Marki 4 - U TIENU MAAMA TILI 2013

I bonbii pagima kpanjama

¹ Jesu go den ye mi ñincianma kunu, ki bangi bi niba. Ku niligu den taani o kani boncianla, hali ke o kua ki kali ku ñinbiagu nni mi ñima nni. Ku niligu kuli den ye li wali po.

² O den pua mi kpanjama ki bangi ba bonla boncianla, ki yedi ba o bangima yogunu:

³ «Cengi mani! O kpakpaalo den ñani ki baa pagi o bonbuoli.

⁴ Wan den pagini, i tiami den baa u sankunu ke ti bonyugiditi den cua ki dini yi.

⁵ I tiami mo den baa ku tancaligu po, mi tama n ki yabi naani. I den pudi tontoni, kelima mi tama ki yabi likani.

⁶ Ama u yienu n den paagi, i den mali ki kuodi, kelima jiinmoani ki den ye.

⁷ I tiami mo den baa ti konkondi nni. Ti konkondi den fii leni yi, ki dini yi, ke yii loni.

⁸ I tiami mo den baa ki tinŋanga nni. Yi den pudi ki kpedi ki pugidi, ki loni. I tiami den loni bonbiyenbu piitaa taa, i tiami piiluoba luoba, i tiami mo kobiga kobiga.»

⁹ Lani, Jesu go den yedi ba: «Yua n pia a tuba ki baa gbadi, wan gbadi.»

Jesu n pua mi kpanjama yaala yaa po

¹⁰ Jesu den foagidi leni ku niligu, yaaba n ŋua o leni bi piiga n niliediba den buali o mi kpanjama yeni bundima.

¹¹ O den yedi ba: «U Tienu puni yinba ke yin bandi yaa moamoani n duagi nitoaba po, lani n tie U Tienu diema n baa yaa tie maama. Ama yaaba n ki tie yi siiga yaaba, n baa pua ba mi kpanjama lani kuli po.

¹² Yeni bi baa yaa nua leni bi nuni, Ki nan da le bi yama nni. Bi baa yaa cengi leni bi tuba, Ki nan kan bandi liba. Lani n tie ke ban da lebidi bi pala, Ki guani U Tienu kani, Ki baa bi tuonbiadi sugili.»

Jesu bundi i bonbii pagima kpanjama

¹³ Jesu go den yedi: «Yii bandi mi naa kpanjama bundima yo? Li yaa tie yeni, yi baa gaa lede ki bandi yaa kpanjama n sieni?

¹⁴ O kpakpaalo n pagini yaala tie U Tienu maama.

¹⁵ Bi nitianba tie nani yaa bonbii n baa u sankunu yeni. Bi yaa gbadi U Tienu maama yaa yogunu, Sutaani n cua ki ñani yaa maama n pagi bi pala nni.

¹⁶ Bi nitianba mo tie nani yaa bonbii n baa ku tancaligu nni yeni. Bi yaa gbadi U Tienu maama yaa yogunu, bi yen gaa ma tontoni leni li pamanli,

¹⁷ ama baa pia jiinmoani bi pala nni. Bi kan juuni ki sedi. Mi yebiadima yaa cua, bi bi niba yaa waani ba fala, kelima U Tienu maama po, tontoni se ban gbali ki baa.

¹⁸ Bi nitianba mo tie nani yaa bonbii n baa ti konkondi nni yeni. Bani mo n tie yaaba n gbadi U Tienu maama,

¹⁹ ama mi yema yanyagidi, ŋalimani boandi leni bonbuakatoala kuli yen taani ki je U Tienu maama yeni, ki teni ke mi kan luoni puu.

²⁰ Bi nitianba mo tie nani yaa bonbii n baa ki tinŋanga nni yeni. Bani n tie yaaba n gbadi U Tienu maama, ki gaa ma ki luoni. Bi nitianba loni bonbiyenbu piitaa taa, bi tianba piiluoba luoba, bi tianba mo kobiga kobiga.»

Ki fidisanga kpanjama

²¹ Jesu go den yedi ba: «Bi baa cuoni ki fidisanga ki taa li sancianli ki ŋoagini ga, bi baa sieni ga u duanu tiipo yo? Naani baa baa tuani ga u fidisantuankaanu po ka?

²² Liba kuli ki ye ki wuo ki kan wuodi. Liba kuli ki ye ki duagi ki kan doagidi.

²³ Yua n pia a tuba ki baa gbadi wan gbadi.»

²⁴ O go den yedi ba: «Fangi mani yi yula leni yin gba yaa maama na. U Tienu baa taa yin biigidi nitoaba po leni yaa bonbiigikaala, ki biigi yimo yaa po, ki pugini yi po moko.

²⁵ Bi baa pa yua n pia wan baa ki pugini, ama yua n ki pia, bi baa gaa o kani ba wan pia yaala.»

Yaa bonbibu n pudi ki kpedi kpanjama

²⁶ Jesu go den yedi: «U Tienu diema tie nani o nilo n pagi o bonbuoli u kuanu nni yeni.

²⁷ Wan guani, bi wan nua, li yensiinu leni li ñiagu kuli, i bonbuoli baa pudi ki go kpedi ke waa bani lan gaa maama.

²⁸ Ki tinga n tuuni la kani kiba. Li yen cili ti kagicandi, ki ŋoadi ti siandi, ki ŋoadi mi bima.

²⁹ Li bonluonkaala yaa beni, lanyogunu o baa kua lienni leni o moaciegu, kelima u jetaagu pundi.»

Mutardi leni li dabinli kpanjama

³⁰ Jesu go den yedi: «Ti baa nandi U Tienu diema leni be? Ti baa pua lipo mi laa kpanjame?

³¹ Li tie nani yaa kpintiigu bonbibu n wa ki yi mutardi bonbibu yeni. Ban buli bu u kuanu nni yaa yogunu, bu wa ki cie ŋanduna bonbii kuli.

³² Ama bu yaa buli, bu yen pudi ki kpedi ki cie ti kpintiidi kuli, ki toa i benciami, hali maama ke ti bonyugiditi baa fidi ki yaa tiendi bi tiana bu soangu nni.»

³³ O den pua kpanjatoama boncianla yaama n naani leni yaama n tie ne, ki wangi bi niba o Laabaaliŋamo nani ban baa fidi ki gaa maama.

³⁴ Waa den maadi leni ba kaa pua mi kpanjama. Ama wani leni o ŋoadikaaba yaa den piadi ki ye bi bebe, o yen bundi bi po mikuli.

Jesu duani ku tafaaciangu

³⁵ Landaali yenjuagu, Jesu den yedi o ŋoadikaaba: «Tin duodi mani napo yaa boanjaali.»

³⁶ Lani, bi den cabi ku niligu ki kua Jesu n kaa yaa ñinbiagu nni, ki baa duoni o. Ñinbiatoadi moko den yegi leni o.

³⁷ Ku faabiadigu den fii, ki figi ki fiindi a ñinguona, ke a baali ku ñinbiagu nni, hali ke ku bua ki gbie.

³⁸ Ama Jesu den dua ki goa ku ñinbiagu juodima, ki kuli o yuli li yukunkuli. Bi den fundi o ki yedi o: «Canbaa, laa yia ŋa leni tin baa bodi?»

³⁹ O den fundi ki maadi leni ku faagu leni li bali ki yedi: «Cedi fuugu!» O go den yedi mi ñincianma: «Suoni!» Ku faagu den cuo ki sedi ke likuli duani salam.

⁴⁰ Lani, Jesu den buali ba: «Be n teni ke yi jie nanda? Yii daani yo?»

⁴¹ Li fangili leni ti jawaandi den cuo ba boncianla, ke bi yedi biyaba: «One wani daa, o tie ŋme ke ba ku faagu leni mi ñincianma kuli tuo ki tiendi wan yedi yaala?»