Matie 16 - U TIENU MAAMA TILI 2013

Farisieninba leni Sadusieninba mia mi bancianma

¹ Farisieninba leni Sadusieninba tianba den cua Jesu kani ki bua ki biigi o. Bi den mia o wan tieni yaa bancianma n baa yaa tie sinankeene ki doagidi ke o ñani U Tienu kani.

² Jesu den guani ki yedi ba: «Ku yenjuagu yi yen yedi: ‹Mi yenma baa tieni saala, kelima tanpoli moani.›

³ Ku tiŋaagu mo, yi yen yedi: ‹Ki taaga baa mii dinla, kelima tanpoli moandi ki biigidi.› Yi bani ki diidi tanpoli sinankeeninba, ki bundi lan yedi yaala, ama yii bani ki diidi yaa sinankeeninba n tiendi n bua ki yedi yaala.

⁴ Moala na niba yaaba n bia, ki go ŋaa U Tienu sanŋoadima miadi sinankeene. Bi kan tieni bi po sinankeentoa, se Jonasi yua.» Lani, o den fii ki ñani bi kani ki ban caa.

Farisieninba leni Sadusieninba bangima

⁵ Ban den duodi ki gedi napo yaa boanjaali, bi ŋoadikaaba den sundi kaa taa dupen.

⁶ Jesu den yedi ba: «Fangi mani yi yula bonŋanla leni Farisieninba leni Sadusieninba dabinli.»

⁷ Bi ŋoadikaaba den bungi bi pala nni: «Li tie tin ki taa dupen yeni yaa po yo.»

⁸ Jesu den bandi ban bungi yaala, ki yedi: «Yinba yaaba yaa dandanli n ki fuu, be n teni ke yi tama, ke yin ki taa dupen yeni yaa po yo?

⁹ Yi daa kpaagi ki bandi yo? Yii tiadi bi dupenmuudiba, a nitudimuuda leni yin den gbieni yaa baabuodi banlu?

¹⁰ Bi yii tiadi bi dupenleleediba, a nitudinaada leni yin go den gbieni yaa baabuodi banlu?

¹¹ Li gaa lede ke yii bandi ke min yedi yin fangi yi yula leni Farisieninba leni Sadusieninba dabinli yeni, ke mii maadi dupen po ka?»

¹² Lanwani, bi ji den bandi ke laa tie ke o yedi ban fangi bi yula leni dupen yaa dabinli ka, ama ke li tie Farisieninba leni Sadusieninba bangime.

Pieli kadi ki waani ke Jesu tie Kilisiti

¹³ Jesu n den pundi Filipi diema yaa Sesare, o den buali o ŋoadikaaba yaa buali n tie ne: «Bi niba tua ke mini o Joa Bijua tie ŋme?»

¹⁴ Bi den guani ki yedi o: «Bine tua ke a tie Jan Batisi, bine ke a tie Eli, bine mo ke a tie Jeremi, bi, bi saawalipuaba siiga nni yendo.»

¹⁵ O den guani ki buali: «Yimo te, yimo nan yedi ke n tie ŋme yo?»

¹⁶ Simon Pieli den guani ki yedi o: «A tie U Tienu n Gandi Yua, U Tienu yua n fo yaa Bijua.»

¹⁷ Jesu den guani ki yedi o: «Li pamanli ye leni a, Simon, Jonasi bijua, kelima nisaalo ka waani a la, n Baa yua n ye tanpoli n doagidi a po la.

¹⁸ Nmo yedi a ke a tie Pieli. N baa maa Kilisiti Nitaanli laa tangu po, ba bi tinkpiba diema paalu kuli kan fidi ki paadi gu.

¹⁹ N baa teni a tanpoli diema sendabila. Ŋan baa loli yaala ŋanduna nni kuli, li baa loli tanpoli po. Ŋan baa lodi yaala mo ŋanduna nni kuli, li baa lodi tanpoli po.»

²⁰ Lani, o den maadi leni o ŋoadikaaba leni li bali, ki yedi ke ban da waani oba ke o tie U Tienu n Gandi Yua.

Jesu pua saawali ke o baa kpe ki go fii

²¹ Lanyogunu Jesu den cili ki doagidi ki wangi o ŋoadikaaba ke li tie tiladi wan gedi Jerusalemi, ke Jufinba nikpela, bi kopadicianba yudanba leni li bali maama banda n waani o fala boncianla, ke bi niba n kpa o. Ama li dataali daali, o baa fii bi tinkpiba siiga.

²² Pieli den piadi o ki jaligi o ki yedi o: «U Tienu n da cedi lan tieni a, o Diedo. Li kan pundi a kani.»

²³ Ama Jesu den jigidi ki yedi Pieli: «Ña n puoli, Sutaani, a tie n po tingbali bonla, kelima a yantiana naa tie U Tienu yaa ya, ama bi nisaaliba yaa yantiana.»

²⁴ Lani, Jesu den yedi o ŋoadikaaba: «Yua n bua ki yaa ŋua nni kuli, wan yie o yuli ki taa o dapoanpoanli ki bugi, ki nan yaa ŋua nni.

²⁵ Yua n bua ki gaa o miali baa biani li, ama yua n baa biani o miali kelima mini yaa po kuli, baa guani ki le li.

²⁶ O nilo yaa baa ki diedi ŋanduna kuli ke o naano nan bodi, li baa ŋanbi o po be? Bi o nilo baa pa be ki lebidi o naano?

²⁷ O Joa Bijua baa ti cua leni o Baa kpiagidi ki yegi leni o malekinba. Lanyogunu o baa guani yuakuli nani o tuona n tie maama.

²⁸ N waani yi i moamoani, yaaba n ye nekanba tianba kan kpe kaa laa ke o Joa Bijua cua o diema nni.»