Matie 11 - U TIENU MAAMA TILI 2013

Jan Batisi soani o tondiba Jesu kani

¹ Jesu n den tundi o piiga n ŋoadikaliediba laa tundi ki gbeni, o den fii lankani ki suagi liiga, ki baa n yaa bangi U Tienu maama ki wangi o Laabaaliŋamo yaa dogi n ye laa gaanilindima nni.

² Jan n den lo li kpaadidieli nni ki gbadi Kilisiti n tiendi yaala, o den soani o ŋoadikaaba Jesu kani, ke ban buali o:

³ «Naani a tie yua n den baa cua, bi ti da go baa yaa guu nitoa yo?»

⁴ Jesu den guani ki yedi ba: «Guani mani ki ban togidi Jan yin gba ki go nua yaala:

⁵ A juama noadi, a waba cuoni, a gbaada ŋanbidi, a woma gba, bi tinkpiba fiidi, a luoda mo gba o Laabaaliŋamo.

⁶ Li pamanli ye leni min kaa tie yua yaa po li tingbali bonla.» Jan tondiba n den ñani Jesu kani ki ban caa yaa yogunu,

⁷ Jesu den maadi ku niligu Jan maama ki yedi: «Yi den gedi mi fanpienma po ki baa n le be? Yua n tie nani u faalu n liebi yaa ñinmuagu bi?

⁸ Yi den gedi ki baa n le be? Yua n bobi ti tiaŋandi bi? Yaaba n yie ti tiaŋandi wani ye bi badiba diedi nne.

⁹ Yi nan den li gedi ki baa n le be? O saawalipualo bi? Yeni de! Ama n waani yi, ke yin ban laa yua cie baa saawalipualo.

¹⁰ Li tie wani yaa po ke li diani ki yedi: ‹Diidi, n soani n tondo a liiga, Ke wan ŋanbi a sanu.›

¹¹ N waani yi i moamoani, pua n mali yua kuli, yua n cie Jan Batisi daa mali, ama yua mo n wa ki cie tanpoli diema nni, wani n yabi ki cie o.

¹² Ki cili Jan Batisi yogunu ki pundi hali moala, bi niba koa tanpoli diema nni leni u paalu. U paalu danba mo diedi ma.

¹³ Bi saawalipuaba leni li bali maama kuli den pua saawali ki maadi U Tienu diema maama, ki ban pundi hali Jan yogunu.

¹⁴ Yi yaa bua ki tuo, wani n tie Eli yua n den baa cua yeni.

¹⁵ Yua n pia a tuba ki baa gbadi, wan gbadi.

¹⁶ N baa nandi moala ne niba leni be? Bi tie nani yaa bila n kaa ki daaga nni ki maadi leni biyaba ki tua:

¹⁷ ‹Ti piebi yi po mu yelimu, Ke yii jeli ciaga. Ti yiini yi po i kuyani, Ke yi naa mua.›

¹⁸ Jan den cua, waa den di, waa den ñu mo, ke bi tua: ‹O pia ki cicibiadiga.›

¹⁹ O Joa Bijua mo cua ki di ki go ñu, ke bi tua: ‹Diidi, o tie jiejiedo leni dañolo, ki go tie bi lubigaaba leni i tagibiadi danba kuli danli.› Ama mi yanfuoma doagidi mi teginma mi tuona nni.»

Yaa dogi n yie Jesu maama

²⁰ Lani, Jesu den funi leni wan tieni mi bancianma boncianla yaa dogi nni, kelima laa dogi niba naa den lebidi bi pala. O den yedi:

²¹ «Fala baa yaa ye leni fini Korasini dogu. Fala baa yaa ye leni fini Betisayida dogu, kelima yaa bancianma n tieni a niinni ne, yaa den tieni Tiiri leni Sidon dogi nni, bi den baa laa li paboanli tiadi, ki wuli mi fantanpienma bi yula po, ki doagidi ke bi lebidi bi pala hali yogu.

²² Lani yaa po, n yedi yi, ti buudi daali, Tiiri leni Sidon dogi yaa fala kan yaa bia ki pundi yi yaa fala.

²³ Fini, Kafarnawum dogu moko, a tama ke a baa fiini a yuli hali tanpoli bi? Kalam, bi baa jiini a hali bi tinkpiba diema nni, kelima yaa bancianma n den tieni a niinni, yaa den tieni Sodomi dogu nni, u bi baa yaa ye hali dinla.

²⁴ Li tie lani yaa po ke n yedi a, ti buudi daali Sodomi yaa fala kan yaa bia ki pundi a yaa fala.»

Jesu bangima dingi

²⁵ Lanyogunu Jesu den jaandi ki yedi: «N Baa, fini yua n tie tanpoli leni ki tinga kuli Diedo, n pagi a kelima a doagini li naa bonla bi yanfuodanba leni bi nunfandanba kuli po, ki doagidi la yaaba n tie a biwaala po.

²⁶ Yeni de! N Baa, n pagi a kelima a yanjagiŋanli po yo ke a tieni yeni.

²⁷ N Baa puni nni li bonla kuli bali. Oba kuli ki bani Bijua, li yàá tie Baa yaa ka, oba kuli mo ki bani Baa, li yàá tie Bijua leni wani Bijua n bua ki doagidi o yua yaa po yaa ka.

²⁸ Cua mani n kani, yinba yaaba n tugi a tugikpiaga ki coagi kuli, n baa pa yi mi fuodima.

²⁹ La mani n naakpakpaadi-daagu, ki gaa n bangima, kelima n dingi ki pia li yumiinli, yeni yi baa baa mi fuodima yi naani po.

³⁰ N naakpakpaadi-daagu faali, n tugili mo yua.»