Matie 15 - U TIENU MAAMA TILI 2013

Jufinba danbogida maama

¹ Farisieninba leni li bali maama banda tianba den ñani Jerusalemi, ki cua Jesu kani ki yedi o:

² «Be yaa po ke a ŋoadikaaba miidi ti danbogida? Bi yaa baa je kuli, bi kan nidi bi nii.»

³ Jesu den guani ki yedi ba: «Be yaa po ke yimo miidi U Tienu bali maama, ki bua ki kubi yi bogida?

⁴ U Tienu yedi: ‹Jigini a baa leni a naa,› ki go yedi: ‹Yua n soli o baa yaa ka o naa, li pundi ban kpa o.›

⁵ Ama yinba, yi yedi ke o nilo yaa yedi o baa, bi o naa, ke wan den baa todi ba leni yaala tie yaa paabu n gagidi U Tienu po.

⁶ Yeni, yi bolini U Tienu maama ki nan kubi yi bogida.

⁷ Yinba palalie danba, Esayi n den pua saawali yi po yaa saawalo tie moamoani:

⁸ ‹Bi naa niba jigindi nni leni bi ñoacuuna, Ama bi pala foagi leni nni.

⁹ Bi jaandi nni fanma fanma Kelima bi bangi yaa bangima, N tie bi nisaaliba yaa mabilikaama bebe.› »

Yaala n joagindi o nisaalo

¹⁰ Jesu den yini ku niligu ke ku nagini o kani ke o yedi ba:

¹¹ «Cengi mani ki gbadi. Laa tie yaala n kua bu ñoabu nni ka joagindi o nisaalo. Ama yaala n ña bu ñoabu nni n joagindi o.»

¹² Li yaa puoli, o ŋoadikaaba den nagini o kani ki yedi o: «A bani ke ŋan maadi yaa maama yeni tie Farisieninba po tingbali bonla?»

¹³ O den guani ki yedi ba: «N Baa yua n ye tanpoli n kaa ŋu yaa tibu kuli, bi baa ŋabi bu.

¹⁴ Cedi ba mani! Bi tie yaa juama n dia a juama. Juamo yaa dadi juamo mo, bani nibilie kuli n baa baa ku buogu nni.»

¹⁵ Pieli den yedi o: «A kan bundi ti po mi kpanjama yeni?»

¹⁶ Jesu den yedi o: «Yimoko yii pia yanfuoma yo?

¹⁷ Yii bani ke yaala n kua bu ñoabu nni kuli caa ku tugu nni ki go baa ña ka?

¹⁸ Ama yaala n ña bu ñoabu nni tie yaala n bi ye li pali nne ki ji ñani, lani n joagindi o nisaalo.

¹⁹ Ti yanmaalibiadi, mi kukpama, mi conconma buoli kuli, bu subu, mi siedifaama leni ti sugidi kuli ña li pali nne.

²⁰ Lani n tie yaala n joagindi o. Ama ki je kaa nidi kan joagini nisaalo.»

Kanana buolu pua dandanli

²¹ Jesu den fii ki ñani lankani ki gedi Tiiri leni Sidon dobila nni.

²² Yaa pua n den tie likani maabiga, ki tie Kanana yua, den cua o kani ki kpaani ki tua: «O Diedo, Davidi Bijua, gbadi n po mi ninñima? Ki cicibiadiga ye n bisalo niinni ki yagini o yama hali ke li bia.»

²³ Jesu naa den guani ki yedi o liba kuli. O ŋoadikaaba den nagini o kani ki yedi o: «A kan cabi o, kelima o ŋua ki kpaani ti puoli.»

²⁴ Jesu den guani ki yedi: «Baa den soani nni nitoaba po se Isidayeli buolu po, bani yaaba n tie nani yaa pe n yaadi yeni po.»

²⁵ Ama o pua yeni den cua Jesu kani ki gbaani o nintuali ki yedi: «O Diedo, todi nni.»

²⁶ Jesu den guani ki yedi o: «Laa tiegi o nilo n taa a bila jiema ki lu a sangbanbila.»

²⁷ O pua yeni den yedi: «Yeni de! N Diedo, die a sangbanbila yen di yaa jejoagidi n baali bi danba saajekaanu kani.»

²⁸ Jesu den yedi o: «Pua, a dandanli yabi boncianla. Lan tieni a po nani ŋan bua maama.» Lanyogunu o bisalo den paagi.

Jesu paagi bi niba boncianla

²⁹ Jesu den fii ki ñani lankani ki baali Galile ñincianma. O den doni ki kali li juali po.

³⁰ Ku niligu den cua o kani boncianla, ki kpendinni a diama, a juama, a muula, a woma, a tadima leni yiantoaba boncianla. Bi den cua ki duani ba Jesu taana kani ke o paagi ba.

³¹ Ku niligu n den laa ke a muula maadi, ke a tadima paagi, ke a diama cuoni, ke a juama mo noadi, li den paki ba ke bi kpiagi Isidayeli Tienu.

Jesu dini niba tudanaa

³² Jesu den yini o ŋoadikaaba ki yedi: «Mi ninñima cuo nni ku naa niligu po, kelima danataa ke bi ye n kani, baa go pia ban baa je yaala. Mii bua ki cabi ba leni mi koma, ban da ti gbali u sanu nni.»

³³ O ŋoadikaaba den yedi o: «Ti baa tieni lede li naa fuali nni, ki baa yaa jiema n baa guoni ku naa niligu kuli?»

³⁴ Jesu den yedi ba: «Yi pia dupen bonbiŋa yo?» Bi den guani ki yedi o: «Bonbilele leni janbimuba.»

³⁵ Lani, o den teni ke ku niligu kali kali tiipo.

³⁶ O den taa bi dupenleleediba leni i jami ki tuondi U tienu, ki cabidi cabidi ki teni o ŋoadikaaba ke bi boagidi ku niligu.

³⁷ Bikuli den dini ki guo. Bi den wodi yaa jejoagidi n sieni, ki gbieni baabuodilele.

³⁸ Yaaba n den dini den pundi jaba tudanaa (4 000), kaa taani bi puoba leni a bila.

³⁹ Li yaa puoli, Jesu den cabi ku niligu, ki kua ku ñinbiagu nni ki gedi Magadani tinga nni.