Matie 1 - U TIENU MAAMA TILI 2013

Jesu yaajanba, o madi leni tanpoli diema maama 1—4 Jesu yaajanba

¹ Jesu Kilisiti yaajanba yela togida n tie ne: Jesu Kilisiti tie Davidi bijua, ke Davidi mo tie Abalahama puoliŋuanu.

² Abalahama den mali Isaaka, Isaaka n maa Jakob, Jakob n maa Juda leni o kpeliba leni o waamu.

³ Juda den taa Tamari ki mali Peretisi leni Sela, Peretisi n maa Etisilomo, Etisilomo n maa Arami,

⁴ Arami n maa Aminadabi, Aminadabi n maa Nasoni, Nasoni n maa Salimon.

⁵ Salimon den taa Rahabi ki mali Boasi. Boasi den taa Ruti ki mali Obedi,

⁶ Obedi n maa Isayi, Isayi n maa o bado Davidi. Davidi den taa Uri pua ki mali Salomon,

⁷ Salomon n maa Roboami, Roboami n maa Abia, Abia n maa Asa,

⁸ Asa n maa Josafati, Josafati n maa Jorami, Jorami n maa Osiasi,

⁹ Osiasi n maa Yotam, Yotam n maa Akasi, Akasi n maa Esekiasi,

¹⁰ Esekiasi n maa Manase, Manase n maa Anmoni, Anmoni n maa Josiasi,

¹¹ Josiasi n maa Jekonia leni o waamu. Li den tie Babilonni yaaba n den paadi Isidayeli yaaba yaa yogunu, ki cuo ba ki gedini ti yonbidi bi diema nni.

¹² Isidayeli yaaba yonbidi Babilonni diema nni n pendi, Jekonia den mali Salatieli, Salatieli n maa Sorobabeli,

¹³ Sorobabeli n maa Abiyudi, Abiyudi n maa Eliakim, Eliakim n maa Asori,

¹⁴ Asori n maa Sadoki, Sadoki n maa Akima, Akima n maa Eliyudi,

¹⁵ Eliyudi n maa Eleasari, Eleasari n maa Matana, Matana n maa Jakob,

¹⁶ Jakob n maa Josefi, Mariyama yua n den mali Jesu Kilisiti calo.

¹⁷ Ki cili Abalahama ki yaa caa hali Davidi, li pia piiga n nifiiminaa. Ki cili Davidi ki yaa caa hali Babilonni cuonu mo, piiga n nifiiminaa. Ki cili Isidayeli yaaba yonbidi Babilonni diema nni ki yaa caa hali U Tienu n Gandi Yua cuama, mo tie piiga n nifiiminaa.

Jesu Kilisiti madi

¹⁸ Diidi Jesu Kilisiti madi n den tua maama. O naa Mariyama n da den tie Josefi toginaa hali ke bi daa den taani leni biyaba, Mariyama den ti sua ke o punbi kelima U Tienu Fuoma Yua paalu po.

¹⁹ O togibaa Josefi yua n den tie niteginka, naa den bua ki fiagi o asala nni. Lani yaa po, o den jagi ke o baa paadi leni o ŋasiili nni.

²⁰ Wan den maliti yeni yaa yogunu, o Diedo maleki den doagidi o kani ti dangidi nni, ki yedi o: «Josefi, Davidi bijua, ŋan da jie ki taa Mariyama wan tua a pua, kelima wan punbi yaa biga, o punbi ga kelima U Tienu Fuoma Yua paalu po yo.

²¹ O baa maa bonjaga, ŋan yini o Jesu, kelima wani n baa faabi o buolu yaaba leni bi tuonbiadi.»

²² Lani kuli den tieni ki bua ki kuani o Diedo n den tuodi ki teni ke o saawalipualo pua yaa saawalo:

²³ «Diidi, li puowandiali baa punbi ki maa bonjaga. Bi baa yini o Emanueli.» Laa yeli bundima n tie “U Tienu ye leni ti.”

²⁴ Josefi n den fundi, o den tieni o Diedo maleki n waani o yaala. O den taa o pua.

²⁵ Ama waa den taani leni o hali wan ban mali o biga. Josefi den yini o Jesu.