Marki 5 - U TIENU MAAMA TILI 2013

Jesu ñani ki cicibiadiga o joa nni

¹ Bi den pundi napo yaa boanjaali, Gerasi diema nni yaaba kani.

² Jesu n den ñani ku ñinbiagu nni yaa yogunu, ki cicibiadiga n ye yaa joa niinni den ñani a takula po, ki tuogi o.

³ O den ye a takula nni. Oba kuli kan den fidi ki go loli o, ba leni i kuseseli.

⁴ Bi den kpa kpaagi o ti kpaadi ki luo o i kuseseli, ke o koa ti kpaadi ki cenli i kuseseli. Niloba ki den pia yaa paalu n baa fidi o.

⁵ Yogunu kuli, u yensiinu leni ku ñiagu kuli, o den ye a takula nni, yaa ka a juana po, ki kuudi ki kan cedi, ki ja oba leni a tana.

⁶ O den laa Jesu foagima, ki sani ki ban gbaani o nintuali,

⁷ ki kpaani ki yedi: «Be n ye mini leni fini siiga, Jesu, U Tienu yua n ye hali tanpolijoma Bijua. Hali U Tienu po, ŋan da faligi nni.»

⁸ O den yedi yeni kelima Jesu den yedi o: «Ki cicibiadiga na, ña o joa na niinni!»

⁹ Jesu buali o: «A yi lede?» O den guani ki yedi o: «N yi “ku Niligu” kelima ti yabi.»

¹⁰ O den miadi Jesu ki naa cedi, ke wan da ñani mu laa tinga nni.

¹¹ Li den sua ke u duokuliciamu ye li juali kani, ki kpaa.

¹² Mu cicibiadimu den mia Jesu ki yedi: «Pa ti u sanu tin kua i duoli na niinni.» Jesu den puni mu mun gedi.

¹³ Lani, mu cicibiadimu den ñani o joa niinni ki ban kua i duoli nni, ke u duokulu den digi mi joayidima po, ki jiidi ki baa mi ñincianma nni. Bi den bua ki pundi duoli tudalie (2 000). Bikuli den mia ki bodi mi ñincianma nni.

¹⁴ Yaaba n den kpaa ba den sani ki ban waani li laabaalo u dogu nni leni li dobila kuli nni. Bi niba den ñani ki gedi ki baa n le yaala n tieni.

¹⁵ Bi den pundi Jesu kani, ki laa yaa joa n den pia mu cicibiadimu boncianla yeni, ke o kaa ki yie ti tiadi, ki go pia o yama. Lani, ti jawaandi cuo ba.

¹⁶ Yaaba n den laa yaala n tieni kuli, den togidi ba yaala n tieni ki cicibiadiga n den die yua leni i duoli kuli.

¹⁷ Lani yaa po, bi den miadi Jesu ke wan ña bi tinga nni.

¹⁸ Jesu n den baa kua ku ñinbiagu nni yaa yogunu, ki cicibiadiga n den die yua yeni den miadi o, ke wan cedi wan yaa yegi leni o.

¹⁹ Jesu ki den tuo o po. O den yedi o: «Kuni a denpo a niba po, ki ban waani ba o Diedo n tieni a po yaala kuli leni wan gbadi a po yaa ninñima.»

²⁰ O den ñani likani ki ban wangi Dekapoli yaa tinbuoli kuli nni, Jesu n den tieni o po yaala kuli. Li den lidi bi niba kuli.

Jesu pia u paalu ki cie u yianu leni mi kuuma

²¹ Jesu den kua ku ñinbiagu nni, ki guani ki duodi ki gedi napo yaa boanjaali. Yaa niligu n yabi den taani o kani, ke o ye mi ñincianma kunu.

²² Li bali maama bangima diena yudanba siiga yendo, ke bi yi o Jayirusi den cua likani ki laa Jesu, ki gbaani o taana kani,

²³ ki mia o boncianla ki yedi o: «Ŋain, n bisalo yia hali ki bua ki kpe. Cua ki ban maani o po a nii, wan paagi ki yaa ye.»

²⁴ Jesu n den yegi leni o ki caa, yaa niligu n yabi den ŋua o ki miabi o.

²⁵ O pua mo den ye likani ke o soama wuliti hali piiga n binalie.

²⁶ O den laa fala boncianla yaa lotola n yabi kani, ki biani wan pia yaala kuli. Ba leni lani kuli, laa den tungi o po, li den biagidi ki go pugide.

²⁷ Wan den gbadi ke bi maadi Jesu maama, o den cua ku niligu siiga ki sii o tiayiekaadi,

²⁸ kelima o den tua o yama nni: «N yaa fidi ki sii ba o tiayiekaadi bebe, n baa paagi.»

²⁹ Lanyogunu o soañakaama den sedi, ke o sua o gbanu nni ke o paagi, ki faabi leni o yianbiadu.

³⁰ Lanyogunu, Jesu moko den bandi o niinni ke u paalu ñani. O den jigidi ku niligu siiga ki yedi: «Ŋme n sii n tiayiekaadi?»

³¹ O ŋoadikaaba den yedi o: «A nua ku niligu n miabi a maama, ke a nan go yedi: ‹Ŋme n sii nni?› »

³² O den diidi ki lindi ki baa le yua n tieni laa bonla.

³³ Ti jawaandi den cuo o pua ke o digibi, kelima o bani yaala n tieni o niinni. O den cua ki gbaani Jesu nintuali, ki waani o i moamoani kuli.

³⁴ Lani, Jesu den yedi o: «N bisalo, a dandanli paagi a. Fii ki kuni leni mi yanduanma, a yianbiadu n gbeni a po.»

³⁵ Jesu n da den maadi yaa yogunu, li bali maama bangima dieli yudaano yeni niba den ñani o denpo ki cua ki tuogi, o ki yedi o: «A bisalo yeni kpe. Be yaa po ke a go coagini canbaa?»

³⁶ Jesu naa den cengi laa maama. O den yedi li bali maama bangima dieli yudaano: «Ŋan da jie liba, daani bebe.»

³⁷ Waa den tuo nitoa n yegi leni o, li yàá tie Pieli leni Jaki leni o waalo Jan.

³⁸ Ban den pundi li bali maama bangima dieli yudaano yeni diegu nni, Jesu den laa yaa niligu n yabi, ke bi tianba buudi ki tangi boncianla.

³⁹ O den kua ki yedi ba: «Be n teni ke yi tiendi ku fuugu ki buudi nanda? Ki biga naa kpe ba, o goa yo.»

⁴⁰ Lani yaa po, bi den ñuadi o. O den ñani bikuli, ki taa ki biga baa leni o naa leni yaa nitaadiba n yegi leni o, ke bi kua ki biga n ye yaa dieli nni.

⁴¹ Jesu den cuo ki biga nuu ki yedi o: «Talita kumi,» lani n tie: «O jafaano, n yedi a, fii.»

⁴² Lanyogunu ki bonpuoga yeni den fii ki cuoni. O den pia piiga n binalie. Li den lidi ba hali boncianla.

⁴³ Jesu den teni ba li ñoamabonli ke ban da teni niloba kuli n bandi la. O go den yedi ban pa ki bonpuoga n je.