Marki 7 - U TIENU MAAMA TILI 2013

Jufinba danbogida

¹ Farisieninba leni li bali maama banda bi tianba, yaaba n den ñani Jerusalemi, den taani ki cua Jesu kani.

² Bi den laa ke o ŋoadikaaba bi tianba di leni i nijoagimi kaa nidi.

³ Li tie ke Farisieninba leni yaa Jufinba n sieni kuli kan je, kali ban kpa nidi bonŋanla, kelima bi ŋua bi maasuagu.

⁴ Bi yaa go ñani ki daaga po ki kpeni, bi kan je kali ban kpa taa mi ñima, ki ŋanbi bi baa ki ñani li kuali. Bi go kubi danbogiditoana boncianla, nani ya n tie ne, mu tadiñokaamu, a cuana leni ti kumoandi tadimu kuli ŋuudima.

⁵ Farisieninba leni li bali maama banda yeni den buali Jesu: «Be n teni ke a ŋoadikaaba ki kubi ti nikpiaba bogida, ki di leni i nijoagimi?»

⁶ Jesu den guani ki yedi ba: «Yinba palalie danba, Esayi n den pua yi po yaa saawalo na tie moamoani. O den yedi: ‹Bi naa niba jigindi nni leni bi ñoacuuna, Ama bi pala foagi leni nni.

⁷ Bi jaandi nni fanma fanma, Ki bangi yaa bangima N tie bi nisaaliba yaa mabilikaama bebe.›

⁸ Yi ŋaa U Tienu bali maama, ki nan ŋua bi nisaaliba jaanma bogida.»

⁹ O go den yedi ba: «Yin luni U Tienu Maama ki ŋua yi bogida yeni,

¹⁰ Musa den yedi: ‹Jigini a baa leni a naa,› ki go yedi: ‹Yua n soli o baa yaa ka o naa, ban kpa o.›

¹¹ Ama yinba, yi yedi ke o nilo yaa yedi o baa, bi o naa, ke wan den baa todi ba leni yaala tie yaa paabu n gagidi U Tienu po, ban yi yaabu “kolibana.”

¹² Lani, yi kan go tuo wan todi o baa bi o naa liba kuli.

¹³ Yeni yi luni U Tienu Maama leni yin gaa yaa bogida, ki bangi nitoaba ban yaa tiendi yeni. Yi go kubi bontoala ke li yabi ki naani leni la.»

Yaala n joagindi o nisaalo

¹⁴ Jesu go den yini ku niligu ke bi nagini o kani ke o yedi ba: «Yikuli n cengi mani nni ki bandi line.

¹⁵ Laa tie yaala n ki ye o nisaalo nni kuli ka baa kua o niinni ki joagini o. Ama yaala n ye o niinni ki ña yeni, lani n joagini o.

¹⁶ Yua n pia a tuba ki baa gbadi, wan gbadi.»

¹⁷ Jesu n den fii ku niligu kani ki kua li dieli nni, o ŋoadikaaba den buali o mi kpanjama yeni bundima.

¹⁸ O den yedi ba: «Yimoko, yii pia yanfuoma yo? Yii bani ke puu kuli ki ye niinpo ki baa kua o nilo niinni, ki fidi ki joagini o?

¹⁹ Laa bonla kan kua o pali nni, ama o tugu nni, ki go baa ña.» Jesu n den yedi yeni, o den doagidi ke jiemiba kuli kan joagini o nilo.

²⁰ O go den yedi: «Yaala n ye o nisaalo pali nni ki ña, lani n joagini o.

^21-22 O nisaalo pali nne ke ti yanmaalibiadi ña. Lani n tie: Mi conconma buoli kuli, bu subu, mi kukpama, mi ŋalimanbuama, ku tugutongu, i janbi, ti tuonjoagindi tienma, li nunponbiadili, u nisugidu, ti japaadi leni mi yanpiima kuli.

²³ Laa bonbiadila kuli ña o nisaalo nni, ki joagindi o.»

Kanana buolu pua dandanli

²⁴ Jesu den fii lankani, ki gedi Tiiri tinbuoli nni. O den kua o candeni kaa bua oba kuli n bandi ke o ye likani, ama waa den fidi ke baa bandi.

²⁵ Yaa pua ke ki cicibiadiga den ye o bisalo niinni, den gbadi ke bi maadi Jesu maama. O den cua ki gbaani o taana kani.

²⁶ Laa pua den tie Gireki, Fenisi yua, Siiri diema yaa tinbuobiga. O den mia Jesu ke wan deli ki ñani ki cicibiadiga o bisalo niinni.

²⁷ Jesu den yedi o: «Cedi a bila n kpa je ki guo, kelima laa ŋani o nilo n taa a bila jiema, ki lu a sangbanbila.»

²⁸ O pua yeni den guani ki yedi o: «Yeni de! Canbaa, die yaa sangbanbila n laabi u saajekaanu kani, yen di a bila jejoagidi.»

²⁹ Jesu den yedi o: «Ŋan maadi yaa maama na po, fii ki kuni, ki cicibiadiga ñani a bisalo niinni.»

³⁰ O pua yeni n den ñani ki kuni o denpo, o den ban sua ke ki cicibiadiga ñani o biga niinni, ke o dua u duanu po.

Jesu paagi o womo

³¹ Jesu den fii Tiiri tinga nni ki tagi Sidon, ki go lindi ki tagini Dekapoli diema, ki ñani ki ban caa Galile ñincianma po.

³² Bi niba den cuani o kani o womo, ke mi maama pa o po. Bi den mia o ke wan maani o nii o po.

³³ Jesu den taa o ki piadi ki foagidi leni ku niligu, ki tuuni o nibila o womo tuba nni, ki go taa o ñinsandi ki sii o womo lanbu.

³⁴ Lani, o den yaadi ki noanli tanpoli po, ki fuo ki jiini ki yedi: «Efata,» lani tie: “Pigidi.”

³⁵ Lanyogunu liga, o womo tuba den pigidi, o lanbu mo n tabidi, wan ji yaa maadi bonŋanla.

³⁶ Jesu den yedi ba ke ban da maadi niloba laa bonla, ama wan den tua ban da maadi ki pugidi yo, ke bi mo den kpaani wan tieni yaala ki pugidi.

³⁷ Li den paki ba hali boncianla, ke bi tua: «O bontienkaala kuli ŋani. O tendi ba ke a woma gba, ke a muula mo maadi.»