Matie 13 - U TIENU MAAMA TILI 2013

I bonbii pagima kpanjama

¹ Landaali Jesu den ñani deeni ki gedi ki ban kali mi ñincianma kunu.

² Ku niligu den taani o kani boncianla, hali ke o kua ki kali ku ñinbiagu nni. Ku niligu yeni kuli den se li wali po.

³ O den pua mi kpanjama ki waani ba bonla boncianla. O den cili ki yedi:

⁴ «O kpakpaalo den ñani ki baa pagi o bonbuoli. Wan den pagini, i tiami den baa u sankunu ke ti bonyugiditi cua ki dini yi.

⁵ I tiami mo den baa ku tancaligu po, mi tama n ki yabi naani. Yi den pudi tontoni kelima mi tama ki yabi likani.

⁶ Ama u yienu n den paagi, i den mali ki kuodi, kelima jiinmoani ki den ye.

⁷ I tiami mo den baa ti konkondi nni. Ti konkondi den fii ki dini yi.

⁸ I tiami mo den baa ki tinŋanga nni. I den loni, bonbiyenbu kobiga kobiga, i tiami piiluoba luoba, i tiami mo piitaa taa.

⁹ Yua n pia a tuba ki baa gbadi, wan gbadi.»

Jesu n pua mi kpanjama yaala yaa po

¹⁰ Bi ŋoadikaaba den nagini o kani ki buali o: «Be yaa po ke a pua ba mi kpanjama?»

¹¹ O den guani ki yedi ba: «Bi puni yinba yin bandi tanpoli diema bondoaginkaala. Ama bi naa puni bani wani n bandi la.

¹² Bi baa pa ki pugini yua n pia, wan baa ki pugini, ama yua n ki pia wani, bi baa gaa o kani ba wan pia yaala.

¹³ Lani yaa po yo, ke n pua ba mi kpanjama, kelima ba ke bi nua, baa laa liba, ba ke bi cengi mo, baa bandi liba, baa gba liba mo.

¹⁴ Esayi n den pua yaa saawalo maama tieni ki dudi laa niba kani. O den yedi: ‹Yi baa gbadi leni yi tuba ki nan kan gaa liba, Yi baa nua leni yi nuni ki nan kan le liba,

¹⁵ Kelima bi naa niba pala tua pajuaga. Bi biini bi tuba ki ŋubini bi nuni, Ke ban da le leni bi nuni, Ki da gbadi leni bi tuba, Ki da gaa leni bi pala, Ke ban da ti lebidi bi pala min paagi ba.›

¹⁶ Ama li pamanli ye leni yi, kelima yi yaa nuni wani nua, yi tuba mo gba.

¹⁷ N waani yi i moamoani, bi saawalipuaba leni bi niteginkaaba boncianla den bua ki le yin nua yaala na, ki naa laa la. Bi den bua ki gbadi yin gba yaala na, ki naa gbadi la.

Jesu bundi i bonbii pagima kpanjama

¹⁸ Lanwani, cengi mani o kpakpaalo kpanjama bundima.

¹⁹ O nilo yaa cengi U Tienu diema maama, ki naa gaa man bua ki yedi yaala, o Biado n cua ki ñani ban pagi yaama o pali nni. Wani n tie yaa bonpagikaala n baa u sankunu.

²⁰ Yii n den baa ku tancaligu po, tie yua n gbadi U Tienu maama, ki gaa ma tontoni leni li pamanli.

²¹ Ama waa pia jiinmoani o pali nni. O kan fidi ki juuni ki sedi. Mi yebiadima yaa cua, yaa ka bi niba yaa waani o fala kelima U Tienu maama po, tontoni se wan gbali ki baa.

²² Yii n den baa ti konkondi nni, tie yua n gbadi U Tienu maama, ama ŋanduna yema yanyagidi leni ŋalimani boandi kuli dini ma, ki teni ke maa luoni puu.

²³ Yii n den baa ki tinŋanga nni mo, tie yua n gbadi U Tienu maama ki gaa ma. O luoni li bonluonkaala, bonbiyenbu loni kobiga, bune piiluoba, bune mo piitaa.»

Ti moabiaditi kpanjama

²⁴ Jesu go den pua ba kpanjatoama ki yedi: «Tanpoli diema baa yaa tie nani yaa nilo n den buli yaa bonbulikaala n ŋani o kuanu nni.

²⁵ Ama bi niba n den goa yaa yogunu, o yibali den cua ki buli o bonbulikaala yeni siiga ti moabiaditi, ki lebidi ki kuni.

²⁶ Ŋalikama n den pudi ki kpedi ki luoni, ti moabiaditi moko den kpedi.

²⁷ Bi naacenba den cua ki yedi o koadaano: ‹Canbaa, ŋaa den buli yaa bonbuoli n ŋani ka a kuanu nni? Be nan teni ke ti moabiaditi mo ye lienni?›

²⁸ O den guani ki yedi ba: ‹Yibaloba n tieni laa bonla.›

²⁹ O naacenba den yedi o: ‹A bua tin gedi ki ban ŋabi ti bi?› O den yedi ba: ‹Aa-a, cedi mani, ke yi yaa ŋabi ti moabiaditi, yin da ti taani ki ŋabi leni ŋalikama.

³⁰ Cedi mani likuli n yaa taa ki kpedi hali u jetaagu yogunu n pundi. Lanyogunu n baa yedi bi dipeba: Yin kpa ŋabi ti moabiaditi ki taani ki loli ban juu ti, ama yin taani ki kuodi ŋalikama wani n buali nni.› »

Mutardi leni li dabinli kpanjama

³¹ Jesu go den pua ba kpanjatoama ki yedi: «Tanpoli diema tie nani yaa nilo den buli yaa kpintiigu n yi mutardi yaa bonbibu o kuanu nni.

³² Laa bonbibu n wa ki cie i bonbii kuli, ama bu yaa pudi, bu yen kpedi ki cie ti kpintiidi kuli ki tua tibu, ke ti bonyugiditi kpendi ki tiendi bi tiana bu beni po.»

³³ O go den pua ba mi naa kpanjama: «Tanpoli diema tie nani li dabinli ke o pua taa ki buuni yonyiemutaa, ki sieni hali likuli n pili.»

³⁴ Jesu den waani ku niligu laa bonla kuli leni mi kpanjama. Waa den maadi leni ba kaa pua kpanjama.

³⁵ O den tieni yeni ke o saawalipualo n den maadi yaa maama na n tieni: «N baa yaa maadi leni ba mi kpanjama nni, Ki doagidi yaa bonla n bi wuo hali ŋanduna tagima yogunu.»

Jesu bundi ti moabiaditi kpanjama

³⁶ Li yaa puoli, Jesu den cabi ku niligu ki kua deeni. O ŋoadikaaba den nagini o kani ki yedi o: «Bundi ti po yaa moabiaditi n ye u kuanu nni kpanjama.»

³⁷ O den guani ki yedi ba: «Yua n buli yaa bonbuoli n ŋani yeni tie o Joa Bijua.

³⁸ U kuanu mo tie ŋanduna. Yaa bonbuoli n ŋani tie U Tienu diema bila. Ti moabiaditi tie o Biado yaa bila.

³⁹ Yibali yua n buli ti moabiaditi tie Sutaani. U jetaagu yogunu tie ŋanduna juodima. Bi dipeba mo tie malekinba.

⁴⁰ Nani ban yen ŋabi ti moabiaditi ki juu maama, ŋanduna juodima mo li baa tua yeni.

⁴¹ O Joa Bijua baa soani o malekinba ban taani ki ñani o diema nni, yaaba n tulini bi niba leni yaaba n tiendi mi biadima kuli,

⁴² ki lu ba ku fantanbuogu mu nni, a bubula leni mi ñincegima n baa ye naankani.

⁴³ Lanyogunu, bi niteginkaaba baa yendi nani u yienu yeni, bi Baa diema nni. Yua n pia a tuba ki baa gbadi wan gbadi.

Yaa ŋalimano n wuo kpanjama

⁴⁴ Tanpoli diema go tie nani yaa ŋalimano n den wuo u kuanu nni yeni. O nilo den piidi o ki guani ki wuoni. Lanwani o pamanli po, o gedi ki ban kuadi wan pia yaala kuli ki daa laa kuanu.

Yaa laanu n pia dunpaaga kpanjama

⁴⁵ Tanpoli diema go tie nani yaa kpendo n den lingi yaa laanu n ŋani boncianla.

⁴⁶ Wan den laa laa laanu ke u dunga yabi boncianla, o den gedi ki ban kuadi wan pia yaala kuli ki daa u.

U taalu kpanjama

⁴⁷ Tanpoli diema go tie nani ban luni yaa taalu mi ñincianma nni ki co i janbuoli kuli.

⁴⁸ U yaa gbie, bi yen dadi ki ñani u li boanjaali po, ki kali ki gandi yaa jami n ŋani, ki tieni ti baabuodi nni, ki lu yii n ki ŋani.

⁴⁹ Ŋanduna juodima, li baa tua yeni. Malekinba baa cua ki paadi bi nibiadiba ki ñani ba bi niteginkaaba siiga,

⁵⁰ ki lu bi nibiadiba ku fantanbuogu mu nni, a bubula leni mi ñincegima n baa yaa ye naankani.»

Li bonpanla leni li bonkpelila

⁵¹ O den buali ba: «Naani yi gbadi laa bonla kuli bonŋanla?» Bi den guani ki yedi o: «Mm.»

⁵² O den yedi ba: «Lanwani, li bali maama banda siiga yua n tuo ki gaa yaala n tie tanpoli diema bonla kuli, tie nani yaa diedaano n ñandi o ŋalimano nni li bonpanla leni li bonkpelila kuli.»

Nasareti dogu yaaba yie Jesu

⁵³ Jesu n den pua laa kpanjama kuli ki gbeni, o den fii ki ñani lankani

⁵⁴ ki guani o dandogu nni. O den kua ki bangi li bali maama bangima dieli nni. Li den paki yaaba n gbadi o maama kuli ke bi den tua: «One mo baa mi naa yanfuoma leni mi naa bancianma kuli le?

⁵⁵ Waa tie o kpagikpielo bijua ka? Mariyama ka tie o naa? Jaki, Josefi leni Simon, Juda ka tie o waamu?

⁵⁶ O naataanpola mo kuli ki ye ti siiga? O ñani li naa bonla kuli mo le?»

⁵⁷ Lani, o den tie bi po li tingbali bonla. Jesu den yedi ba: «Bi kan fali saawalipualo kaanto, ke laa tie o dandogu nni leni o diegu nni.»

⁵⁸ Waa den tieni mi bancianma boncianla likani, kelima bi dandanluoma po.