Marki 2 - U TIENU MAAMA TILI 2013

Jesu paagi yaa joa yaa gbanandi n kpe

¹ Lan den tieni danaba, Jesu den guani Kafarnawum. Bi niba n den gbadi ke o guani deni,

² bi den taani o kani boncianla, hali ke u kaanu ki go den ye ba bu buliñoabu kani. O den wangi ba U Tienu maama.

³ Bi niba den cuani o kani yua yaa gbanandi n kpe, ke nibinaa tugi o.

⁴ Nani ban kan den fidi ki pundi Jesu kani kelima bi niba yabinu po yeni, bi den doni wan ye yaa doangu nni yuli po, ki cibi yaa bonli n yabi, ki jiini o yiamo leni wan dua yaa kaagu kuli.

⁵ Jesu n den laa bi dandanli, o den yedi yua yaa gbanandi n kpe yeni: «N bijua, a baa a tuonbiadi sugili.»

⁶ Li bali maama banda bi tianba den kaa likani ki bungi bi pala nni ki tua:

⁷ «Be n teni ke one maadi nanda? O sugidi U Tienu. U Tienu bebe yaa ka, ŋme n baa fidi ki pa bi niba bi tuonbiadi sugili?»

⁸ Lanyogunu Jesu den bandi o pali nni, ban bungi yaala ki buali ba: «Be n teni ke yi bungi yi pala nni yeni?

⁹ Be n dingi ki cie, ki yedi yua yaa gbanandi n kpe: ‹A baa a tuonbiadi sugili,› bi: ‹Fii ki taa a kaagu ki yaa cuone?›

¹⁰ N bua ki doagidi yi po ke o Joa Bijua pia li bali ŋanduna nni ki baa fidi ki pa bi niba bi tuonbiadi sugili.»

¹¹ Lani, o den yedi yua yaa gbanandi n kpe yeni: «N yedi a, fii ki taa a kaagu ki yaa kuni.»

¹² O den fii ki taa o kaagu lanyogunu, ki ban ña ke bikuli nua. Li den paki bikuli ke bi kpiagidi U Tienu ki tua: «Ti daa bi laa yaa bonla n tie ne buolu.»

Jesu yini Levi ke o ŋoadi o

¹³ Jesu go den ñani ki baali Galile ñincianma. Ku niligu kuli den kpendi o kani ke o bangi ba U Tienu maama.

¹⁴ Wan den suagi liiga, o den laa Alife bijua Levi ke o ka o tuonli kani, ki gaani li lubili. O den yedi o: «Ŋoadi nni.» Levi den fii ki ŋoadi o.

¹⁵ Li yaa puoli, Jesu n den kaa Levi diegu nni ki di leni o, bi lubigaaba leni i tagibiadi danba kuli den cua boncianla ki taani leni o ŋoadikaaba, ki kaa ki di leni Jesu. Laa niba siiga, niba boncianla den ŋoadi Jesu.

¹⁶ Li bali maama banda yaaba n tie Farisieninba n den laa ke Jesu di leni bi lubigaaba leni i tagibiadi danba, bi den yedi o ŋoadikaaba: «Be yaa po ke o di ki go ñu leni bi lubigaaba leni i tagibiadi danba?»

¹⁷ Jesu n den gbadi, o den yedi ba: «Yaaba n pia laafia ka bua lotoli, ama yaaba n yia. Mii cua ki baa yini yaaba n tiegi ka, ama ti tuonbiadi danba.»

Mi ñoalolima maama leni kpanjatoama

¹⁸ Jan ŋoadikaaba leni Farisieninba den luo bu ñoabu. Bi niba den cua Jesu kani ki buali o: «Be yaa po ke Jan ŋoadikaaba leni Farisieninba yaaba yen luo bu ñoabu, ke a yaa ŋoadikaaba wani naa luo?»

¹⁹ Jesu den guani ki yedi ba: «O puocaano calo danlinba baa gaa lede ki loli bu ñoabu, o puocaano calo n da ye leni ba yaa yogunu? Li kan tuo, kelima o puocaano calo da yaa ye leni ba li puocaali nni, bi kan fidi ki loli bu ñoabu.

²⁰ Ama u yogunu kpendi, ke bi niba baa cuo o puocaano calo ki ñani o bi siiga. Lanyogunu, bi baa loli bu ñoabu.

²¹ Niloba mo kan taa cabipanli ki biini li liadikpeli, kelima li cabipanli baa toli ki dadi ki padi li bonkpeli, lan padi ki pugini.

²² Niloba mo kan didi taa o duvenpaano ki piagi ti dayuakpedi nni. O yaa tieni yeni, o duvenpaano baa pudi ki padi ti dayuakpedi, duven baa bia, ti dayuadi mo n biidi. Ama kali ban piagi duvenpaano ti dayuapandi nni.»

O Joa Bijua n die mi fuodima daali

²³ Dayenli, U Tienu fuodima daali, Jesu leni o ŋoadikaaba den tagi ki poandi ŋalikama kuani nni. O ŋoadikaaba den cuoni ki jobidi ŋalikama siandi.

²⁴ Farisieninba den yedi Jesu: «Diidi ki le, be n teni ke bi tiendi yaala n kua mi fuodima daali?»

²⁵ O den guani ki yedi ba: «Naani yii cogi Davidi n den tieni yaala wan den luo li bonjekaala, ke mi koma cuo o, wani leni yaaba n den ye leni o kuli?

²⁶ Li yogunu sua ke Abiatari den tie bi kopadicianba bado, Davidi den kua U Tienu diegu nni, ki ŋmani ban den gagidi yaa dupen U Tienu po, ba ke li kua nitoa n ŋmani dupen yeni, li yàá tie bi kopadicianba yaa ka. Davidi den taa ki ŋmani, ki teni yaaba n yegi leni o moko, ke bi ŋmani.»

²⁷ Lani, Jesu den yedi ba: «U Tienu den bili mi fuodima daali bi niba todima po yo. Waa den tagi bi niba mi fuodima daali po ka.

²⁸ Lanwani, o Joa Bijua n die ba mi fuodima daali.»