Matie 25 - U TIENU MAAMA TILI 2013

Puowandiana piiga kpanjama

¹ Lani yaa po, tanpoli diema baa yaa tie nani puowandiana piiga, yaaba den taa bi fidisanmu ki fii ki baa n tuogi o puocaano calo.

² Bi siiga nni bonbimuu den tie yanpiidanba, bimuu mo n yaa tie yanfuodanba.

³ Bi yanpiidanba n den taa bi fidisanmu, baa den taa kpama ki kubi.

⁴ Ama bi yanfuodanba wani den taa bi fidisanmu, ki go kubi mi kpama mu sanbuomu nni.

⁵ O puocaano calo n den waagi mi cuama, mi guama den cuo bikuli ke bi guani.

⁶ Ku yoagisiigu, o nilo den kpaani ki yedi: ‹O puocaano calo kpendi na, fii mani ki ban tuogi o!›

⁷ Lane a puowandiana yeni kuli den fundi ki ŋanbi bi fidisanmu.

⁸ Bi yanpiidanba den yedi bi yanfuodanba: ‹Pa ti mani yi kpama waamu, kelima ti fidisanmu bua ki gbindi.›

⁹ Bi yanfuodanba den guani ki yedi ba: ‹Li fidi ke mi kan dagidi tinba leni yinba kuli po, gedi mani yaaba n kuadi po ki ban daa yi yula po.›

¹⁰ Ban den caa yaa yogunu ki baa n da, o puocaano calo den pundi. Yaa puowandiana n bogini den yegi leni o ki kua mi puocaajiema kani. Bi den loni bu buliñoabu.

¹¹ Lan den pugini waamu, yaa puowandiana n sieni den pundi ki yedi: ‹Canbaa, canbaa, luodi ti po.›

¹² Ama o den guani ki yedi ba: ‹N waani yi i moamoani, mii bani yi.›

¹³ Lanwani, Jesu den juodi ki yedi: ‹Lani yaa po, yin yaa guu mani, kelima yii bani li daali, yii go bani li yogunu mo.›

Naacenbitaa kpanjama

¹⁴ Li go baa yaa tie nani yaa joa n den caa u dogu ki yini o naacenba ki guuni ba o piama.

¹⁵ O den teni yendo wula kujapiena kobimuu, o lielo wula kujapiena kobilie, o taalo mo wula kujapiena kobiga, ki ŋoadi yuakuli n baa fidi maama. Li yaa puoli, o den fii ki gedi.

¹⁶ Yaa naacemo n den gaa wula kujapiena kobimuu den fii ki ban tieni u kpendu, ki baa wula kujapiena kobimuu ki pugini.

¹⁷ Yua n den gaa wula kujapiena kobilie moko den tieni yeni, ki mo baa wula kujapiena kobilie ki pugini.

¹⁸ Yua mo n den gaa wula kujapiena kobiga bebe yeni den gedi ki ban gbiidi ku buogu ki tinga nni, ki wuoni o canbaa ligi.

¹⁹ Lan den waagi boncianla, bi naacenba yeni canbaa den ti kpeni ki yini ba, ban waani o ban kubi o po yaa ligi maama fuuli.

²⁰ Yua n den gaa wula kujapiena kobimuu yeni den cua leni wan den baa yaa kujapienkobimuudi ki pugini yeni, ki yedi: ‹Canbaa, a den teni nni wula kujapiena kobimuu, diidi, n go baa kobimuu ki pugini.›

²¹ O canbaa den yedi o: ‹Li ŋani, n naacendugika, a teni ke n dugi a po li bonwaala po, n baa teni ŋan diedi boncianla. Cua ki taani ki mangi a pali leni nni.›

²² Yua n den gaa wula kujapiena kobilie den cua ki yedi: ‹Canbaa, a den teni nni wula kujapiena kobilie, diidi, n go baa kobilie ki pugini.›

²³ O canbaa den yedi o: ‹Li ŋani, n naacendugika, a teni ke n dugi a po li bonwaala po, n baa teni ŋan diedi boncianla. Cua ki taani ki mangi a pali leni nni.›

²⁴ Yua n den gaa wula kujapiena kobiga bebe mo den yuandi ki cua ki yedi: ‹Canbaa, n den bani ke a pia ki mabinga, ki yendi ŋan kaa buli naani, ki wuo ŋan kaa lendi naani.

²⁵ Lane ke ti jawaandi den cuo nni, ke n gedi ki ban wuoni a ligi ki tinga nni. Gaa ŋan die yaala.›

²⁶ O canbaa den guani ki yedi o: ‹O naacenbiado leni o kpadijedaano na, nani ŋan den bani ke n yendi min kaa buli naani, ki wuo min kaa lendi naani yeni,

²⁷ li den baa yaa ŋani ŋan bili n ligi ku ligidiegu nni. Lani, n kpenma yogunu, n bi baa gaa min die yii leni ti ñuadi.

²⁸ Gaa mani o kani o kujapienkobiga, ki teni yua n pia wula kujapiena tudili (1 000).›

²⁹ Li tie lani yaa po ke bi baa pa ki pugini yua n pia kuli o piama n yaa yabi. Ama yua n kaa pia wani, bi baa gaa o kani ba wan pia yaala.

³⁰ Lu mani yaa naacemo n tie fanma yeni niinpo li biigili nni, a bubula leni mi ñincegima n baa yaa ye naankani.

Ti bujuodikaadi

³¹ O Joa Bijua yaa cua o kpiagidi nni yaa yogunu, ki yegi leni o malekinba kuli, o baa kali o bali kalikaanu yuu n pia ti kpiagidi po.

³² I nibuoli kuli baa taani o nintuali. O baa paadi bine leni biyaba, nani o yankpaalo n paadi i pe leni i ŋuabi maama.

³³ O baa sieni i pe o jienu, i ŋuabi mo o ganu.

³⁴ Lani, o bado baa yedi yaaba n ye o jienu: ‹Cua mani na, yinba n Baa n seligi yaaba! Gaa mani wan den ŋanbi yi po yaa diema hali ŋanduna cilima!

³⁵ Mi koma den cuo nni ke yi puni nni ke n dini, u ñuñuunu den cuo nni ke yi puni nni ke n ñuni, n den tie caano ke yi gaa n cangu,

³⁶ n den ye mubima ke yi yieni nni, n den yia ke yi cua ki laa nni, n den ye li kpaadidieli nni ke yi cua ki fuondi nni.›

³⁷ Bi niteginkaaba baa guani ki yedi o: ‹Canbaa, ti den laa ŋa beyogune ke mi koma pia ŋa ke ti puni a ke a dini? U ñuñuunu den pia ŋa beyogune ke ti puni a ke a ñuni?

³⁸ Ti den laa ŋa beyogune ke a tie caano ke ti gaa a cangu? A den ye mubima beyogune ke ti yieni a?

³⁹ Ti den laa ŋa beyogune ke a yia, bi ke a ye li kpaadidieli nni, ke ti cua ki fuondi a?›

⁴⁰ Lani, o bado baa guani ki yedi ba: ‹N waani yi i moamoani, yin den tieni la yaa yogunu, n kpiiba na siiga ba yua yaa kpiagidi n wa ki cie po, yi den tieni la n yaa po yo.›

⁴¹ Li yaa puoli, o baa yedi yaaba n ye o ganu: ‹Fuadi mani n kani, yinba ti solindi yaaba! Gedi mani yaa fantanbuogu n ki pia gbindima po, ban den gbiidi yaagu ku tuotabigu yudaano leni o yaa malekinba po.

⁴² Mi koma den cuo nni ke yii puni nni ke n dini, u ñuñuunu den cuo nni ke yii puni nni ke n ñuni,

⁴³ n den tie caano ke yii gaa n cangu, n den ye mubima ke yii yieni nni, n den yia ki go den ye li kpaadidieli nni ke yii cua ki laa nni.›

⁴⁴ Bani moko baa guani ki yedi: ‹Canbaa, ti den laa ŋa beyogune ke mi koma pia ŋa, bi ke u ñuñuunu pia ŋa, bi ke a tie caano, bi ke a ye mubima, bi ke a yia, bi ke a ye li kpaadidieli nni, ke tii cua ki todi a?›

⁴⁵ O baa guani ki yedi ba: ‹N waani yi i moamoani, yaa yogunu ke yii den todi yaaba n tie ne siiga ba yua yaa kpiagidi n wa ki cie, yii den todi mine.›

⁴⁶ Lani, bi baa gedi yaa fala n ki pia juodima kani, ama bi niteginkaaba baa gedi yaa miali n kan gbeni yaa kane.»