Matie 19 - U TIENU MAAMA TILI 2013

Jesu ñama Galile leni o gedima Jerusalemi 19—20 Jesu maadi li puoñanli maama

¹ Jesu n den maadi laa maama kuli ki gbeni, o den fii ki ñani Galile diema nni, ki gedi Jude tinga yaaga n ye Jurden kpenu kandima.

² Ku niligu den ŋua o. O den paagi a yiama likani.

³ Farisieninba den tuogi o ki dia o ku madiagu ki yedi: «Naani li bali maama tuo o joa n ñani o pua, lan tie yaala kuli po?»

⁴ O den guani ki yedi: «Yii cogi ke mi cilima o Tagido den tagi joa leni pua ka?

⁵ Li go yedi: ‹Li tie lani yaa po ke o joa baa ña o baa leni o naa kani ki taani leni o pua, bani nibilie yeni n tua gbananyendi.›

⁶ Yeni, baa go tie bilie ka, bi ji tie yende. U Tienu n taani yaala, o nisaalo n da paadi la.»

⁷ Bi den yedi o: «Be yaa po ke Musa nan den bili li bali maama nni, ke joa yaa ñani o pua, wan teni o li puoñatili?»

⁸ O den guani ki yedi ba: «Li tie yi pajuaga yaa po yo ke Musa den tuo ke yin yaa ñandi yi puoba. Ama hali ŋanduna tagima yogunu, laa den tie yeni.

⁹ Mini, n waani yi ke yua n ñani o pua ke laa tie conconma po, ki go taa puotoa kuli, o conbi.»

¹⁰ O ŋoadikaaba den yedi o: «Li yaa tie yeni joa leni pua siiga, laa ŋani joa n taa pua.»

¹¹ O den guani ki yedi ba: «Bi niba kuli ka baa fidi ki gaa laa maama, se U Tienu n puni yaaba li paalu bebe.

¹² Bi tianba ye ki tie moagilimu kelima bi mali ki tie yeni, bine mo tua moagilimu kelima bi niba tieni ba la, bine mo tua yeni kelima tanpoli diema po. Yua n baa fidi ki gaa laa maama, wan gaa.»

Jesu gaali a biwaala

¹³ Li yaa puoli, bi niba den cuani Jesu kani a biwaala ke wan maani o nii bi po, ki go jaandi bi po. Bi ŋoadikaaba den funi leni yaaba n kpendinni ba.

¹⁴ Ama Jesu den yedi: «Cedi mani a biwaala n cua n kani ki da deli ba, kelima tanpoli diema tie yaaba n tie nani a biwaala yene yaa po.»

¹⁵ O den maani o nii bi po, ki fii ki fuadi likani.

O jawaapiado

¹⁶ O joa den cua Jesu kani ki buali o: «Canbaa, n baa tieni be yaa bonŋanle ki baa yaa miali n kan gbeni?»

¹⁷ Jesu den guani ki buali o: «Be yaa po ke a buali nni yaala n ŋani po? Yendo bebe n ye ki ŋani. A yaa bua ki baa yaa miali n kan gbeni, ŋan yaa tiendi li bali maama n bili yaala.» O den buali o: «Lile?»

¹⁸ Jesu den guani ki yedi o: «Ŋan da kpa nilo, ŋan da conbi, ŋan da tieni mi siedifaama, ŋan da su.

¹⁹ Ŋan jigini a baa leni a naa, ki go bua a lielo nani ŋan bua a yuli maama yeni.»

²⁰ O jawaalo yeni den yedi o: «N kubi lani kuli! N go poadi be?»

²¹ Jesu den yedi o: «A yaa bua ki yaa ŋani cain, ŋan gedi ki ban kuadi ŋan pia yaala, ki pa a luoda li ligi, lane a baa yaa pia ŋalimani tanpoli po. Lani, ŋan cua ki ŋoadi nni.»

²² O jawaalo yeni n den gbadi laa maama, o den tagini ki ban caa leni li pabiidili, kelima o ŋalimano den yabi.

²³ Lani, Jesu den yedi o ŋoadikaaba: «N waani yi i moamoani, li baa yaa pa boncianla o piado po, wan kua tanpoli diema nni.

²⁴ N go yedi yi, ku yuoyuogu n tagini mi kpalipienbonma nni, dingi ki cie o piado n kua U Tienu diema nni.»

²⁵ Bi ŋoadikaaba n den gbadi lani, li den paki ba boncianla ke bi yedi: «Li yaa tie yeni, ŋme nan baa fidi ki faabi?»

²⁶ Jesu den diidi ba ki yedi: «Bi nisaaliba wani kan fidi la, ama U Tienu po wani, yaala n pa kuli ki ye.»

²⁷ Lanwani, Pieli den yedi o: «Diidi ki le, ti den ŋaa likuli ki ŋoadi a. Li nan baa tua ti po lede?»

²⁸ Jesu den guani ki yedi ba: «N waani yi i moamoani, li bonla kuli yaa guani ki pandi yaa yogunu, ke o Joa Bijua mo kali o bali kalikaanu leni ti kpiagidi kuli, yinba yaaba n ŋua nni, yimoko baa kali piiga n bali kalikaanilie po, ki jia Isidayeli piiga n buoliedi buudi.

²⁹ Yua mo n fii ki ŋaa o diena, o naataanjaba, o naataanpola, o baa, o naa, o bila, yaa ka o kuani kelima n yeli po, o baa baa likuli taalima kobiga kobiga, ki go baa yaa miali n kan gbeni.

³⁰ Ama liiga yaaba siiga niba boncianla baa tua puoli yaaba, puoli yaaba siiga mo, niba boncianla baa tua liiga yaaba.»