Matie 21 - U TIENU MAAMA TILI 2013

Jesu kuama Jerusalemi leni o kuuma 21—27 Jesu kua Jerusalemi

¹ Jesu leni o ŋoadikaaba n den nagidi Jerusalemi, ki pundi Betifase dogu nni, ki kuu Olivie Tiidi juali, o den soani ŋoadikaabilie

² ki yedi ba: «Suagi mani ki gedi yaa dobiga n ye yi liiga na. Yi yaa ban pundi yaa yogunu, yi baa le ke o ŋunñua luo ki se leni o biga. Yin lodi ki cuani ba n po na.

³ Nilo yaa yedi yi liba, yin guani ki yedi o: ‹Ti Daano n bua ba.› Tontoni o baa cedi yin cuani ba.»

⁴ Lani kuli den tieni ke o saawalipualo n den pua yaa saawalo n tieni:

⁵ Waani mani Siyon dogu yaaba, Ke bi bado kpendi bi kani na. O dingi boncianla, ki jagi o ŋunbo. Li tie ŋunbisaagili, o ŋunñua yaa biga.

⁶ Bi ŋoadikaaba den gedi ki ban tieni Jesu n waani ba maama.

⁷ Bi den cuani o ŋunñua leni li ŋunbisaagili ki maani bi po bi tiadi, ke Jesu jagini.

⁸ Ku niligu siiga bi niba boncianla den ladi bi tiadi u sanu nni, bi tianba mo den pedi i tibensoangi ki ladi u sanu nni.

⁹ Yaa niligu n den ye Jesu liiga leni yaagu n ŋua o puoli kuli den kpaani ki tua: «Davidi Bijua n baa ti pagidi! U Tienu n seligi yua n kpendi wani o Diedo yeli nni. U Tienu yua n ye hali tanpolijoma n baa ti pagidi.»

¹⁰ Wan den kua Jerusalemi, li den paki u dogu nni yaaba kuli ke bi tua: «One tie ŋme?»

¹¹ Ku niligu den guani ki tua: «Li tie Jesu, o saawalipualo, Galile diema yaa Nasareti yua.»

Jesu kua U Tienu diegu nni

¹² Jesu den kua U Tienu diegu nni, ki deli ki ñani yaaba n kuadi leni yaaba n daa lienni kuli, ki tudi ki luni bi ligilebidiba kpagidi leni a kpaajekuada bonkalikaala.

¹³ O den yedi ba: «Li diani: ‹Bi baa yaa yi n dieli i jaandi diegu.› Ama yinba wani teni ke li tua a suuda wuonkaanu.»

¹⁴ A juama leni a diama den nagini o kani U Tienu diegu nni, ke o paagi ba.

¹⁵ Ama bi kopadicianba yudanba leni li bali maama banda n den laa wan tieni yaa bonlidinkaala yeni, ki gbadi ke a bila kpaani U Tienu diegu nni ki tua: «Davidi Bijua n baa ti pagidi, Davidi bijua n baa ti pagidi,» bi pala den beni boncianla.

¹⁶ Bi den yedi o: «A gba ban maadi yaala?» Jesu den guani ki yedi ba: «Mm. Naani yi daa cogi yaa maama n tie ne: ‹A teni ke a biwaala leni yaaba n da ŋaani kuli pagi a bonŋanla?› »

¹⁷ Jesu n den fii bi kani, o den ñani u dogu nni ki gedi ki ban duani Betani.

Jesu soli bu kankanbu

¹⁸ Wan den guani u dogu po ku tiŋaapanpangu, mi koma den cuo o.

¹⁹ O den laa bu kankanbu u sankunu, ki jadi ki gedi bu kani. Ama waa den laa puu bu po se ti faadi bebe. O den yedi bu: «Ŋan da go luoni puu kuli abada.» Lanyogunu bu kankanbu den kuodi.

²⁰ O ŋoadikaaba n den laa lani, li den paki ba ke bi buali o: «Be n teni ke bu kankanbu kuodi tontoni nanda?»

²¹ Jesu den guani ki yedi ba: «N waani yi i moamoani, yi yaa pia li dandanli ki naa maliti yi pala nni ke li baa tieni bi li kan tieni, yi baa tieni ki cie min tieni bu kankanbu na yaala. Ba yi yaa yedi li naa juali: ‹Fii ki ban lu a yuli mi ñincianma nni,› li baa tieni.

²² Yin baa jaandi ki mia yaala kuli leni li dandanli, yi baa baa la.»

Jufinba buali Jesu o bali n ñani naani

²³ Jesu n den kua U Tienu diegu nni ki bangi bi niba, bi kopadicianba yudanba leni Jufinba nikpela kuli den cua ki yedi o: «Li laa bali yaa po yo ke a tiendi li naa bonla? Ŋme n puni a laa bali?»

²⁴ Jesu den guani ki yedi ba: «Nmoko baa buali yi bonyenla. Yi yaa waani nni, nmoko baa waani yi yaa bali yaa po ke n tiendi laa bonla.

²⁵ Jan n den batisi bi niba yeni, o den baa li bali tanpoli po bi, bi bi nisaaliba kane?» Bi den juogi bi siiga ki yedi: «Ti yaa yedi ke o den baa li tanpoli po, o baa yedi ti: ‹Be yaa po ke yii den daani o maama?›

²⁶ Ti yaa yedi: ‹Bi nisaaliba yaa kane mo›, ti jie ku niligu, kelima bikuli nua ke Jan den tie saawalipualo.»

²⁷ Lani yaa po, bi den guani ki yedi Jesu: «Tii bani ba.» O den yedi ba: «Nmoko kan waani yi yaa bali yaa po, ke n tiendi laa bonla.

Bi bijaliediba kpanjama

²⁸ Yi tama be? O joa den pia bijabilie. O den yedi o bijakpelo: ‹N bijua, gedi ki ban soani dinla n duventiidi kuanu nni.›

²⁹ O den guani ki yedi o baa: ‹Mii caa.› Ama lan yeni waamu, o den lebidi o yama ki gedi.

³⁰ Laa joa den yedi o bijalielo mo yeni. Wani mo den guani ki yedi o: ‹N Daano, n baa gedi.› Ama waa den gedi.

³¹ Bi siiga, ŋme n den tieni o baa n bua yaala?» Bi den guani ki yedi o: «O bonkpelo te!» Lane Jesu den yedi ba: «N waani yi i moamoani, bi lubigaaba leni a puoconcona baa kua yi liiga U Tienu diema nni.

³² Jan den cua yi kani ki wangi yi mi teginma sanu, ama yii den tuo ki ŋoadi o maama. Bi lubigaaba leni a puoconcona den tuo o maama, ama yinba n den laa lani, yii den yuandi ki lebidi yi yama ki daani o maama.

Bi koaguudiba kpanjama

³³ Go cengi mani kpanjatoama. O diedaano den ye ki ŋuu o duventiidi kuanu. O den kpaa li nagili ki lindi u, ki gbiidi ku buogu ku tangu po ban baa yaa ŋanbidi duven naankani, ki go paani li janli o duventiidi siiga. Lani, o den guuni o kuanu bi koaguudiba, ki fii ki gedi u dogu.

³⁴ Li bonluonkaala n den beni yaa yogunu, o den soani o naacenba bi koaguudiba kani, ke ban gaa o kuanu bonbaakaala.

³⁵ Bi koaguudiba den cuo o naacenba ki pua yendo, ki kpa one, ki lugidi o taalo mo a tana.

³⁶ O koadaano yeni go den soani naacentoaba, yaaba n yabi ki cie bi kpiaba. Bi koaguudiba den soani bani mo nani ban den soani bi kpiaba maama.

³⁷ Lani, o den yuandi ki soani o bijua bi kani ki yedi: ‹Bi baa fangi n bijua wani.›

³⁸ Ama bi koaguudiba n den laa o bijua, bi den yedi biyaba: ‹One n tie o faajielo. Cedi tin kpa o mani ki diedi o faali.›

³⁹ Lani, bi den cuo o ki ñani o u kuanu puoli po ki kpa o.

⁴⁰ Yeni o koadaano yaa ti cua, o baa soani laa koaguudiba lede?»

⁴¹ Bi den guani ki yedi o: «O baa bolini laa nibiadiba yaa bolinma n bia, ki go guuni u kuanu nitoaba, yaaba n baa yaa tendi o u kuanu bonluonkaala, li yogunu yaa pundi.»

⁴² Jesu den yedi ba: «Naani yi daa cogi i Diani nni yaa maama n tie ne? ‹Bi tanmaaba n den yie ki luni yaa tanli, Tua li tanpuukaali. Likuli ñani o Diedo kani, Ki tie bonlidinkaala ti nuni po.›

⁴³ Lani yaa po, n waani yi, bi baa gaa yi kani U Tienu diema, ki teni yaa nibuolu n baa yaa baadi mi po li bonluonkaala. [

⁴⁴ Yua n baa laa tanli po kuli baa kua kua, lin baa yua yaa po mo baa tua wagima.]»

⁴⁵ Bi kopadicianba yudanba leni Farisieninba n den gbadi Jesu n pua yaa kpanjama kuli, bi den bandi ke o maadi bane.

⁴⁶ Ba ke bi den moandi ki baa cuo o, bi den jie ku niligu kelima ku den nua ke Jesu tie saawalipuale.