Matie 2 - U TIENU MAAMA TILI 2013

A banda ñani puoli ki cua Betelemi

¹ Jesu den mali Betelemi, Jude diema nni. Li den tie Herodi n den kaa ti gbandi po yaa yogunu. O madi puoli, yaa banda n diidi a ŋmabila den ñani hali puoli ki cua Jerusalemi.

² Bi den buali: «Ban mali Jufinba bado yua moala ne ye le? Ti laa ke o ŋmabiga pudi puoli, ke ti cua ki baa kpiagi o.»

³ O bado Herodi n den gbadi laa laabaalo, o yama den yagi. Jerusalemi yaaba mo kuli yaa yama den yagi.

⁴ O den taani bi kopadicianba yudanba leni li bali maama banda yudanba, ki buali ba U Tienu n Gandi Yua n den baa maa naankani.

⁵ Bi den guani ki yedi o: «Betelemi dogu yuu n ye Jude diema nni, nani o saawalipualo n den diani maama:

⁶ ‹Fini Betelemi dogu, yuu n ye Juda diema nni, Ŋaa tie Juda dociami siiga yaa dogu n wa ki cie. Diidi, yaa bado n baa gobidi n niba Isidayeli yaaba, Baa ña fini yaa niinne.› »

⁷ Lane ke Herodi den yini a banda yeni ŋasiili nni, ki buali ki bandi cain ban den laa ke ki ŋmabiga yeni pudi yaa yogunu.

⁸ Li yaa puoli, o den soani ba Betelemi ki yedi: «Gedi mani ki ban buali ki bandi cain ki biga yeni laabaalo. Yi yaa laa o, yin teni min bandi, ke mini n ba moko baa gedi ki ban kpiagi o.»

⁹ Ban den gbadi o bado n yedi ba yaala, bi den fii ki gedi. Ban den laa yaa ŋmabiga puoli po yeni, den kua bi liiga hali ki ban pundi ki biga n ye yaa dieli yuli po, ki sedi.

¹⁰ Ban den laa ki ŋmabiga, bi pala den mangi hali boncianla.

¹¹ Bi den kua li dieli nni ki laa ki biga leni o naa Mariyama. Bi den gbaani ki kpiagi ki biga, ki lodi bi ŋalimani boaga ki ñani ki puni o yaa paabu n tie ne: wula, a dugibila leni mili.

¹² U Tienu den waani ba ti dangidi nni, ke ban da guani Herodi kani. Lane bi den tagini santo ki kuni.

Josefi leni o niba sani ki gedi Ejipiti

¹³ Ban den fii, o Diedo maleki den doagidi Josefi kani ti dangidi nni ki yedi o: «Fii ki taa ki biga leni o naa ki sani ki gedi Ejipiti. Yin ban yaa ye lanpo, hali min baa waani a yaa yogunu, kelima Herodi baa lingi ki biga, ki bua ki kpa o.»

¹⁴ Josefi den fii ku ñiagu ki taa ki biga leni o naa ki gedi Ejipiti.

¹⁵ O den ye lanpo hali Herodi kuuma. Lani, o Diedo n den tuodi ki teni ke o saawalipualo n pua yaa saawalo den kua: «N yini n bijua Ejipiti po.»

Bi kpa Betelemi dogu bonjala

¹⁶ Herodi n den sua ke a banda yeni boandi o, o pali den beni boncianla. O den soani ban ban kpa yaa bonjala n pia binalie lie leni yaaba n ki pundi yeni kuli, ki ye Betelemi leni u dobila nni kuli, nani a banda n den waani o, ke ki biga yeni n baa yaa pia yaa bina banlu.

¹⁷ Lanwani, o saawalipualo Jeremi n den maadi yaa maama den tieni:

¹⁸ Bi den gbadi i moe Rama dogu nni, A bubula leni i wanli, Raseli n buudi o bila kuuma, Ki kan tuo ban baagi o kelima baa go ye.

Josefi leni o niba guani Isidayeli diema nni

¹⁹ Herodi n den kpe, o Diedo maleki den doagidi Josefi kani ti dangidi nni Ejipiti diema po,

²⁰ ki yedi o: «Fii ki taa ki biga leni o naa ki guani Isidayeli diema po, kelima yaaba n den bua ki kpa ki biga yeni kpe.»

²¹ Josefi den fii ki taa ki biga leni o naa ki guani Isidayeli diema nni.

²² O den jie lipo guanma, kelima o den gbadi ke Herodi bijua Akelayusi kali o baa gbandi po, ki tua Jude bado. Ama U Tienu den waani o ti dangidi nni, ke wan gedi Galile diema nni.

²³ O den gedi ki ban kali Nasareti dogu nni. Li den gaa yene ke bi saawalipuaba n den yedi yaala tieni: «Bi baa yini o Nasareti yua.»