bi den goliti bu kpalibu ki guani ki lani o o yaa tiadi, ki ñani o ki gedini, ki baa n joani o li dapoanpoanli po.

Bi joani Jesu li dapoanpoanli po

³² Ban den caa, bi den tuogi Sireni dogu yua ke o yi Simon, ki tieni o u paalu, ke o bugi Jesu dapoanpoanli.

³³ Bi den pundi ban yi yaa kaanu Goligota, lani n bua ki yedi “ku Yukuokuogu kaanu.”

³⁴ Bi den teni Jesu yaa duven n kali leni yaa ñoagu n to ke wan ño. Ama wan den leni o waamu, waa den ñuni.

³⁵ Ban den joani o li dapoanpoanli po, bi den taa o tiayiekaadi ki toani tiatia ki boagidi ti. [Bi den tieni yeni ke o saawalipualo n den maadi maama n tieni: «Bi den boagidi n tiayiekaadi bi siiga, ki toani tiatia n liadicianli po.]»

³⁶ Lani, bi den kali ki guu o.

³⁷ Bi den kpaa ki tabini, ki yini o yuli po, yaa diani n waani yaala yaa po ke bi cuo o: «One n tie Jesu, Jufinba bado.»

³⁸ Bi den joani sanjiabilie a dapoanpoana po ki taani leni o, yendo o jienu po, oyua mo o ganu po.

³⁹ Bi santagiba den sugidi o, ki fegini bi yula ki tua:

⁴⁰ «Fini yua n baa mudi U Tienu diegu, ki guani ki maa gu danataa, gaa a yuli. A yaa tie U Tienu Bijua, ŋan jiidi li dapoanpoanli po.»

⁴¹ Bi kopadicianba yudanba, li bali maama banda leni bi nikpela kuli den ñuadi o yeni, ki tua:

⁴² «O den gaa nitoaba ki nan kan ji fidi ki gaa o yuli. O yaa tie Isidayeli buolu bado moamoani, wan jiidi li dapoanpoanli po moala ne, lanwani ti baa tuo ki daani o.

⁴³ O dugi U Tienu po. U Tienu yaa bua o moamoani, wan nan gaa o moala tin le, kelima o den tua: ‹N tie U Tienu Bijua yo.› »

⁴⁴ Ban den taani ki joani o leni yaa sanjiaba a dapoanpoana po moko den sugidi o.

Jesu kuuma

⁴⁵ Ki cili u yensiicocolu, li biigili den tieni ki tinga nni kuli, ki yaa caa hali li yenlebidili.

⁴⁶ Li yenlebidili po yeni, Jesu den tiani boncianla: «Eli, Eli, lama sabakitani?» Lani n tie: “N Tienu, n Tienu, be yaa po ke a ŋaa nni?”

⁴⁷ Yaa niba n den ye likani bi tianba n den gbadi, bi den yedi: «O yi o saawalipualo Eli.»

⁴⁸ Tontoni bi siiga nni yendo den sani, ki ban taa u tuogu ki pagini mi ñinmiligima nni, ki fini li kankagili, ki yugidi ki teni o ke wan ño.

⁴⁹ O lieba den yedi: «Cedi mani tin le Eli yaa baa cua ki gaa o.»

⁵⁰ Jesu go den tiani ke li pa, ki fuo ki jiini ki cabi.

⁵¹ Lanyogunu U Tienu diegu nni kpalidoaginkaabu den padi siiga nni, ki cili tanpoli ki ban jiidi hali tinga, ki boagidi kaanilie. Ki tinga den digibi, a tana den yagidi,

⁵² A takula den yaadi, U Tienu nigagidiŋanba yaaba n den kpe siiga, boncianla den fii bi tinkpiba siiga.

⁵³ Bi den ñani a takula nni. Jesu fiima bi tinkpiba siiga puoli, bi den kua u dogagidiko nni ke bi niba boncianla laa ba.

⁵⁴ Minteela kobiga yudaano leni yaaba n den taani leni o ki ji Jesu kuli n den laa mi tindigibima leni yaala n tieni kuli, ti jawaandi den cuo ba boncianla, ke bi yedi: «Moamoani, one den tie U Tienu Bijua yo.»

⁵⁵ Bi puoba boncianla moko den ye likani ki se foagima ki diidi, Jesu n den ñani Galile ke yaaba n ciani o ki todi o o yema po.

⁵⁶ Li den pia bi siiga Mariyama, Magidala dogu yua leni Mariyama yua n den tie Jaki leni Josefi naa leni Sebede bila yaa naa.

Jesu piinma

⁵⁷ Ku yenjuagu, yaa piado n yi Josefi ki tie Alimate dogu yua den cua. Omoko den tie Jesu ŋoadika.

⁵⁸ O den gedi Pilati kani ki ban mia o wan teni o Jesu o tinkpilo. Pilati den yedi ban teni o.

⁵⁹ Josefi den taa o tinkpilo ki bobini o len kpalipanbu,

⁶⁰ ki duani o o takupanli nni, wan den teni ke bi kpiedi yaali ku tangu nni. O den bindi ku tanpabigu ki biini li kuli ñoabu, ki ban kuni.

⁶¹ Mariyama, Magidala yua leni Mariyama toa den ye likani, ki kaa ki tiegi li takuli.

Bi guudi Jesu takuli

⁶² Lan den fii ki faa, lani tie li boginli daali fiifaama, bi kopadicianba yudanba leni Farisieninba den taani ki gedi Pilati kani,

⁶³ ki yedi o: «Ti daano, ti tiadi ke laa boandi daano n da den fo yaa yogunu, o den yedi ke danataa yaa pendi, ke o baa fii bi tinkpiba siiga.

⁶⁴ Lani yaa po, ŋan teni ban yaa guu li takuli hali danataa, ke o ŋoadikaaba n da ti cua ki su o, ki yedi bi niba ke o fii bi tinkpiba siiga. Laa boandiyuami ji baa bia ki cie li bonkpiala.»

⁶⁵ Pilati den yedi ba: «No mani yaaba n baa yaa guu nne. Gedi mani ki ban guudi li takuli yin fidi maama kuli.»

⁶⁶ Bi den gedi li takuli po ki tieni ku tanpabigu yeni po yaa maalima ke o nilo yaa biidi bi baa bandi, ki sieni bi guudikaaba.