Matie 26 - U TIENU MAAMA TILI 2013

Jufinba nikpiaga juogi ke bi baa kpa Jesu

¹ Jesu n den maadi laa maama kuli ki gbeni, o den yedi o ŋoadikaaba:

² «Yi bani ke mi Pendima jaanma sieni danalie, ke bi baa janbi o Joa Bijua, ki teni ban cuo ki joani o li dapoanpoanli po.»

³ Lanyogunu bi kopadicianba yudanba leni Jufinba nikpela, den taani bi kopadicianba bado yua n yi Kayifa luolu nni.

⁴ Bi den jagi ki baa cuo Jesu leni bu nunfanbu, ki teni ban kpa o.

⁵ Ama bi den yedi: «Lan da tieni mi jaanma dana nni, ke ku fuugu n da ti fii bi niba siiga.»

O pua wuli tulale Jesu yuli po

⁶ Jesu den ye Betani, o gbaado Simon deni.

⁷ Wan den kaa u saajekaanu kani ki di, o pua den cua o kani ki kubi yaa tiagu n tie alibati tanli, ke li gbie leni yaa tulale n pia duncianga. O den wuli tulale yeni Jesu yuli po.

⁸ Bi ŋoadikaaba n den laa lani, bi pala den beni, ke bi yedi: «Be yaa po ke o biani yaa tulale n tie ne?

⁹ Bi bi baa fidi ki kuadi laa tulale yaa dunga n yabi, ki taa li ligi ki pa a luoda.»

¹⁰ Jesu den bandi ban maadi yaala ki yedi ba: «Be n teni ke yi yagini o pua yeni yama? Wan tieni n po yaala yeni ŋani.

¹¹ A luoda ye leni yi yogunu kuli, ama mini wani kan yaa ye leni yi yogunu kuli.

¹² Wan wuli laa tulale n gbanandi po yeni, o tieni la ki bogini n piima po.

¹³ N waani yi i moamoani, ban baa waani o Laabaaliŋamo ŋanduna nni naankani kuli, bi baa yaa tiadi ki togidi o pua na n tieni yaala.»

Juda tuo ke o baa janbi Jesu

¹⁴ Li yaa puoli, bi piiga n niliediba siiga yendo, ke bi yi o Judasi Isikarioti, den gedi bi kopadicianba yudanba kani,

¹⁵ ki yedi: «Yi baa pa nni be min janbi o yi po?» Bi den suu o kujapiena piitaa.

¹⁶ Lanyogunu, o den cili ki lingi wan baa baa yaa folu ki janbi Jesu ki teni ba.

Jesu dini mi Pendima jaanjiema leni o ŋoadikaaba

¹⁷ Yaa dupen n ki pia dabinli jaanma cilima daali, bi ŋoadikaaba den nagini Jesu kani ki yedi o: «A bua tin gedi lepo, ki ban ŋanbi mi Pendima jaanjiema?»

¹⁸ O den guani ki yedi: «Kua mani u dogu nni ŋmeŋme deni, ki yedi o: ‹Canbaa yedi: N yogunu nagini, n baa jaani mi Pendima jaanma leni n ŋoadikaaba a yaa dene.› »

¹⁹ Bi ŋoadikaaba den tieni Jesu n yedi ba yaala, ki ban ŋanbi mi Pendima jaanjiema.

²⁰ Ku juogu n den baa, o den kaa u saajekaanu kani leni bi piiga n niliediba.

²¹ Ban den di yaa yogunu, o den yedi: «N waani yi i moamoani, yi siiga nni yendo baa janbi nni.»

²² Bi pala den biidi boncianla, ke yendo yendo kuli yedi o: «N Daano, li tie mini yo?»

²³ O den guani ki yedi: «Yua n taani ki tuuni leni nni ku saatiagu nni n baa janbi nni.

²⁴ O Joa Bijua caa nani lan diani ki bili o po maama. Ama fala baa yaa ye leni yaa nilo n baa janbi o Joa Bijua. Li den baa yaa tu laa joa po bi yàá den mali o.»

²⁵ Juda, yua n den baa janbi o yeni, den yedi: «Canbaa, li tie mini yo?» Jesu den guani ki yedi o: «Fini n yedi yeni.»

O Diedo jiema

²⁶ Ban den di yaa yogunu, Jesu den taa dupen, wan den mia U Tienu seli, o den cabidi cabidi ki teni bi ŋoadikaaba, ki yedi: «Gaa mani ki ŋmani, line n tie n gbanandi.»

²⁷ Lani n pendi, o den taa ki tadiñokaaga, wan den tuondi U Tienu, o den teni ba ki yedi: «Yikuli n ño mani,

²⁸ kelima line n tie n soama, o Ŋantaadipaano yaa soama yaama n baa wuli yaa niba n yabi po, ban baa bi tuonbiadi sugili.

²⁹ N waani yi ke moala liiga n kan go ño duven yua n tie ne hali min go baa ti taani leni yi n Baa diema nni, ki ño o bonpaano yaa daali.»

³⁰ Ban den yini Pisominba, bi den ñani ki gedi Olivie Tiidi juali po.

Pieli baa ti nia ke waa bani Jesu

³¹ Lani, Jesu den yedi ba: «Dinla ñiagu, n baa tua yikuli po li tingbali bonla. Li diani: ‹N baa pua o yankpaalo, o pekulu mo n yadi.›

³² Ama n yaa ti fii bi tinkpiba siiga, n baa gaa yi liiga ki gedi Galile.»

³³ Pieli den guani ki yedi o: «Ba yaala n baa tieni a yaa baa tua tingbali bonla yaaba n sieni kuli po, mini wani ka.»

³⁴ Jesu den yedi o: «N waani a i moamoani, dinla ñiagu na, hali ke ku kootongu daa mua, a baa nia taalimitaa ke ŋaa bani nni.»

³⁵ Pieli den yedi o: «Ba li yaa tie tiladi min taani ki kpe leni a, n kan nia ke mii bani a.» Bi ŋoadikaaba kuli den yedi yeni.

Jesu jaandi Jetisemani salidinga nni

³⁶ Lani, Jesu den yegi leni o ŋoadikaaba ki pundi ban yi yaa kaanu Jetisemani. O den yedi ba: «Kali mani nekanba, min suagi liiga ki ban jaandi.»

³⁷ O den taa Pieli leni Sebede bijaliediba, ke bi yegi leni o. Li paboanli leni ti yanyagiciandi den cili ki cuo o.

³⁸ O den yedi ba: «Li paboanli cuo nni hali ke li naani ke n baa kpe yeni. Sedi mani ne, ki yaa ye leni nni, ki da guani.»

³⁹ Lani, o den suagi liiga waamu ki baa ki labini ki jaandi ki tua: «N Baa, li yaa baa tuo, ŋan cedi yaa tadiñokaaga n gbie leni fala na n lagidi ki ŋaa nni. Die lan da tua mini n bua maama, kali fini n bua maama.»

⁴⁰ O den guani o ŋoadikaaba kani ki sua ke bi goa, ke o yedi Pieli: «Yii fidi ki sedi leni nni ba waamu, kaa guani yo?

⁴¹ Yaa guu mani ki jaandi ke yin da ti kua mi tulinma nni. Li pali bua, ama ti gbanandi nan tadi.»

⁴² O go den piadi miliema ki jaandi ki yedi: «N Baa, li yaa tie ke a kan ñani n kani yaa tadiñokaaga n gbie leni fala na, kali min ño, a yanbuama n tieni.»

⁴³ O go den guani bi kani ki sua ke bi goa, kelima mi guama den gbadi ba.

⁴⁴ O go den ŋaa ba ki piadi ki go jaandi mi taataama, ki go togidi o makpiama.

⁴⁵ Lani, o den guani o ŋoadikaaba kani ki yedi ba: «Yi baa ki goa ki fuo yo? Diidi, u yogunu pundi ke bi baa janbi o Joa Bijua, ki teni o ti tuonbiadi danba.

⁴⁶ Fii mani tin gedi! Diidi mani, yua n baa janbi nni kpendi na!»

Bi cuo Jesu

⁴⁷ Jesu n da den maadi, Juda, yua n den tie bi piiga n niliediba siiga yendo, den pundi o kani. Bi kopadicianba yudanba leni Jufinba nikpela den soani yaa niligu n yabi, ke bi kubi mu jugisiemu leni i gbiami, ki yegi leni o.

⁴⁸ Wani o jajanbido yeni den tuodi ki waani ku niligu yaa maalima n tie ne, ki yedi: «Min baa gobini yua yeni, wani n yeni, yin cuo o mani.»

⁴⁹ Lanyogunu liga Juda den nagini Jesu kani ki yedi o: «Canbaa, n fuondi a,» ki gobini o.

⁵⁰ Jesu den yedi: «N danli, tieni ŋan cua ki baa tieni yaala.» Lane bi niba yeni den nagini ki bibi Jesu, ki cuo o.

⁵¹ Yaaba n den ye leni Jesu siiga yendo den tandi o nuu ki noadi o jugisiega, ki pedi ki joandi bi kopadicianba bado naacemo tubili.

⁵² Jesu den yedi o: «Guani ki ŋuuni a jugisiega, kelima yua n baa taa jugisiega ki bolini kuli, jugisiega n baa bolini o.

⁵³ Naani a tama ke mii pia sanu ki mia n Baa? N yaa mia o, o baa pa nni moala moala, yaa malekinba n yabi ki cie piiga n toagolalie.

⁵⁴ Ama n yaa mia yeni, yaala n diani i Diani nni ki yedi ke yaala n tie ne kuli baa tieni tiladi, li baa tua lede?»

⁵⁵ Lanyogunu Jesu den yedi ku niligu: «Yi cua ki kubi mu jugisiemu leni i gbiami, nani yi lingi o sanjialo yeni, ki baa cuo nni. N den kaa U Tienu diegu nni daali kuli, ki bangi U Tienu maama, ama yii den cuo nni.

⁵⁶ Line kuli tieni ke bi saawalipuaba n den diani yaala n tieni ki dudi.» Lani, bi ŋoadikaaba kuli den ŋaa o ki sani.

Jesu sedi bi cancantieba nintuali

⁵⁷ Yaaba n den cuo Jesu den gedini o bi kopadicianba bado Kayifa kani, li bali maama banda leni a nikpela n den tuodi ki taani naankani.

⁵⁸ Pieli den ye foagima ki ŋua Jesu, hali ki ban pundi bi kopadicianba bado deni. O den kua ku lawaagu nni ki kali leni U Tienu diegu jiidikaaba, ki baa le lan baa juodi maama.

⁵⁹ Bi kopadicianba yudanba leni bi cancantieba kuli den lingi Jesu po mi siedifaama, yaama n baa pa ba o sanu ban kpa o.

⁶⁰ Baa den baa, ba ke bi siedi-tuofaadanba den tieni likani boncianla. Siedi-tuofaadanbilie den ti nagini ki yedi:

⁶¹ «One yedi: ‹N baa fidi ki mudi U Tienu diegu ki go maa gu danataa siiga.› »

⁶² Bi kopadicianba bado den fii ki yedi o: «A kan guani maamiba kuli? Yaa niba n ye ne tiendi a po be yaa siedi?»

⁶³ Jesu den ŋmini suo. Bi kopadicianba bado den yedi: «Hali U Tienu yua n fo po, waani ti a yaa tie U Tienu n Gandi Yua, U Tienu Bijua.»

⁶⁴ Jesu den guani ki yedi o: «Fini n yedi yeni. N go waani yikuli, moala liiga, yi baa ti le o Joa Bijua ke o kaa u Paaciamu Kuli Daano jienu po, ki go le o ke o ñani lankani ki kpendi ti tawadi nni.»

⁶⁵ Lani, bi kopadicianba bado pali den beni ke o cuo wani o ba tiadi ki padi ki yedi: «O sugi U Tienu. Ti go bua siedinba ki tieni be? Moala yi gbadi ke o sugi U Tienu.

⁶⁶ Yi jagi be?» Bi den guani ki yedi o: «Li pundi wan kpe.»

⁶⁷ Lani, bi den siini ti ñinsandi o nunga nni, ki kudi o a nikula. Bi nitianba den pabini o,

⁶⁸ ki yedi: «Fini U Tienu n Gandi Yua, ŋme pua ŋa? Bandi o.»

Pieli nia ke waa bani Jesu

⁶⁹ Pieli den kaa u lawaagu nni. Jafanyendo yua n tuuni laa diegu nni den nagini o kani ki yedi: «Amoko den ye leni Jesu, Galile yua.»

⁷⁰ O den nia bikuli nintuali ki yedi: «Mii bani ŋan bagi yaala.»

⁷¹ O den gedi bu buliñoajabu kani ke jafantoa laa o, ki yedi yaaba n ye likani: «One moko den ye leni Jesu, Nasareti yua.»

⁷² O go den nia miliema ki poli ki yedi ke waa bani laa joa.

⁷³ Lan yeni waamu, yaaba n ye likani den nagini ki yedi Pieli: «Moamoani lige, amoko tie bi jaba yeni siiga yua, kelima ŋan maadi maama doagidi ŋan tie naanpo yua.»

⁷⁴ Lani, Pieli den nia leni ti solindi leni a pola: «Mii bani laa joa.» Lanyogunu ku kootongu den mua.

⁷⁵ Pieli ji den tiadi Jesu n bi yedi o yaala: «Hali ke ku kootongu daa mua, a baa nia taalimitaa ke ŋaa bani nni.» O den ñani ki ban mua leni li paboanli.