Marki 8 - U TIENU MAAMA TILI 2013

Jesu dini niba tudanaa

¹ Laa dana nni, ku niligu n go den taani boncianla, kaa pia ban baa je yaala. Jesu den yini o ŋoadikaaba ki yedi ba:

² «Mi ninñima cuo nni ku naa niligu po, kelima danataa ke bi ye n kani, baa go pia ban baa je yaala.

³ N yaa cabi ba leni mi koma ke ban kuni, bi baa gbali u sanu nni, kelima bi tianba ñani hali foagima.»

⁴ O ŋoadikaaba den guani ki yedi o: «O nilo baa fidi ki baa yaa jiema n baa dagidi bine kuli po li naa fuali nni?»

⁵ Jesu den buali ba: «Yi pia dupenbiŋa yo?» Bi den guani ki yedi o: «Bonbilele.»

⁶ Jesu den teni ke ku niligu kali kali tiipo, ki taa bi dupenleleediba ki tuondi U Tienu, ki cabidi cabidi ki teni o ŋoadikaaba ban boagidi ku niligu, ke bi den boagidi.

⁷ Bi go den pia janbimuba moko. Jesu go den tuondi U Tienu mu po, ki teni ban boagidi muni mo.

⁸ Bikuli den dini ki guo. Bi den wodi ban dini ki sieni yaa boncaba ki gbieni baabuodilele.

⁹ Bi den bua ki pundi niba tudanaa (4 000). Jesu n den cabi ba yaa yogunu,

¹⁰ o den kua ku ñinbiagu nni wani leni o ŋoadikaaba, ki duodi ki gedi Dalimanuta tinbuoli nni.

Farisieninba mia mi bancianma

¹¹ Farisieninba den cua ki nia leni Jesu ki mia o wan tieni yaala n tie sinankeene ke o paalu ñani U Tienu kani. Bi den yedi yeni, ki bua ki dia o ku madiagu.

¹² Jesu den fuo ki jiini ki yedi: «Be n teni ke moala ne niba lingi sinankeene yeni? N yedi yi i moamoani, bi kan tieni moala ne niba po sinankeene.»

¹³ Lani, o den fii ki ŋaa ba, ki go kua ku ñinbiagu nni, ki duodi ki gedi napo yaa boanjaali.

Farisieninba leni Herodi kuli bangima

¹⁴ Bi ŋoadikaaba den sundi kaa taa dupen. Baa den pia jetoama ku ñinbiagu nni, kali dupenyendo bebe.

¹⁵ Jesu den tundi ba ki yedi: «Fangi mani yi yula bonŋanla leni Farisieninba leni Herodi dabinli.»

¹⁶ O ŋoadikaaba den bungi ki yedi biyaba: «Li tie ke tin kaa pia dupen yeni yaa po yo.»

¹⁷ Jesu den bandi la ki yedi ba: «Be yaa po ke yi bungi ki tama ke n maadi yeni, kelima yii pia dupen po? Yi daa kpaagi ki faami hali moala?

¹⁸ Yi yama baa ki pii yo? Yi pia i nuni ki naa nua yo? Yi pia a tuba ki naa gba yo? Naani yii tiani?

¹⁹ Min den taa bi dupenmuudiba ki cabidi cabidi ki boagidi a nitudimuuda, yi den taani yaa boncaba n sieni baabuodi ŋa?» Bi den guani ki yedi o: «Piiga n bondilie.»

²⁰ «Min go den taa bi dupenleleediba ki cabidi ki boagidi a nitudinaada, yi den taani yaa boncaba n sieni baabuodiŋa?» Bi den guani ki yedi o: «Bondilele.»

²¹ O den yedi ba: «Yi daa kpaagi ki bandi hali moala yo?»

Jesu noadi o juamo Betisayida dogu nni

²² Jesu leni o ŋoadikaaba n den pundi Betisayida, bi niba den cuani o juamo Jesu kani, ki mia o ke wan sii o.

²³ O den cuo o juamo nuu ki dadi ki ñani o u dogu nni. O den sii o ñinsandi o juamo nuni nni ki maani o po o nii, ki buali o o yaa nua bonla.

²⁴ O den ŋubidi ki noanli ki yedi: «N nua bi niba, ama n nua ba ke bi tie nani i tiidi yeni ki cuoni.»

²⁵ Jesu go den maani o nii o nuni po, ke o juamo den nudi ki noanli ki laa li bonla kuli cain. O den paagi.

²⁶ Jesu den cabi o wan kuni o denpo, ki maadi o ki yedi: «Da go kua u dogu na niinni.»

Pieli kadi ki waani ke Jesu n tie Kilisiti

²⁷ Jesu leni o ŋoadikaaba den suagi liiga ki caa Filipi yaa Sesare dobila nni. Ban den ye u sanu nni o den buali ba: «Bi niba tua ke n tie ŋme?»

²⁸ Bi den guani ki yedi o: «Bi tianba tua ke a tie Jan Batisi, bine ke a tie Eli, bine mo ke a tie bi saawalipuaba siiga nni yendo.»

²⁹ Ama o den buali bani bi ba: «Yimo te, yimo nan yedi ke n tie ŋme yo?» Pieli den guani ki yedi o: «A tie U Tienu n Gandi Yua.»

³⁰ Jesu den teni ba li ñoamabonli ki yedi ba, ke ban da waani oba wan tie yua.

Jesu pua saawali ke o baa kpe ki go fii

³¹ Lanyogunu Jesu den bangi o ŋoadikaaba ke li tie tiladi o Joa Bijua n le fala boncianla, ke a nikpela leni bi kopadicianba yudanba leni li bali maama banda n yie o, ki teni ban kpa o. Ama o kuuma dataali po, o go baa fii bi tinkpiba siiga.

³² O den kadi ki waani ba laa bonla. Pieli den piadi o, ki funi leni o.

³³ Ama Jesu den jigidi ki diidi yaa ŋoadikaaba n sieni, ki funi leni Pieli ki yedi: «Ña n puoli, Sutaani, kelima a yantiana naa tie U Tienu ya, ama bi nisaaliba yaa yantiana.»

O nilo n baa ŋoadi Jesu maama

³⁴ Lani, Jesu den yini ku niligu ke bi nagini o kani ki taani leni o ŋoadikaaba ke o yedi ba: «Yua n bua ki yaa ŋua nni kuli, wan yie o yuli, ki taa o dapoanpoanli ki bugi, ki nan yaa ŋua nni.

³⁵ Yua n bua ki gaa o miali baa biani li. Ama yua n baa pa o miali n yaa po leni o Laabaaliŋamo po kuli, go baa baa li.

³⁶ O nilo yaa baa ki diedi ŋanduna kuli ke o naano nan bodi, li baa ŋanbi o po be?

³⁷ O nilo baa pa be ki lebidi o naano?

³⁸ Yua n jie i fe n po leni n maama po bi naa niba, yaaba n tie tuonbiadi danba ki go conbi yeni siiga, o Joa Bijua mo baa jie laa nilo po i fe, o yaa ti cua o Baa kpiagidi nni, ki yegi leni yaa malekinba n gagidi ki ŋani yaa yogunu.»