Matie 17 - U TIENU MAAMA TILI 2013

Jesu lebidi cain

¹ Danaluoba n den pendi, Jesu den taa Pieli, Jaki leni o waalo Jan, ki piadi leni ba ki doni yaa juali n kpedi yuli po.

² O den lebidi bi nintuali. O nunga den yendi nani u yienu yeni, o tiayiekaadi den pendi nani mi yenma yeni.

³ Musa leni Eli den doagidi bi yula bi kani, ki maadi leni Jesu.

⁴ Pieli den yedi Jesu: «O Diedo, li ŋani tin yaa ye nekanba. A yaa bua, n baa tii sugataa nekanba, fini yenli, Musa yenli, Eli mo yenli.»

⁵ Wan den maadi yeni yaa yogunu, yaa tawaligu n yieni den libini ba. U nialu den maadi ku tawaligu yeni niinni ki yedi: «One n tie n Bibuadiga, n pali n mani yua yaa po hali boncianla. Cengi mani o.»

⁶ Bi ŋoadikaaba n den gbadi laa maama, bi den baa ki labini kelima ti jawaanciandi den cuo ba.

⁷ Ama Jesu den nagini ki sii ba ki yedi: «Fii mani! Da jie mani!»

⁸ Ban den yaadi ki noanli, baa den laa oba kuli, se Jesu bebe.

⁹ Ban den ji li juali, Jesu den teni ba li ñoamabonli ki yedi: «Yin da waani niloba kuli yin laa yaa bonla na, hali o Joa Bijua yaa ti fii bi tinkpiba siiga.»

¹⁰ Bi ŋoadikaaba den buali o: «Be yaa po ke li bali maama banda nan yedi ke li tie tiladi Eli n kpa cua?»

¹¹ O den guani ki yedi ba: «Li tie moamoani ke Eli baa cua ki ŋanbi li bonla kuli.

¹² Ama n waani yi ke baa moala Eli cua, die bi niba naa bandi o, ki cuo o ki soani o ban bua maama. O Joa Bijua moko baa le fala yene bi nuu nni.»

¹³ Bi ŋoadikaaba ji den bandi lanyogunu, ke o maadi ba Jan Batisi yaa maame.

Jesu ñani ki cicibiadiga o jawaalo niinni

¹⁴ Ban den pundi ku niligu kani yaa yogunu, niyendo den cua ki gbaani Jesu kani

¹⁵ ki yedi: «O Diedo, gbadi n biga po mi ninñima. O pia mi bisinbilima, ki laadi fala boncianla. Mi tianma o yen baa u mu nni, mi tianma mo mi ñima nni.

¹⁶ N bi cuani o a ŋoadikaaba kani, ama baa fidi ki paagi o.»

¹⁷ Jesu den yedi: «Yinba moala ne niba, yaaba n ki pia dandanli ki go bia yeni, n baa yaa taa ki ye leni yi ki pundi u laa yogunu? N go baa juuni yi po ki pundi u laa yogunu? Cuani mani ki biga n kani na!»

¹⁸ Jesu den funi leni ki cicibiadiga, ke ki ñani ki biga kani, ke o paagi lanyogunu.

¹⁹ Lani, bi ŋoadikaaba den nagini Jesu kani bani bi bebe, ki buali o: «Be yaa po ke tinba wani naa fidi ki deli ki naa cicibiadiga?»

²⁰ Jesu den yedi ba: «Li tie ke yi dandanli n wa yeni po yo. N waani yi i moamoani, yin pia yaa dandanli yaa pundi baa mutardi bonbibu n wa ki da maama, yi baa yedi li naa juali: ‹Fii ki fuadi likani,› lin fii ki fuadi. Yi kan gbali liba kuli. [

²¹ Ama yaa cicibiadiga n tie ne yaa buolu kan ña se jaandi leni ñoalolima.]»

Jesu go pua saawali ke o baa kpe ki go fii

²² Jesu leni o ŋoadikaaba n den taa ki ye Galile nni, o den yedi ba: «Bi niba baa janbi o Joa Bijua, ki teni o bi nisaaliba.

²³ Bi baa kpa o, ama li dataali daali o go baa fii bi tinkpiba siiga.» Bi pala den biidi boncianla.

U Tienu diegu lubili

²⁴ Ban den pundi Kafarnawum, yaaba n den gaani U Tienu diegu lubili den cua Pieli kani ki buali o: «Naani yi canbaa pa U Tienu diegu lubili?» O den yedi: «O pa.»

²⁵ Ama wan den kua li dieli nni yaa yogunu, Jesu den liidi o ki buali: «A tama be Simon? Ŋanduna badiba gaani ŋme yaa kani li bancanli leni li lubili? Bi gaani bi dotieba kani, bi, bi canba yaa kane?»

²⁶ O den guani o: «Bi canba yaa kani.» Jesu den guani ki yedi o: «Lanwani, bi dotieba kan pa.

²⁷ Ama lan baa tieni maama ke ti kan tua bi po tingbali bonla, ŋan gedi mi ñincianma po ki ban lu ki jandiaga, ki dadi ki ñani yaa jamo n baa kpa cua. A yaa yaadi o ñoabu, a baa le li kujapienli. Ŋan taa li ki teni ba, mini leni fini po.»