Matie 22 - U TIENU MAAMA TILI 2013

Mi puocaajiema yaa kpanjama

¹ Jesu go den pua ba mi kpanjama ki yedi:

² «Tanpoli diema baa yaa tie nani yaa bado n den ŋanbi o bijua puocaajiema.

³ O den soani o naacenba ban yini wan den yini yaaba laa puocaajiema po, ama bi den yie baa cua.

⁴ O go den soani naacentoaba ki yedi: ‹Yin waani min yini yaaba ke n ŋanbi mi jiema ki gbeni. N kodi n ne leni n yanwubiditi ki ŋanbi ki gbeni. Ban ji cua mi puocaajiema po na.›

⁵ Ama wan den yini yaaba yeni den fali o yiinu, ki fii ki gedi bi kaani, one n gedi o kuanu po, one mo o kpendu,

⁶ yaaba n sieni mo den cuo o naacenba ki fiagi ba ki kpa ba.

⁷ O bado pali den beni boncianla, ke o soani o toatieba ke bi kpa laa nikpaba kuli, ki juu bi dogu.

⁸ Lanwani, o den yedi naacentoaba: ‹Mi puocaajiema ŋanbi ki gbeni, ama min den yini yaaba naa pundi ki je ma.

⁹ Gedi mani yaa sani n pia bi niba boncianla nni, ki yini yin laa yaaba kuli ban cua mi puocaajiema po.›

¹⁰ Bi naacenba yeni den kua i sani nni, ki taani ban laa yaaba, bi nibiadiba leni bi niŋanba kuli, yeni mi puocaajiema dieli den gbie bi niba.

¹¹ O bado n den kua ke o baa le yaaba n cua o yiinu, o den laa niyendo ke waa la mi puocaajiema tiadi.

¹² O den yedi o: ‹N danli, a tieni lede ki kua ne kaa la mi puocaajiema yaa tiadi?› O joa yeni naa den baa ki guani puu.

¹³ O bado den yedi o naacenba: ‹Loli mani o taana leni o buadi, ki lu o niinpo li biigili nni, a bubula leni mi ñincegima n baa yaa ye naankani.› »

¹⁴ Jesu den juodi ki yedi: «Ban yini yaaba yabi, ama ban gandi yaaba wa.»

Loma badiciamo Sesari lubili

¹⁵ Lanwani, Farisieninba den fii ki foagidi ki ban juogi ban baa tieni maama ki dia Jesu ku madiagu, ki cuo o.

¹⁶ Bi den soani o kani bi ŋoadikaaba leni o bado Herodi buakaaba, ke bi yedi o: «Canbaa, ti bani ke a tie moamoandaano, ki bangi bi niba U Tienu sanŋoadima leni i moamoani, ŋaa jie oba kuli, ŋaa gagidi oba kelima bi niba n nua ke o tie maama po.

¹⁷ Lani yaa po, waani ti amo n sua yaala. Naani li pia u sanu tin pa Loma badiciamo Sesari li lubili, bi laa pia?»

¹⁸ Jesu den bani bi nunfanbiadibu, ki guani ki buali ba: «Yinba palalie danba ne, be n teni ke yi dia nni ku madiagu yeni?

¹⁹ Min le yin baa pa yaa ligi li lubili yeni?» Bi den teni o li kujapienli.

²⁰ O den buali ba: «Ŋme yaa nannanli leni ŋme yaa diani yo?»

²¹ Bi den guani ki yedi o: «Sesari yaali yo.» Lane o den yedi ba: «Lanwani, pa mani Sesari, yaala n tie Sesari yaala, ki pa U Tienu mo, yaala n tie U Tienu yaala.»

²² Ban den gbadi o maguankaama, li pakili den cuo ba ke bi den fii ki ñani o kani, ki ban caa.

Sadusieninba buali bi tinkpiba fiima po

²³ Landaali goga, Sadusieninba, yaaba n tua ke bi tinkpiba fiima ki ye, bi tianba den cua Jesu kani ki buali o i naa buali:

²⁴ «Canbaa, Musa den yedi: ‹O nilo yaa kpe kaa pia biga, o waalo n taa o kpepuoli ki baa o kpelo po u buolu.›

²⁵ To, ti siiga nni jabilele den ye ki taa baayendo. O bonkpelo den taa o pua ki kpe. Wan ki den baa buolu yeni, o waalo den taa o kpepuoli.

²⁶ Wani o bonlielo yeni moko den kpe kaa baa buolu, ke o bontaalo moko taa laa pua, ke li tieni tieni yeni, ki yaa caa hali o bonleleelo.

²⁷ Bikuli n den kpe kpe, o pua moko den yuandi ki kpe.

²⁸ Lanwani, bi tinkpiba fiima yogunu, bani bonbilele yeni siiga, o pua yeni nan baa yaa tie ŋme yaa yua yo? Bi niinni yendo yendo kuli den taa o ke o tua o pua.»

²⁹ Jesu den guani ki yedi ba: «Yi tudi, kelima yii bani i Diani, yii bani U Tienu paalu mo.

³⁰ Bi tinkpiba fiima yogunu, bi jaba kan go taa puoba, bi puoba mo kan go kuni jaba. Ama bi baa yaa tie nani malekinba yeni tanpoli po.

³¹ Yaala n tie bi tinkpiba fiima yaa maama fuuli po mo, naani yii cogi U Tienu n yedi yi yaala na:

³² ‹N tie Abalahama, Isaaka leni Jakob Tienu?› U Tienu mo naa tie tinkpila Tienu ka, o tie yaaba n fo Tienu yo.»

³³ Ku niligu den gbadi Jesu bangima ke li paki ba.

Li bali maama majali

³⁴ Farisieninba n den gbadi ke Jesu mubini Sadusieninba ñoana, bi den taani o kani.

³⁵ Bi siiga nni yendo yua n tie li bali maama bangikaciamo den buali o, ki bua ki dia o ku madiagu ki yedi o:

³⁶ «Canbaa, li bali maama nni, mile n cie?»

³⁷ Jesu den guani ki yedi o: «Ŋan bua o Diedo a Tienu leni a pali kuli leni a miali kuli leni a yantiali kuli.

³⁸ Li bali maama nni, mine n cie ki tie li mayuli.

³⁹ Yaama n ŋua ma ki naani leni ma mo tie mine: Ŋan bua a lielo nani ŋan bua a yuli maama yeni.

⁴⁰ Li bali maama leni bi saawalipuaba maama kuli, maa laa maliedima po yo.»

Kilisiti n tie yua

⁴¹ Farisieninba n den taani, Jesu den buali ba:

⁴² «Yi tama be yo U Tienu n Gandi Yua po? O tie ŋme bijua yo?» Bi den guani ki yedi o: «O tie Davidi bijua.»

⁴³ Jesu den yedi ba: «Li yaa tie yeni, li nan gaa lede ke mi Fuoma den teni ke Davidi maadi o maama ki yini o o Diedo, wan den yedi:

⁴⁴ O Diedo den yedi n Diedo: ‹Kali n jienu po, Hali min baa guli a yibalinba Ŋan ŋmaa ba.›

⁴⁵ Davidi oba yaa yini o o Diedo, li nan go gaa lede ke o tie wani Davidi bijua?»

⁴⁶ Oba kuli ki den fidi ki guani Jesu ba mayenma. Hali landaali mo, oba kuli ki go den baa papaali ki buali o bualiba kuli.