Marki 9 - U TIENU MAAMA TILI 2013

¹ O go den yedi ba: «N waani yi i moamoani, yaaba n ye nekanba siiga bi tianba kan kpe kaa laa ke U Tienu diema cua leni u paalu.»

Jesu lebidi cain

² Danaluoba n den pendi, Jesu den taa Pieli leni Jaki leni Jan, bani bebe ke bi piadi ki doni yaa juali n kpedi yuli po. O den lebidi bi nintuali.

³ O tiayiekaadi den pendi paipai ki ñuliti boncianla, hali maama ke li tiaŋuudo daa ye ŋanduna nni, ki baa fidi ki pendi ti yeni.

⁴ Eli leni Musa den doagidi bi kani ki maadi leni Jesu.

⁵ Pieli den yedi Jesu: «Canbaa, li ŋani tin yaa ji ye ne. Tin tii sugataa, fini yenli, Musa yenli, Eli mo yenli.»

⁶ Waa den bani wan baa maadi yaala, kelima ti jawaandi po.

⁷ Ku tawaligu den libini ba, u nialu den maadi ku tawaligu nni, ki yedi: «One n tie n Bibuadiga, cengi mani o!»

⁸ Lanyogunu, bi ŋoadikaaba den diidi ki lindi, baa laa kuli toa, se Jesu bebe.

⁹ Ban den ji li juali, Jesu den yedi ba ke ban da waani oba kuli ban laa yaala, hali o Joa Bijua n baa fii bi tinkpiba siiga.

¹⁰ Bi den tieni wan yedi yaala. Ama bi den buali biyaba: «Bi tinkpiba fiima bua ki yedi be yo?»

¹¹ Bi den buali Jesu: «Be yaa po ke li bali maama banda tua ke li tie tiladi Eli n kpa cua?»

¹² O den guani ki yedi ba: «Li tie moamoani ke Eli baa kpa cua ki ŋanbi li bonla kuli. Li nan gaa lede ke li diani ke o Joa Bijua baa le fala boncianla, ban go fali o mo?

¹³ N waani yi ke Eli cua no, ama bi soani o ban bua maama, nani lan den diani o po maama.»

Jesu ñani ki cicibiadiga o jawaalo niinni

¹⁴ Ban den pundi yaa ŋoadikaaba n sieni kani, bi den laa ke yaa niligu n yabi lindi ba, ke li bali maama banda nia leni ba.

¹⁵ Ku niligu kuli n den laa Jesu, li den paki ba. Bi den tiini ki kpendi ki fuondi o.

¹⁶ O den buali o ŋoadikaaba: «Yi nia leni ba be yaa maama po yo?»

¹⁷ Ku niligu siiga yendo den guani ki yedi o: «Canbaa, n cuani n biga a kani, kelima ki cicibiadiga ye o niinni ke o tie muulo.

¹⁸ Ki yaa fii o po naankani kuli, ki yen guli o tiipo, ti ñinsanpunpudi n yaa ña o ñoabu nni, wan yaa kadi o ñina ki kuodi. N bi mia a ŋoadikaaba n deli ki ñani ga o niinni, ke baa fidi.»

¹⁹ Jesu den guani ki yedi ba: «Yinba yaa niba n ki pia dandanli yeni, n baa yaa taa ki ye leni yi ki pundi u laa yogunu? N baa juuni leni yi ki pundi u laa yogunu yo? Cuani mani ki biga n kani na.» Bi den cuani ki biga o kani.

²⁰ Ki biga n laa Jesu yaa yogunu, ki cicibiadiga den digibi o leni u paalu, ke o baa ki bilini ke ti ñinsanpunpudi ña o ñoabu nni.

²¹ Jesu den buali ki biga baa: «Li naa bonla den cili o hali u laa yogunu yo?» O den guani ki yedi o: «Hali o biwaama nni.

²² Yogunu boncianla, ki yen lu o u mu nni, yaa ka mi ñima nni, ki bua ki bolini o. Ama a yaa baa fidi ki tieni bonliba, ŋan gbadi ti ninñima, ki faabi ti.»

²³ Jesu den yedi o: «Be yaa po ke a yedi: ‹A yaa baa fidi?› Li bonla kuli dingi yua n daani po.»

²⁴ Lanyogunu ki biga baa den kpaani ki yedi: «N daani! Faabi nni leni n dandanluoma!»

²⁵ Jesu n den laa ke ku niligu tiini ki taagi bi kani, o den funi leni ki cicibiadiga, ki yedi ga: «Fini ki cicibiadiga, yaaga n muu ki go womi na, n yedi a: ‹Ña ki biga na niinni, ki da go kua abada.› »

²⁶ Ki cicibiadiga den tiani, ki digibi ki biga boncianla, ki ñani ki niinni ki ŋaa ga. Ki biga den tua nani ki kpe yeni, hali ke bi nitianba den tua ke ki kpe.

²⁷ Ama Jesu den cuo o nuu, ki fiini ki sieni o.

²⁸ Jesu n den ban kua li dieli nni, ke wani leni o ŋoadikaaba ye bi bebe, bi den buali o: «Be yaa po ke tinba wani naa fidi ki deli ki naa cicibiadiga?»

²⁹ O den yedi ba: «Ki naa cicibiadiga buolu kan tuo ki ña, li yàá tie leni jaandi yaa ka.»

Jesu go pua saawali ke o baa kpe ki go fii

³⁰ Bi den fii lankani ki poandi Galile. Jesu naa den bua oba kuli n bandi bi cenli,

³¹ kelima o den bangi o ŋoadikaaba ki tua ba: «Bi niba baa janbi o Joa Bijua ki teni o bi nisaaliba. Bi baa kpa o. Ama o kuuma dataali, o go baa fii bi tinkpiba siiga.»

³² Bi ŋoadikaaba naa den bandi mi maama yeni fuuli, ama bi den jie kaa buali o lipo liba.

Yua n tugi li yuli

³³ Ban den pundi Kafarnawum dogu nni, Jesu n den ye li dieli nni leni ba, o den buali ba: «Yi bi nia be u sanu po?»

³⁴ Bi den ŋmini, kelima u sanu nni bi den nia leni biyaba ki bua ki bandi bi siiga yua n tugi li yuli.

³⁵ Lani, Jesu den kali ki yini bani bi piiga n niliediba yeni, ki yedi ba: «Yua n bua ki tua liiga yua, se wan kpa tua puoli yua, ki go tua bi niba kuli naacemo.»

³⁶ Lani, o den taa ki biwaaga ki sieni ga bi siiga, ki yuandi ki taa ga ki ŋmabi, ki yedi ba:

³⁷ «Yua n ga a bila ne siiga ba biyenga cangu kelima n yeli nni, o gaa mini n ba yaa cangu yo. Yua n gaa n cangu mo, waa gaa n yaa cangu ka, ama o gaa yua n soani nni yaa cangu yo.»

Yua n kaa yie Jesu kuli tie ti yua

³⁸ Jan den yedi o: «Canbaa, ti den laa yaa joa n deli mu cicibiadimu a yeli nni, ke ti yie o po kelima waa ŋua ti.»

³⁹ Jesu den guani ki yedi o: «Da go yie mani o po, kelima niloba ki ye ki baa tieni mi bancianma n yeli nni, ki go maadi n po yaala n bia lanyogunu.

⁴⁰ Yua n kaa koani leni ti kuli, taa ti yaa po yo.

⁴¹ N waani yi i moamoani, yua n puni yi mi ñima ke yi ñuni kelima n yeli po, bi kelima yi tie Kilisiti n die yaaba po, o kan luo o yaa panpaani.»

Mi tulinma n bia maama

⁴² Jesu go den yedi: «Ama yua n baa teni yaa bonwaamu n daani nni na siiga ba yendo n tudi, li baa yaa ŋani ki cie landaano po ban lani o li naacianli ki lu o mi ñincianma nni.

⁴³ A nuu yaa teni ke a tiendi ti tuonbiadi, ŋan jia u. A yaa baa yaa miali n kan gbeni ki pia nuyendu, li baa yaa ŋani a po ki cie ŋan yaa pia niilie, ban nan lu ŋa ku fantanbuogu nni, yaa mu n kan gbindi niinni, [

⁴⁴ yaa sidibila n lugi bi niba ki kan kpe leni yaa mu n kan gbindi abada n ye naankani.]

⁴⁵ A taali mo n yaa teni ke a tiendi ti tuonbiadi, ŋan jia li. A yaa pia yaa miali n kan gbeni ki pia taayenli, li baa yaa ŋani a po ki cie ŋan yaa pia taanalie, ban nan lu ŋa ku fantanbuogu nni,

⁴⁶ [yaa sidibila n lugi bi niba ki kan kpe leni yaa mu n kan gbindi abada n ye naankani.]

⁴⁷ A nunbu mo n yaa tie a po tingbali bonla, ŋan logidi bu. A yaa pia nunyenbu ki kua U Tienu diema nni, li baa yaa ŋani a po ki cie ŋan yaa pia nunilie ban nan lu ŋa ku fantanbuogu nni,

⁴⁸ yaa sidibila n lugi bi niba ki kan kpe leni yaa mu n kan gbindi abada n ye naankani.

⁴⁹ U mu baa kua ki saali bi niba kuli nani mi yaama yeni.

⁵⁰ Mi yaama mani, ama mi yaa ti luo mi manu, yi baa taa be ki go mangi ma? Yaa ye mani leni yiyaba leni mi yanduanma.»