Matie 23 - U TIENU MAAMA TILI 2013

Jesu jaligi mi jaanma yudanba

¹ Li yaa puoli, Jesu den maadi leni ku niligu leni o ŋoadikaaba ki yedi:

² «Li bali maama banda leni Farisieninba pia li bali ki bangi Musa n den soagini yaa bali maama.

³ Lanwani, yin yaa tuodi ki tiendi ban yedi yi yaala kuli. Ama yin da togidi bi bontienkaala, kelima bi maadi ki naa tiendi.

⁴ Bi luo a tugikpiaga ki tungi bi niba, ki naa bua ki sii ba leni bi nubili.

⁵ Bi tiendi bi bontienkaala kuli ke bi niba n le. Yeni yaa po yo ke bi yabindi bi bonyilikaala, ki go foagidi bi liadicuadi.

⁶ Bi yaa gedi mi jecianma kani, bi lingi ki kali yaa kaani n gagidi, ki go bua ki yaa kaa i nician-kalikaani, li bali maama bangima diena nni.

⁷ Bi bua bi niba n yaa fuondi ki kpiagidi ba mu daamu nni, ki go yaa yi ba ‹Canbaa.›

⁸ Ama yinba, yin da cedi ban yaa yi yi: ‹Canbaa,› kelima yendo bebe n tie yi Canbaa, yikuli mo tie kpiiba leni yiyaba.

⁹ Yin da yini oba ki tinga nni yi baa, kelima yendo bebe n tie yi Baa, wani yua n ye tanpoli.

¹⁰ Yin da cedi ban yaa yi yi: ‹Canbaanciamo,› kelima yendo bebe n tie yi Canbaanciamo, lani n tie U Tienu n Gandi Yua.

¹¹ Yi siiga nni yua n tugi li yuli baa yaa tie yi naacemo.

¹² Yua n fiini o yuli kuli, U Tienu baa jiini o, yua n jiini o yuli mo kuli, U Tienu baa fiini o.

Jesu funi leni li bali maama banda

¹³ Fala baa yaa ye leni yi, yinba li bali maama banda leni Farisieninba palalie danba, kelima yi luoni tanpoli diema kuama bi niba po. Yii kua yiba, yaaba n bua ki kua mo, yi kan cedi ban kua. [

¹⁴ Fala baa yaa ye leni yi, yinba li bali maama banda leni Farisieninba palalie danba, kelima yi fenli a kpepuona diena, ki nan jaandi i jaandifoagi ki kpali ke yi tie jajaandimoana. Li tie lani yaa po, yi yaa buudi cuonu baa yaa bia ki cie.]

¹⁵ Fala baa yaa ye leni yi, yinba li bali maama banda leni Farisieninba palalie danba, kelima yi duodi mi ñincianma, ki gaandi ki tinga nni kuli ki bua ki baa ba niyendo wan tua yi ŋoadika. Ama o yaa tua yi ŋoadika yeni, yi yen teni wan tua ku fantanbuogu yua, ki yaa ji bia ki cie yi taalimilie.

¹⁶ Fala baa yaa ye leni yi, a gobidika-juama na, yinba yaaba n yedi: ‹Yua n poli leni U Tienu diegu, li kan cuo o, ama yua n poli leni U Tienu diegu nni yaa wula, li baa cuo o.›

¹⁷ Bi yanluodanba leni a juama na, lile po n cie liyali, wula yeni bi U Tienu diegu yaagu n gagidi ki ŋanbi laa wula yo?

¹⁸ Yi go yedi ke o nilo yaa poli leni li padibinbinli, li kan cuo o, ama yua n poli leni yaa padili n ye li padibinbinli po, li baa cuo o.

¹⁹ Yinba a juama na, lile po n cie liyali, li padili yeni bi li padibinbinli yaali n gagidi ki ŋanbi li padile?

²⁰ Yua n poli leni li padibinbinli, poli leni lini leni yaala n maa li po kuli.

²¹ Yua n poli leni U Tienu diegu poli leni kuni leni U Tienu yua n ye ku niinni kuli.

²² Yua n poli leni tanpoli, poli leni U Tienu bali kalikaanu leni U Tienu yua n kaa upo kuli.

²³ Fala baa yaa ye leni yinba li bali maama banda leni Farisieninba palalie danba, kelima yi coadi yaa kpinfaadi n yi menti, aneti leni kumini, ki ñandi li diim, ama yi fali li bali maama nni yaala n pia mayuli ki cie. Lani n tie ki yaa tiendi yaala n tiegi, ki yaa gba mi ninñima, ki yaa go tie nidugikaaba mo. Lani n tie yin bi pundi ki yaa tiendi yaala, ki nan da cedi yaala n sieni mo.

²⁴ Yinba a gobidika-juama na, yi kaadi ki ñandi ki siiga, ki nan nali ku yuoyuogu.

²⁵ Fala baa yaa ye leni yinba li bali maama banda leni Farisieninba palalie danba, kelima yi yen ŋuudi ki tadiñokaaga leni ki taditialiga puoli po, ke mu tugu nni nan gbie leni yin fenli yaala yi bonbuaka-biadila po.

²⁶ Fini o Falisieni-juamo, kpa ŋanbi yaala n ye ki tadiñokaaga leni ki taditialiga tugu nni, lanwani mu puoli po moko baa ŋani.

²⁷ Fala baa yaa ye leni yinba li bali maama banda leni Farisieninba palalie danba, kelima yi tie nani ban pendi yaa takula ke a ŋani boncianla bi niba nuni po, ama ke a tugu nni nan gbie a tinkpikpaba leni joagindi buoli kuli.

²⁸ Yimoko tie yene, bi niba nuni po yi ŋani, ama yi pala nni gbie leni i boandi leni mi biadima.

Jesu tuodi ki waani ke u cuonu ye

²⁹ Fala baa yaa ye leni yinba li bali maama banda leni Farisieninba palalie danba, kelima yi maa bi saawalipuaba po yaa takula n ŋani, ki ŋanbidi bi niteginkaaba mo yaa takula,

³⁰ ki nan yedi: ‹Ti yaa den ye ti yaajanba n den ye yaa yogunu, ti kan den taani leni ba ki kpa bi saawalipuaba ki wuli bi soama.›

³¹ Yi tiendi yi yula po siedi ke yi tie yaaba n den kpa bi saawalipuaba.

³² Lanwani, suagi mani ki dudi yi yaajanba n den cili ki tiendi yaala.

³³ Yinba, i we, u waalabi-buolu na, yi baa tieni lede ki sani ki faabi leni ku fantanbuogu cuonu?

³⁴ Li tie lani yaa po ke n tuuni yi po bi saawalipuaba, bi yanfuodanba leni U Tienu Laabaaliŋamo bangikaaba. Yi baa kpa bine, ki joani bine a dapoanpoana po, ki pua bine i baliji li bali maama bangima diena nni. Yi baa yaa ŋua ki wangi bine fala ban kua yaa dogu nni kuli,

³⁵ ke yaaba n ki den pia tagili soama yaama n den wuli ki tinga nni kuli, ki cili o niteginka Abeli soama, ki pundi hali Berekia bijua Sakari yaa soama. Yi den kpa wani Sakari, U Tienu diegu nni u kaangagidiŋamu leni li padibinbinli siiga. Bikuli soama baa jiidi yi yaa yula po.

³⁶ N kadi ki waani yi i moamoani ke lani kuli baa jiidi moala niba yula po.

Jesu maadi Jerusalemi po

³⁷ Jerusalemi, Jerusalemi, fini yua n kpa bi saawalipuaba, ki lugidi U Tienu n tuuni a kani yaaba a tana ki kpaani ba, taalimiŋa yo ke n den bua ki gobidi ki taani a niba nani o kooñua n yen ŋoagini o koobila o fiabi nni maama, ama a naa den bua.

³⁸ Lanwani, bi baa ŋa yi diegu diegbengu.

³⁹ N waani yinba Jerusalemi yaaba, yi kan go le nni hali yin baa ti maadi n maama yaa yogunu ki yedi: ‹U Tienu n seligi yua n kpendi wani o Diedo yeli nni!› »