Marki 14 - U TIENU MAAMA TILI 2013

Jufinba nikpiaga juogi ke bi baa kpa Jesu

¹ Mi Pendima jaanma leni yaa dupen n ki pia dabinli jaanma n den sieni danalie, bi kopadicianba yudanba leni li bali maama banda den moandi ban baa tieni maama ki cuo Jesu leni bu nunfanbu ki kpa o.

² Bi den tua: «Lan da tieni mi jaanma dana nni, ke ku fuugu n da ti fii bi niba siiga.»

O pua wuli tulale Jesu yuli po

³ Jesu den ye Betani o gbaado Simon deni. Wan den kaa ki di, o pua den cua ki kubi yaa tiagu n tie alibati tanli, ke ku gbie leni yaa tulale n yi naari, ke o dunga yabi hali boncianla. O den jobidi ku tiagu yeni ki wuli laa tulale Jesu yuli po.

⁴ Yaaba n den ye likani siiga bi nitianba den maadi leni biyaba leni li pabienli ki yedi: «Be yaa po ke o biani yaa tulale n tie ne?

⁵ Bi bi baa fidi ki kuadi o yaa ligi n cie kujapiena kobitaa, ki taa yi ki pa a luoda.» Bi pala den fii o pua yeni po.

⁶ Jesu den yedi ba: «Cedi mani o! Be po ke yi yagini o yama? Wan tieni n po yaala na ŋani.

⁷ A luoda baa yaa ye leni yi yogunu kuli, yi yaa bua yaa yogunu kuli yi baa fidi ki ŋanbi bi po, ama mini wani kan yaa ye leni yi yogunu kuli.

⁸ O pua na tieni n po wan paani maama. Wan wuli n po tulale yeni, o tuodi ki bogini n gbanandi mi piinma po yo.

⁹ N waani yi i moamoani, ban baa waani o Laabaaliŋamo ŋanduna nni naankani kuli, bi baa tiadi ki togidi o pua na n tieni yaala.»

Judasi tuo ke o baa janbi Jesu

¹⁰ Bi piiga n niliediba siiga yendo ke bi yi o Judasi Isikarioti den gedi bi kopadicianba yudanba po, ki bua ki janbi Jesu ki teni ban cuo o.

¹¹ Ban den gbadi o maama, bi pala den mangi, ke bi niani o ke bi baa suu o i ligi. Juda den cili ki lingi wan baa baa yaa folu ki janbi Jesu ki teni ba.

Jesu dini mi Pendima jaanjiema leni o ŋoadikaaba

¹² Yaa dupen n ki pia dabinli jaanma cilidaali, ban yen kodi mi Pendima jaanma pebiga yaa daali yeni, Jesu ŋoadikaaba den buali o: «A bua tin gedi lepo ki ban ŋanbi mi Pendima jaanjiema ŋan je?»

¹³ O den soani o ŋoadikaaba siiga nibilie, ki yedi ba: «Kua mani u dogu nni, yi baa tuogi o joa ke o bugi li ñincuali, yin ŋoadi mani o.

¹⁴ Wan baa n kua naankani, yin yedi likani diedaano: ‹Canbaa yedi: Mini leni n ŋoadikaaba n baa je mi Pendima jaanjiema yaa candieli nni ye le?›

¹⁵ O baa waani yi li dietuadili yaali n yabi ki ŋanbi, ke yaala n dagidi kuli ye lienni. Yin ŋanbi mani ti po lankani.»

¹⁶ O ŋoadikaaba den fii ki kua u dogu nni, ki ban sua ke li bonla kuli tie nani wan waani ba maama. Bi den ŋanbi mi Pendima jaanjiema.

¹⁷ Ku juogu n den baa, Jesu leni bi piiga n niliediba den cua likani.

¹⁸ Ban den kaa u saajekaanu kani ki di yaa yogunu, Jesu den yedi ba: «N waani yi i moamoani, yi siiga yendo yua n di leni nni, baa janbi nni, ki teni ban cuo nni.»

¹⁹ Bi ŋoadikaaba pala den cili ki biidi, ke yendo yendo kuli yedi o: «Li tie mini yo?»

²⁰ O den yedi ba: «Li tie yinba bi piiga n niliediba siiga yendo, yua n taagi ki tungi leni nni ku saatiagu nni.

²¹ O Joa Bijua caa nani lan diani ki bili o po maama. Ama fala baa yaa ye leni yaa nilo n baa janbi o Joa Bijua. Li den baa yaa tu laa joa po, bi yàá den mali o.»

O Diedo jiema

²² Ban den di yaa yogunu, Jesu den taa dupen, ki tuondi ki cabidi ki teni ba, ki yedi: «Gaa mani, line tie n gbanandi.»

²³ O go den taa ki tadiñokaaga ki den tuondi U Tienu, ki teni ba ke bikuli ñuni.

²⁴ O den yedi ba: «Yaa bonñokaala n tie ne tie n soama, yaama n teni ke U Tienu o ŋantaado soama, yaama n baa wuli bi niba boncianla po.

²⁵ N waani yi i moamoani, n kan go ño duven, hali min go baa ti ño o bonpaano U Tienu diema nni yaa daali.»

Pieli baa ti nia ke waa bani Jesu

²⁶ Ban den yini Pisominba, bi den ñani ki gedi Olivie Tiidi juali po.

²⁷ Jesu den yedi ba: «Yikuli baa ŋaa nni, kelima li diani: ‹N baa pua o yankpaalo, i pe mo n yadi.›

²⁸ Ama n yaa ti fii bi tinkpiba siiga, n baa gaa yi liiga ki gedi Galile.»

²⁹ Pieli den yedi o: «Yaaba n sieni kuli yaa pala yaa baa biidi ban ŋaa ŋa, mini wani, n kan ŋaa ŋa.»

³⁰ Jesu den yedi o: «N waani a i moamoani, dinla ñiagu na liga, hali ke ku kootongu daa mua milie, a baa nia taalimitaa ke ŋaa bani nni.»

³¹ Ama Pieli den nia hali boncianla ki yedi: «Ba li yaa tie tiladi min kpe leni a, n kan nia ke mii bani a.» Bikuli den yedi yeni.

Jesu jaandi Jetisemani salidinga nni

³² Jesu leni o ŋoadikaaba den gedi yaa kaanu n yi Jetisemani nni. O den yedi ba: «Kali mani ne, hali min baa jaandi.»

³³ O den taa Pieli, Jaki leni Jan ke bi yegi leni o. I jeje leni li paboanli den cili ki cuo o.

³⁴ O den yedi ba: «Li paboanli cuo nni hali ke li nani n baa kpe yeni. Sedi mani ne ki yaa guu!»

³⁵ Lani, o den suagi liiga waamu ki baa ki labini, ki jaandi ke li yaa baa tuo, yaa yogunu n kpendi na n lagidi ki ŋaa o.

³⁶ O den tua: «N Baa, n Baa, a fidi li bonla kuli, ŋan ñani n kani yaa tadiñokaaga n tie ne, min da ño. Die lan da tua mini ka n bua yaala, ama fine n bua yaala.»

³⁷ O den guani o ŋoadikaaba kani ki sua ke bi goa, ke o yedi Pieli: «Simon, a goa yo? Ŋaa fidi ki guudi baa waamu?

³⁸ Yaa guu mani ki jaandi ke yin da ti kua mi tulinma nni. Li pali bua, ama ti gbanandi nan tadi.»

³⁹ O go den piadi, ki go jaandi nani mi kpiama yeni.

⁴⁰ O go den guani bi kani ki sua ke bi goa, kelima mi guama den gbadi ba. Baa den bani ban baa guani ki yedi o yaala.

⁴¹ O go den guani mi taataama, ki yedi ba: «Yi baa ki goa ki fuo yo? Li dagidi! U yogunu pundi. Bi janbi o Joa Bijua, ki baa teni o ti tuonbiadi danba.

⁴² Fii mani tin gedi. Diidi mani, yua n baa janbi nni n kpendi ne.»

Bi cuo Jesu

⁴³ Jesu n da den maadi yaa yogunu, Judasi, yua n tie bi piiga n niliediba siiga yendo, den pundi o kani. Bi kopadicianba yudanba, li bali maama banda leni Jufinba nikpela, n den soani yaa niligu, ke bi kubi mu jugisiemu leni i gbiami den yegi leni o.

⁴⁴ Wani o jajanbido yeni den tuodi ki waani ku niligu yaa maalima n tie ne: «Min baa gobini yua yeni, wani n yeni, yin cuo o mani ki gedini o wan da cia.»

⁴⁵ Wani Juda n pundi likani, lanyogunu liga, o den nagini Jesu kani ki yedi o: «Canbaa,» ki gobini o.

⁴⁶ Lani, bi niba yeni den bibi Jesu ki cuo o.

⁴⁷ Yaaba n den ye likani siiga yendo den noadi o jugisiega, ki pedi ki joandi bi kopadicianba bado naacemo tubili.

⁴⁸ Jesu den yedi ku niligu: «Yi cua ki kubi mu jugisiemu leni i gbiami nani yi lingi o sanjialo yeni, ki baa cuo nni.

⁴⁹ N den ye leni yi U Tienu diegu nni daali kuli, ki bangi yi U Tienu maama, ama yii den cuo nni. Li tua yeni ke yaala n diani i Diani nni n tieni ki dudi.»

⁵⁰ Lani, bi ŋoadikaaba kuli den ŋaa o ki sani.

⁵¹ O jawaalo den ŋua Jesu ki goli bu kpalibu bebe. Ban den cuo o,

⁵² o den ŋmadi ki ŋaa o kpalibu yeni, ki sani mubima.

Jesu sedi bi cancantieba nintuali

⁵³ Bi den gedini Jesu bi kopadicianba bado kani. Bi kopadicianba yudanba, a nikpela leni li bali maama banda den taani likani.

⁵⁴ Pieli den ŋua Jesu foagima hali ki ban pundi bi kopadicianba bado luolu nni. O den kaa leni bi naacenba ki yie u mu.

⁵⁵ Bi kopadicianba yudanba leni Jufinba cancantieba taancianli kuli den lingi yaa siedi n baa pa ba u sanu ban teni ban kpa Jesu. Ama baa den baa.

⁵⁶ Bi niba boncianla den tieni Jesu po mi siedifaama, ama bi siedi yeni ki den taa yenma.

⁵⁷ Bi tianba den fii ki sedi ki tieni o po yaa siedifaama n tie ne, ki yedi:

⁵⁸ «Ti den gbadi ke o yedi: ‹N baa mudi U Tienu diegu na, o nisaalo nuu n maa yaagu, ki go maa toagu danataa siiga, nisaalo nuu n kaa maa yaagu.› »

⁵⁹ Ba laa maama po, bi siedi naa den taa yenma.

⁶⁰ Lani, bi kopadicianba bado den fii ki sedi bikuli siiga ki buali Jesu: «A kan guani maamiba kuli? Yaa niba n ye ne tiendi a po be siedo?»

⁶¹ Jesu den ŋmini suo, waa guani liba kuli. Bi kopadicianba bado go den buali o: «A tie U Tienu n Gandi Yua, U Tienu yua n pia ti kpiagidi yaa Bijua bi?»

⁶² Jesu den yedi o: «N tie wani. Yi baa ti le ke o Joa Bijua kaa U Paaciamu Daano jienu po, ki go le ke o ñani tanpoli ki kpendi ti tawadi nni.»

⁶³ Lani, bi kopadicianba bado den cuo wani o ba yaa tiayiekaadi ki padi ki yedi: «Ti go bua siedinba ki tieni be?

⁶⁴ Yi gbadi ke o sugi U Tienu. Yi jagi be?» Bikuli den taani ki yedi ke li pundi wan kpe.

⁶⁵ Lani, bi tianba den cili ki siini o po ti ñinsandi, ki pini o nunga li cabili ki kudi o a nukula ki tua o: «Ŋme pua ŋa? Bandi o!» Bi naacenba den taa o ki pabini o i tanpabi.

Pieli nia ke waa bani Jesu

⁶⁶ Pieli den ye tiipo bi kopadicianba bado luolu nni, ke yaa jafanba n tuuni ku diegu yeni niinni siiga yendo den cua likani.

⁶⁷ Wan den laa Pieli ke o yie u mu, o den noanli o ki yedi o: «Amoko den ye leni Jesu, Nasareti yua.»

⁶⁸ Pieli den nia ki yedi: «Mii bani ŋan bua ki yedi yaala.» Lani, o den ñani u luolu nni ki tagi ki caa bu buliñoajabu po ke ku kootongu mua.

⁶⁹ O jafaano yeni den laa o ki go yedi yaaba n se likani: «One moko tie bi jaba yeni siiga yua de.» Pieli go den nia.

⁷⁰ Lan yeni waamu, yaaba n ye likani den yedi Pieli: «Moamoani lige, amoko tie laa niba siiga yua, kelima a tie Galile yua yo.»

⁷¹ Lanwani, Pieli den cili ki solini o yuli ki go polini ki tua: «Mii bani yin maadi yaa joa yeni maama.»

⁷² Lanyogunu, ku kootongu go den mua miliema, ke Pieli ji tiadi Jesu n bi maadi o yaama: «Hali ke ku kootongu daa mua miliema, a baa nia taalimitaa ke ŋaa bani nni.» Lani, o den ñani ki ban buudi.