Marki 13 - U TIENU MAAMA TILI 2013

Jesu pua saawali ke bi baa bolini U Tienu diegu

¹ Jesu n den ña U Tienu diegu nni yaa yogunu, o ŋoadikaaba siiga yendo den yedi o: «Canbaa, diidi ban taa yaa tanŋama ki maa yaa diecianŋama!»

² Jesu den yedi o: «A laa a naa dieciama? Bi kan ti ŋaa ba tanyenli n sieni, ki yaa maa li lieli po. Akuli baa padi ki baa.»

Yaa fala n baa ti cua mi juodima yogunu

³ Jesu den kali Olivie Tiidi juali po ki tiegi U Tienu diegu. Pieli, Jaki, Jan leni Andre bebe n den ye leni o. Bi den buali o yaa buali n tie ne:

⁴ «Waani ti laa bonla n baa ti cua yaa yogunu leni yaa sinankeene n baa ti waani ti, ke laa bonla kuli juodima yogunu pundi.»

⁵ Lani, Jesu den yedi ba: «Fangi mani yi yula ke niloba n da boandi yi!

⁶ Bi niba boncianla baa ti cua n yeli nni ki yedi: ‹Mini n tie U Tienu n Gandi Yua,› ki boandi bi niba boncianla.

⁷ Yi yaa ti gbadi ke bi maadi bu toabu maama, ki go maadi bu toabu laabaalo maama, yin da yagi mani yi yama. Laa bonla baa cua tiladi, ama li da kan tua mi juodima.

⁸ U nibuolu baa fii ki tuogi leni nibuoto, mi diema mo baa fii ki tuogi leni dietoama. Mi tindigibima baa yaa tiendi i kaantiami, mi koncianma mo baa yaa tiendi. Laa bonla kuli da tie nani u maditugukoanu cilima yene.

⁹ Faami mani yi yula po! Bi baa cuo ki gedini yi bi bujiaba kani, ki pua yi i gbiami li bali maama bangima diena nni. Yi baa sedi guveneerinba leni bi badicianba nintuali, kelima n yaa po, ki tua bi po siedi.

¹⁰ Ama hali ke mi juodima daa cua, li tie tiladi o Laabaaliŋamo n kpa pundi i nibuoli kuli nni.

¹¹ Bi yaa ti cuo ki gedini yi li bujiali kani yaa yogunu, yin da tuodi ki yagi yi yama yin baa yedi yaala po. Yin maadi yaama n baa kua yi pala nni lanyogunu, kelima laa tie yinba ka baa maadi, ama U Tienu Fuoma Yua n baa maadi.

¹² Kpelo leni waalo siiga, bi tianba baa cuo biyaba ki teni ban kpa ba. Bibaanba baa cuo bi bila ki teni ban kpa ba. A bila mo baa fii ki sedi bi danba po, ki cuo ba ki teni ban kpa ba.

¹³ Bi niba kuli baa nandi yi kelima n yeli po, ama yua n baa juuni hali mi juodima baa faabi.

Ti caginbiaditi

¹⁴ Yi yaa ti laa ke yaa cagindi n wudi bi niba gbani ye tin ki bi pundi ki yaa ye naani, yua n cogi mi naa maama n kpaagi bonŋanla. Lanyogunu, yaaba n baa yaa ye Jude nni n sani ki gedi a juana po.

¹⁵ Yua n kaa o doangu yuli po n da jiidi ki kua deeni ki baa taa liba.

¹⁶ Yua n ye u kuanu po mo n da lebidi ki guani o denpo ki baa n taa o tiayiekaadi.

¹⁷ Fala baa yaa ye leni yaa puoba n punbi leni yaaba n da ŋaandi laa dana nni.

¹⁸ Mia mani U Tienu ke laa nuama n da tua ku fawaagu yogunu.

¹⁹ Laa dana nni, fala baa ye hali maama ke li buolu daa tieni, ki cili U Tienu n den tagi ŋanduna yaa yogunu, ki pundi hali moala. O buolu kan go tieni mo.

²⁰ O Diedo yàá bi wadi laa dana, nisaaloba kuli kan bi ciadi, ama wan gandi yaaba yaa po, o wadi laa dana.

²¹ Lanyogunu, nilo yaa yedi yi: ‹Diidi, U Tienu n Gandi Yua n ye ne,› yaa ka: ‹O ye napo,› yin da daani o maama.

²² Yaa tuonanda n yedi ke bi tie U Tienu n gandi yaaba leni bi saawalipua-faadanba baa fii ki yaa tiendi sinankeeninba leni li bonlidinkaala, hali ke bi yaa bi baa fidi, bi bi baa boandi U Tienu n gandi yaaba.

²³ Yin fangi mani yi yula, n tuodi ki waani yi likuli.

O Joa Bijua cuama

²⁴ Laa dana nni, fala yeni yaa pendi, u yienu baa biigi, o ŋmaalo mo kan go yendi.

²⁵ A ŋmabila baa yaa ña tanpoli ki baali, tanpoli paaciami mo baa digibi.

²⁶ Lani, bi baa le ke o Joa Bijua ye ti tawadi nni, ki kpendi leni u paalu leni ti kpiagiciandi.

²⁷ Lani, o baa soani o malekinba ŋanduna nni kuli, ban taani wan gandi yaaba, ki cili ŋanduna bianu poyendu, ki yaa caa hali u naa bianu.

Bu kankanbu kpanjama

²⁸ Yin bandi bu kankanbu kpanjama n bangi yaala. Bu beni yaa bundi, yi bani ke ku siagu nagidi.

²⁹ Li go tie yene, yi yaa ti laa ke laa bonla tiendi, yin bandi ke o Joa Bijua nagini ki ye bu buliñoabu kani.

³⁰ N waani yi i moamoani, ke mi naa nifiima kuli kan pendi ke laa bonla kuli ki tieni.

³¹ Tanpoli leni ki tinga kuli baa pendi, ama n maama kan pendi abada.

U Tienu bebe n bani o Joa Bijua cuama yogunu

³² Yaala n tie o Joa Bijua cuama daali po, oba kuli ki bani laa bonla yogunu, ba tanpoli malekinba ki bani, ba Bijua, se Baa bebe.

³³ Yaa fangi mani yi yula ki yaa guu, [ki go jaandi ki miadi U Tienu] kelima yii bani li yogunu.

³⁴ Li baa yaa tie nani o joa n baa yaa caa u dogu, ki ŋaa o diegu, ki guuni o naacenba o piama, ki puogi yuakuli o tuonli, ki go puogi o buliñoaguudo wan yaa guu bonŋanla yeni.

³⁵ Lani yaa po, yimo n yaa guu mani, kelima yii bani o diedaano n baa kpeni yaa yogunu, ku yenjuagu, bi ku yoagisiigu, bi i kootonmoe, bi ku tiŋaagu.

³⁶ Yeni yaa po, yimo n yaa guu mani ke wan da ti kpeni ki ludi yi, ki sua ke yi goa.

³⁷ Min yedi yi yaa maama yeni, n go yedi ma bi niba kuli: Yaa guu mani!»