Marki 6 - U TIENU MAAMA TILI 2013

Nasareti dogu yaaba yie Jesu

¹ Jesu den fii ki ñani likani, ki guani o dandogu nni. O ŋoadikaaba den yegi leni o.

² U Tienu fuodima daali n den pundi, o den kua li bali maama bangima dieli nni ki bangi. Yaa niba n yabi den cengi o maama ke li paki ba ke bi tua: «One mo baa li naa bonla le? O baa mi naa yanfuoma kuli le? O gaa lede ki tieni mi naa bancianma leni o nii?

³ O kpagikpielo ka? Mariyama bijua ka? Jaki, Jose, Jude leni Simon yaa kpelo ka? O naataanpola ka ye ti siiga ne?» Lani, o den tie bi po li tingbali bonla.

⁴ Jesu den yedi ba: «Bi kan fali saawalipualo kaanto, kali o dandogu, leni o kpiiba siiga leni o diegu nni.»

⁵ Waa den fidi ki tieni likani banciantoama, li yàá tie wan maani o nii a yiama waamu po, ki paagi ba.

⁶ Bi dandanluoma den paki o. Jesu den goadi li dobila nni, ki bangi bi niba o Laabaaliŋamo.

Jesu soani o piiga n tondiliediba

⁷ Lanyogunu, o den yini bi piiga n niliediba, ki cili ki tuuni ba nibilie lie, ki puni ba u paalu mu cicibiadimu po.

^8-9 O den yedi ba ke ban da taa bontoala li sancenli po, kali u gbiamu bebe, ban da taa jiema, ki da taa boagili, ki da taa ligi mo. Ban pili bi cacaadi, ki da taa liadalie.

¹⁰ O go den yedi ba: «Yi yaa cani yaa diegu nni kuli, yin da ña lienni, hali yin baa n fii laa dogu nni.

¹¹ Bi yàá tuo ki gaa yi cangu, kaa cengi yi maama naankani kuli, yin ña likani yaa yogunu, yin kpia mani yi taatama laa dogu po, lan tua siedi bi yiema po.»

¹² Bi den fii ki gedi, ki ban wangi bi niba, ke ban lebidi bi pala.

¹³ Bi den deli mu cicibiadimu boncianla, ki go sogini yaa yiama n yabi mi kpama ki paagidi ba.

Jan Batisi kuuma

¹⁴ O bado Herodi den gbadi ke bi maadi Jesu maama, kelima o yeli den ñani boncianla. Bi nitianba den tua: «Jan Batisi n guani ki fii bi tinkpiba siiga. Lani n teni ke o tuuni leni u naa paalu ki tiendi mi bancianma yeni.»

¹⁵ Bine den tua: «Li tie Eli yo.» Bi tianba mo den tua: «Li tie bi saawalipuaba siiga yendo.»

¹⁶ Herodi n den gbadi lani, o den yedi: «Li tie Jan, min den jia yua yaa yuli yeni, n fii bi tinkpiba siiga.»

¹⁷ Li den sua ke puoli po Herodi den cuo Jan ki loli o ki luoni o li kpaadidieli nni, kelima wan den fie o waalo Filipi pua Herodiasi, ke o tua o pua yeni yaa po.

¹⁸ Jan den tua Herodi: «Laa ŋani ŋan taa a waalo pua.»

¹⁹ Lani yaa po, Herodiasi pali den be Jan po, ke o den bua ki teni ban kpa o. Ama o kan den fidi,

²⁰ kelima wani Herodi den fangi Jan, ki kubi o ke liba n da tieni o, kelima o den bani ke Jan tie yaa nilo n tiegi ki go tie nigagidiŋamo. O yaa den gba Jan tundi yaa yogunu, o yama yen lengidi, ama ba yeni o den cengi o maama leni li pamanli.

²¹ Ama Herodi maadaali den pundi, ki teni ke Herodiasi baa u sanu, ki baa tieni wan bua yaala. Herodi den tieni mi jaanjiema boncianla, ki yini o koanbala, o toatieba yudanba leni Galile diema nikpiaga kuli.

²² Herodiasi bisalo den kua li nitaanli yeni siiga, ki jeli ki ciaga ki mangi Herodi pali leni o nitaankaaba kuli pala. O bado den yedi o jafaano yeni: «Mia nni ŋan bua yaala kuli, n baa pa ŋa la.»

²³ O go den poli ki yedi: «Ŋan mia nni yaala kuli n baa pa ŋa, ba li yaa tie n diema boagidima, n baa pa ŋa.»

²⁴ O jafaano den ñani ki ban buali o naa: «Min mia be?» O naa den guani ki yedi o: «Jan Batisi yuli!»

²⁵ Lanyogunu, o jafaano den jaligi ki guani ki kua o bado kani, ki mia o ki yedi: «N bua ŋan tieni Jan Batisi yuli ku taditialigu nni moala ne, ki pa nni.»

²⁶ O bado pali den biidi boncianla, ama nani wan den poli bi nitaankaaba siiga yeni, waa den bua ki yie o po.

²⁷ Lanyogunu liga, o den soani li minteeli ke wan gedi ki ban jia Jan Batisi yuli ki cuani.

²⁸ Li minteeli yeni den gedi ki ban jia Jan yuli li kpaadidieli nni, ki tieni ku taditialigu nni ki cuani ki teni o jafaano, o jafaano mo n teni li o naa.

²⁹ Jan ŋoadikaaba n den gbadi lani, bi den cua ki taa o tinkpilo ki ban kuani o li takuli nni.

Jesu dini niba tudamuu

³⁰ Jesu tondiba den guani ki taani o kani, ki togidi o ban den tieni yaala leni ban bangi bi niba yaala kuli.

³¹ Yaaba n den caa bi kani leni yaaba n goa, den yabi hali maama ke baa den pia lenli ki baa je. Lani, Jesu den yedi ba: «Cua mani tin piadi ti bebe ki gedi bi niba n ki ye naani, yin fuodi waamu.»

³² Bi den kua ku ñinbiagu nni, ki piadi ki gedi bi bebe bi niba n ki ye naankani.

³³ Bi niba boncianla den laa ke bi caa ki bandi ba. Bi niba den ña i dogi nni kuli, ki sani ki kpa pundi ban caa naankani ke bi daa cua.

³⁴ Jesu n den ñani ku ñinbiagu nni, o den laa ke bi niba ladi ki ban caa. Mi ninñima den cuo o, kelima bi den tie nani yaa pe n ki pia yankpaalo yeni. Lanyogunu o den cili ki bangi ba yaa bonla n yabi.

³⁵ U yienu n den bua ki baa, o ŋoadikaaba den nagini o kani ki yedi o: «Ne tie fuali, u yienu mo baa.

³⁶ Cabi ba, ban yadi ki gedi yaa dobila leni yaa koajaana n kuu, ki ban daa bi yula po li bonjekaala.»

³⁷ O den guani ki yedi ba: «Pa ba mani yi baa ban je.» Bi den guani ki yedi o: «Naani ti baa n da kujapiena kobilie dupen, ki fidi ki dini ba?»

³⁸ Jesu den yedi ba: «Yi pia dupen bonbiŋa yo? Gedi mani ki ban le.» Ban den bandi, bi den yedi: «Dupen bonbimuu leni jamilie.»

³⁹ O den yedi ba ke ban teni bi niba kuli n kali caga caga ti moasoangidi po.

⁴⁰ Bi den kali ki caligi kobiga kobiga leni piimuu muu.

⁴¹ Jesu den taa bi dupenmuudiba leni i janliedi ki yaadi ki noanli tanpoli po, ki tuondi U Tienu, ki cabidi cabidi dupen, ki teni o ŋoadikaaba ban boagidi ku niligu. O go den boagidi i janliedi mo ke bikuli baa.

⁴² Bikuli den dini ki guo.

⁴³ Bi den wodi ban dini ki sieni yaa dupencaba leni yaa janjena, ki gbieni piiga n baabuodilie.

⁴⁴ Yaaba n den ŋmani dupen yeni den tie jaba tudamuu (5 000).

Jesu cuoni u ñingbanu po

⁴⁵ Li yaa puoli, Jesu den fiini o ŋoadikaaba ke bi kua ku ñinbiagu nni, ki gaa o liiga, ki baa duodi ki gedi napo boanjaali Betisayida dogu po, hali wan baa cabi ku niligu.

⁴⁶ Wan den cabi ba, o den doni li juali po ki baa jaandi.

⁴⁷ Ku ñiagu n den bii, bi ŋoadikaaba den ye ku ñinbiagu nni mi ñincianma siiga, ke Jesu ye li jaali po obebe.

⁴⁸ O den laa ke bi kudi ku ñinbiagu leni fala, kelima ku faagu togidi ba. Lan den bua ki pundi o kooton-muayuamo, o den cuoni u ñingbanu po, ki kpendi bi kani ki balini ki baa pendi ba.

⁴⁹ Ban den laa o ke o cuoni u ñingbanu po yeni, bi den tama ke li tie jiingu ke bi kuudi.

⁵⁰ Bikuli den nua o ke ti jawaandi cuo ba. Jesu den jaligi ki yedi ba: «Duani mani yi yama. Mine. Yin da jie mani.»

⁵¹ O den kua bi kani ku ñinbiagu nni, ke ku faagu cuo ki sedi. Li den paki ba hali boncianla,

⁵² kelima baa den tiani ki kpaagi Jesu n den tieni yaa bancianma leni bi dupenmuudiba, kelima bi pala den juagi.

Jesu paagi a yiama Jenesareti diema nni

⁵³ Ban den duodi mi ñincianma, bi den pundi Jenesareti diema nni, ki sieni ku ñinbiagu.

⁵⁴ Ban den ñani ku ñinbiagu nni yaa yogunu, bi niba den laa Jesu ki bandi o tontoni.

⁵⁵ Bi den yadi laa diema lindima kuli, ki taani a yiama leni bi kaadi. Bi den tugi ki kpendinni ba, ban gbadi ke o ye naankani kuli.

⁵⁶ Wan den pundi naankani kuli, a dobila leni i dociami nni, ba ti koadiedi nni, bi den taani a yiama, ki kpendinni ki duandi ba mu daamu nni, ki miadi o ke wan pa ba ban sii ba o liadicuadi bebe. Yaaba n den baa ki sii ti kuli den paagi cain.