Marki 15 - U TIENU MAAMA TILI 2013

Bi gedini Jesu Pilati bujiali kani

¹ Ku tiŋaapanpangu bi kopadicianba yudanba, a nikpela, li bali maama banda leni bi cancantieba den taani ki juogi. Bi den loli Jesu ki gedini o ki ban teni Pilati.

² Pilati den buali o: «A tie Jufinba bado bi?» Jesu den guani ki yedi o: «Fini n yedi yeni.»

³ Bi kopadicianba yudanba den maadi Pilati ki kuli Jesu boncianla.

⁴ Pilati go den buali o: «A kan guani ki yedi maamiba? Cengi ban maadi ki kuliti a yaala kuli.»

⁵ Ama Jesu ki go den guani maamiba kuli. Li den paki Pilati.

Pilati jia ki kadi ke ban kpa Jesu

⁶ Mi Pendima jaanma kuli, Pilati yen faabi kpaadiyenli ku niligu n mia o wan faabi yua.

⁷ Li den sua ke yaaba n yie li bali danba, ki tieni mi janjanma ki kpa bi niba ye li kpaadidieli nni. Bi siiga nni yendo den yi Barabasi.

⁸ Ku niligu den cua Pilati kani ki mia o ke wan tieni bi po nani wan maani ki tiendi maama.

⁹ O den guani ki yedi ba: «Yi bua min faabi yi po Jufinba bado yeni bi?»

¹⁰ O den bani ke bi kopadicianba yudanba den cuo Jesu ki cuani o li bujiali kani, kelima bi nunponbiadili po.

¹¹ Bi kopadicianba yudanba den tigini ku niligu ke ban mia Pilati, wan faabi bi po Barabasi.

¹² Pilati go den buali ba: «N nan baa tieni yin yi yua Jufinba bado yeni lede?»

¹³ Bi go den tiani ki yedi: «Joani o li dapoanpoanli po!»

¹⁴ Pilati den yedi ba: «Be yaa po? O tieni be ke li bia?» Bi go den tiani ki pugini: «Joani o li dapoanpoanli po!»

¹⁵ Pilati den bua ki mangi ku niligu pali, lani yaa po o den faabi bi po Barabasi. O den teni ke bi pua Jesu i baliji, ki taa o ki teni bi toatieba ban ban joani o li dapoanpoanli po.

Loma yaaba toatieba ñuadi Jesu

¹⁶ Bi toatieba den gedini Jesu ki ban kuani o guveneeri diegu nni, wan ja ti buudi naankani, ki yini bi cagili kuli.

¹⁷ Bi den golini o bu kpalimoanbu, ki taa i konkoni ki piani nani ki badifogiliga yeni, ki cibini o.

¹⁸ Lani, bi den fuondi o ki tua: «Ti fuondi a, fini Jufinba bado.»

¹⁹ Bi den pua o yuli li kankagili, ki siini o po ti ñinsandi, ki gbaandi o nintuali ki pugi o.

²⁰ Ban den ñuadi ñuadi o yeni ki gbeni, bi den goliti bu kpalimoanbu yeni ki guani ki lani o o yaa tiadi, ki ñani o ki caani o ki baa n kpaa ki joani o li dapoanpoanli po.

Bi joani Jesu li dapoanpoanli po

²¹ O joa den ye ke bi yi Simon, ki tie Sireni dogu yua, Alekisandri leni Rufusi baa, den ñani u kuanu po ki kpendi ki kadi leni ba. Bi den tieni o u paalu ke o bugi Jesu dapoanpoanli.

²² Bi den gedini Jesu ban yi yaa kaanu Goligota, lani n bua ki yedi: “ku Yukuokuogu kaanu.”

²³ Bi den bua ki teni o yaa duven n kali leni mili, ama waa den gaa.

²⁴ Bi den joani o li dapoanpoanli po, ki boagidi o tiayiekaadi, ki toani tiatia o tiayiekaadi po, ki baa le yuakuli n baa baa yaala.

²⁵ Ban den joani o li dapoanpoanli po, li den tie u yienu n paagi yaa yogunu.

²⁶ Yaa diani n den waani ban jia o buudi ki kpa o yaala yaa po, den tie ine: “Jufinba bado.”

²⁷ Bi go den joani sanjiabilie a dapoanpoana po, yendo o jienu, oyua mo o ganu. [

²⁸ Yeni, li den tieni nani i Diani n yedi maama: «Bi den nua o ke o taa yenma leni ti tuonbiadi danba.]»

²⁹ Bi santagiba den sugidi o, ki fegini bi yula ki tua: «Hei, fini yua n baa mudi U Tienu diegu, ki go maa gu danataa siiga,

³⁰ gaa a yuli, ki jiidi li dapoanpoanli po.»

³¹ Bi kopadicianba yudanba leni li bali maama banda moko den ñuadi o yeni bi siiga, ki tua: «O den gaa nitoaba, ki nan kan ji fidi ki gaa o yuli.»

³² Bi go den tua: «U Tienu n Gandi Yua, wani Isidayeli bado, n jiidi li dapoanpoanli po moala ne, ke tin le ki daani o.» Ban den taani ki joani wani leni yaaba a dapoanpoana po moko den sugidi o.

Jesu kuuma

³³ Lan den pundi u yensiicocolu, li biigili den tieni ki tinga nni kuli, ki yaa caa hali li yenlebidili.

³⁴ Lanyogunu Jesu den tiani boncianla: «Eloyi, Eloyi, lama sabakitani.» Lani n tie: «N Tienu, n Tienu, be yaa po ke a ŋaa nni?»

³⁵ Yaa niba n den ye likani, bi tianba n den gbadi, bi den yedi: «Diidi, o yi o saawalipualo Eli.»

³⁶ Bi siiga nni yendo den sani ki pagini u tuogu mi ñinmiligima nni, ki fini li kankagili ki yugidi ki teni o ke wan ño. O nilo yeni den yedi o lieba: «Cedi mani tin le Eli yaa baa cua ki jiini o.»

³⁷ Jesu den tiani ke li pa, ki fuo, ki jiidi.

³⁸ U Tienu diegu kpalidoaginkaabu den padi siiga nni, ki cili tanpoli ki ban jiidi hali tinga nni, ki boagidi kaanilie.

³⁹ Minteela kobiga yudaano, yua n den se ki tiegi Jesu, n den laa ke o kpe yeni, o den yedi: «Moamoani, o joa na den li tie U Tienu Bijua yo.»

⁴⁰ Bi puoba moko den se foagima ki diidi. Li den pia bi siiga Mariyama, Magidala dogu yua leni Mariyama yua n tie Jaki, o jawaalo leni Jose naa leni Salome.

⁴¹ Jesu n den ye Galile, bi puoba yeni den ŋua o ki todi o o yema po. Puotoaba yaaba n yabi moko den ye likani. Bi den ciani Jesu ki cua Jerusalemi.

Jesu piinma

⁴² Landaali den tie li boginli daali, lani n tie Jufinba n yen bogini yaala kuli mi fuodima daali po. Lani yaa po, ku yenjuagu,

⁴³ Alimate dogu yua Josefi, yua n tie bi cancantieba siiga yendo, ki pia ti kpiagidi, ki moko guu ke U Tienu diema yogunu n pundi, den paagi o pali ki gedi Pilati po, ki ban mia wan teni o Jesu o tinkpilo.

⁴⁴ Li den lidini Pilati leni Jesu n kpe maama tontoni. O den yini minteela kobiga yudaano ki buali o o yaa kpe ke li waagi?

⁴⁵ Minteela kobiga yudaano n den waani o lan tie maama, o den tuo ke Josefi taa o tinkpilo.

⁴⁶ Josefi den daa bu kpalipienbu ki gedi ki ban jiini o tinkpilo li dapoanpoanli po, ki bobini o bu kpalipienbu yeni, ki ban duani o li takuli nni, ban kpiedi yaali ku tangu nni. O den bindi ku tanpabigu ki biini li takuli ñoabu.

⁴⁷ Mariyama, Magidala dogu yua leni Jose naa Mariyama den diidi ban duani Jesu o tinkpilo naankani.