Matie 12 - U TIENU MAAMA TILI 2013

O Joa Bijua n die mi fuodima daali

¹ Lanyogunu Jesu den tagi ki poandi ŋalikama kuani nni U Tienu fuodima daali. Mi koma den pia o ŋoadikaaba ke bi jobidi ŋalikama siandi ki ŋmani.

² Farisieninba n den laa lani, bi den yedi Jesu: «Diidi ki le, a ŋoadikaaba tiendi yaala n kua mi fuodima daali.»

³ Jesu den guani ki yedi ba: «Naani yii cogi Davidi n den tieni yaala mi koma n den cuo o, wani leni yaaba n den ye leni o kuli yo?

⁴ O den kua U Tienu diegu nni ki ŋmani o dupengagidika, ba ke li den kua wani leni yaaba n ye leni o kuli n ŋmani, kelima bi kopadicianba bebe n den pia u sanu ki ŋmani o.

⁵ Bi, naani yii cogi li bali maama nni, ke bi kopadicianba tuuni U Tienu diegu nni mi fuodima daali, ki miidi li daali yeni kuali, ki naa pia lipo tagili?

⁶ N yedi yi, yua n cie U Tienu diegu boncianla ye ne.

⁷ Yi yaa bi bani yaa maama n tie ne yaa bundima: Mi ninñingbadima n mani n po, laa tie a pada ka, yi kan bi jaligi yaa niba n ki pia tagili na.

⁸ O Joa Bijua n die mi fuodima daali.»

Jesu paagi yaa joa yaa nuu n faani

⁹ Jesu den ñani lankani ki gedi ki ban kua bi bali maama bangima dieli nni.

¹⁰ O joa den ye likani ke o nuu faani. Bi den buali Jesu: «Naani li pia u sanu ki paagi o nilo mi fuodima daali?» Li den tie kelima bi bua ki kuli o yo.

¹¹ O den guani ki yedi ba: «Yi niinni ŋme n baa yaa pia peyendo bebe wan baa ku buogu nni mi fuodima daali, ke o kan mubini o ki ñani o lienni?

¹² Ama o nisaalo cie o pia. Lanwani, li pia u sanu ki tieni yaala n ŋani mi fuodima daali.»

¹³ Lani, o den yedi o joa yeni: «Tandi a nuu.» O den tandi u ke u paagi cain nani u lielu yeni.

¹⁴ Farisieninba den ñani ki ban juogi ban baa tieni maama ki teni ban kpa Jesu.

U Tienu n gandi yaa naacemo

¹⁵ Ama Jesu den bandi la ki ñani likani. Bi niba boncianla den ŋua o. O den paagi a yiama kuli,

¹⁶ ki teni ba li ñoamabonli, ke ban da ban waani wan tie yua.

¹⁷ O den tieni yeni ke o saawalipualo Esayi n den pua yaa saawalo n tieni:

¹⁸ «Diidi min gandi n naacemo yua, Wani n buado, n pali n mani yua yaa po boncianla. N baa kuani n Fuoma o niinni, Wan yaa wangi i nibuoli kuli mi teginma.

¹⁹ O kan koani leni oba, O kan tiani ba waamu, Bi kan gbadi o nialu i sani nni.

²⁰ O kan degidi ki dudi yaa ñinmuagu n diegi, O kan gbindi yaa fidisancabigu n ŋubidi, Hali wan baa n teni mi teginma n paadi.

²¹ I nibuoli kuli baa bili bi dugidi o kani.»

Jesu n deli mu cicibiadimu yaa paalu po

²² Lani n pendi, bi niba den cuani Jesu kani yaa cicibiadiga daano n tie juamo ki go tie muulo. Jesu den paagi o, ke o muulo yeni maadi ki go nua.

²³ Li den lidini ku niligu kuli ke bi yedi: «One ki tie Davidi Bijua ka?»

²⁴ Farisieninba n den gbadi lani, bi den yedi: «O naa joa deli mu cicibiadimu kelima Belisebuli yua n tie mu cicibiadimu bado paalu po.»

²⁵ Jesu n den bandi ban maliti yaala yeni, o den yedi ba: «Yaa diema n boagidi ki tuogi leni mi yuli kuli baa bodi. Yaa dogu bi yaa diegu yaa niba n paadi, ki tuogi leni biyaba kuli kan yaa ye.

²⁶ Sutaani yaa deli Sutaani, o tuogi leni o yuli. O diema baa tieni lede ki yaa ye?

²⁷ Li yaa tie ke Belisebuli n puni nni u paalu ke n deli mu cicibiadimu, yi yaa ŋoadikaaba mo deli mu ŋme yaa yeli po yo? Lani yaa po, bi baa jia yi buudi.

²⁸ Ama li yaa tie U Tienu Fuoma Yua yaa paalu po yo ke n deli mu cicibiadimu, lani U Tienu diema pundi hali yi kani.

²⁹ O nilo baa fidi ki kua o gbanmandaano diegu nni lede ki fagi o piama, kaa kpa paadi o ki loli o? Li yaa puole ke o baa fidi ki kua o diegu nni ki fagi o piama.

³⁰ Yua n ki taa n po kuli tie n yieka. Yua n ki todi nni ke n taandi nan yadi wani.

³¹ Li tie lani yaa po ke n yedi yi, bi nisaaliba baa baa sugili bi tuonbiadi leni bi sugidi kuli po, ama yua n sugi U Tienu Fuoma Yua kan baa sugili.

³² Yua n maadi mini o Joa Bijua po yaala n bia baa baa sugili, ama yua n maadi U Tienu Fuoma Yua po yaala n bia, kan baa sugili moala leni yaa yogunu n kpendi kuli.

Bu tibu leni bu bonluonkaala

³³ Tuo mani ke yaa tibu n ŋani, bu bonluonkaala moko baa yaa ŋani. Yaa tibu n kaa ŋani, bu bonluonkaala moko kan yaa ŋani. Bi bandi tibu kuli bu bonluonkaala po yo.

³⁴ Yinba, u waalabi-buolu na, yin bia maama na, yi baa gaa lede ki fidi ki maadi yaa maama n ŋani? O nilo maadi yaala n gbie o pali nne.

³⁵ O niŋamo ñandi yaala n ŋani, o paŋanli nne. O nibiado mo ñandi yaala n bia, o pabiadili nne.

³⁶ N waani yi ke ti buudi daali bi niba baa togidi ban den maadi yaa mafanma kuli.

³⁷ Ŋan maadi yaa maama po, baa teni ban saa a po i moamoani, bi ki cuo ŋa.»

Bi mia Jesu wan tieni mi bancianma

³⁸ Li bali maama banda leni Farisieninba tianba den yedi Jesu: «Canbaa, ti bua ŋan tieni ti po yaa bancianma n tie sinankeene.»

³⁹ O den guani ki yedi ba: «Moala na niba yaaba n bia, ki go ŋaa U Tienu sanŋoadima yeni, miadi sinankeene. Bi kan tieni bi po sinankeentoa, li yàá tie o saawalipualo Jonasi yua yaa ka.

⁴⁰ Nani Jonasi n den tieni danataa leni ñiaditaa o janciamo tugu nni maama, o Joa Bijua moko baa tieni danataa leni ñiaditaa ki tinga nni yene.

⁴¹ Ninivi dogu yaaba moko baa taani ki fii ki sedi leni moala ne niba ti buudi daali ki bu ki cuo ba, kelima Jonasi n den waani ba U Tienu maama, bi den lebidi bi pala. Ama moamoani, yua n cie Jonasi ye ne.

⁴² Yaa diema n ye nuganu po yaa puobado moko baa taani ki sedi leni moala ne niba ti buudi daali, ki bu ki cuo ba, kelima o den ñani hali hali foagima, ki cua ki cengi Salomon yanfuoma maama, ama yua n cie Salomon ye ne.

Ki cicibiadiga guanma

⁴³ Ki cicibiadiga yaa ñani o nilo niinni, ki yen gedi ki ban yaa gaandi yaa fuali n ki pia ñima nni, ki lingi mi fuodima, ki nan kan baa.

⁴⁴ Lanwani, ki baa yedi: ‹N baa lebidi ki guani n dieli po, min den ñani naani.› Ki yaa pundi, ki baa sua ke li tie dieyaanli ki pidi ki ŋanbi.

⁴⁵ Lanwani, ki baa gedi ki ban taa cicibiadimulele, yaamu n bia ki cie kani kiba, mun yegi ki ban kua li niinni ki yaa ye. Laa nilo yeyuankaama baa yaa bia ki cie mi kpiama. Li baa tua yeni moala ne niba yaaba n bia po.»

Jesu naa leni o waamu

⁴⁶ Jesu n den maadi leni ku niligu, o naa leni o waamu den cua ki se niinpo ki bua ki maadi leni o.

⁴⁷ Niyendo den yedi o: «A naa leni a waamu se niinpo ki bua ki maadi leni a.»

⁴⁸ Jesu den guani ki yedi yua n waani o yeni: «Ŋme tie n naa, ŋmenba mo n tie n waamu?»

⁴⁹ O den tandi ki waani o ŋoadikaaba ki yedi: «Diidi, n naa leni n waamu.

⁵⁰ Yua n tuo ki tiendi n Baa yua n ye tanpoli yaa yanbuama, wani n tie n naataanjaga, n naataanpuoga leni n naa.»