Marki 16 - U TIENU MAAMA TILI 2013

Jesu fiima bi tinkpiba siiga leni o doagidima 16 Jesu fii bi tinkpiba siiga

¹ U Tienu fuodima daali n den pendi, Mariyama, Magidala dogu yua, Jaki naa Mariyama leni Salome den daa yaa kpama n pia u nuulumanu ki baa gedi ki ban sogi Jesu o tinkpilo.

² A daleleeda cilima daali ku tiŋaapanpangu bi den gedi li takuli po u yienu pudima yogunu.

³ Bi den maadi leni biyaba ki tua: «Ŋme n baa bindi ti po ku tanpabigu ki pigidi ku li takuli ñoabu?»

⁴ Bi den yaadi ki diidi ki sua ke ku tanpabigu yaagu n den yabi boncianla yeni bindi ki pigidi.

⁵ Bi den kua li takuli nni, ki sua ke o jawaalo kaa jienu po ki laa liadipiencianli. Ti jawaandi den cuo ba.

⁶ O den yedi ba: «Da jie mani, yi lingi Jesu, Nasareti yua, ban den joani yua li dapoanpoanli po. Waa go ye ne, o fii bi tinkpiba siiga. Diidi mani ban den duani o naankani.

⁷ Gedi mani ki ban waani o ŋoadikaaba leni Pieli, ke o kua yi liiga ki ye Galile. Yi baa n le o lanpo nani wan den yedi yi maama.»

⁸ I jeje leni ki yanlidiga den cuo ba ke bi digibi, ki ñani li takuli nni ki sani. Baa den yedi niloba liba, kelima ti jawaandi po. [

Jesu doagidi o yuli Mariyama, Magidala yua po

⁹ Jesu n den fii bi tinkpiba siiga a daleleeda cilima daali tiŋaapanpangu, o den kpa doagidi o yuli Mariyama, Magidala dogu yua po, wan den ñani yua yaa niinni cicibiadimulele.

¹⁰ O pua yeni den gedi ki ban puni Jesu yegininlieba li laabaalo, bani yaaba n den ye leni li paboanli ki buudi.

¹¹ Ban den gbadi ke Jesu go fo, ke o pua yeni laa o, baa den daani o maama.

Jesu go doagidi o yuli ŋoadikaabilie po

¹² Li yaa puoli, Jesu go den doagidi o yuli nani nitoa yeni, o ŋoadikaaba siiga nibilie po, ke bi ye u sanu nni ki caa i kuani po.

¹³ Bi den guani bi lieba kani ki waani ba, ama baa den daani bani moko yaa maama.

Jesu doagidi o yuli o ŋoadikaaba po

¹⁴ Li yaa puoli, Jesu go den doagidi o yuli bi piiga n niyendiba po, ban di yaa yogunu. O den jaligi ba bi dandanluoma leni bi pajuaga kuli po, kelima baa daani yaaba n laa o, ki waani ke o fii bi tinkpiba siiga maama.

¹⁵ Lani, o den yedi ba: «Gedi mani ŋanduna nni kuli, ki ban yaa wangi bi niba kuli o Laabaaliŋamo.

¹⁶ Yua n tuo ki daani ki go gaa mi batisima kuli baa faabi. Ama yua n ki daani, bi baa jia o buudi ki cuo o.

¹⁷ Diidi yaa bancianma n baa yaa ŋua yaaba n daani: N yeli nni, bi baa deli mu cicibiadimu. Bi baa maadi mi malanma.

¹⁸ Ba bi yaa cuo wa, bi ki ñuni ñoagubiadu, bonbiadiliba kuli kan tieni ba. Bi baa yaa maandi bi nii a yiama po, ke bi paagidi.»

Jesu doni tanpoli

¹⁹ O Diedo Jesu n den maadi leni o ŋoadikaaba yeni, o den doni tanpoli, ki ban kali U Tienu jienu.

²⁰ O ŋoadikaaba den gedi ki ban wangi o Laabaaliŋamo i kaani kuli. O Diedo den tuuni leni ba ki saagi o Laabaaliŋamo po i moamoani leni yaa bancianma n tiendi.]