Marki 12 - U TIENU MAAMA TILI 2013

Bi koaguudiba kpanjama

¹ Li yaa puoli, Jesu go den maadi leni ba, ki pua mi kpanjama. O den yedi: «O joa den ŋuu duven tiidi kuanu, ki kpaa li nagili ki lindi, ki gbiidi ku buogu ban baa yaa ŋanbidi duven naankani, ki go paani li janli i duventiidi siiga. Lani, o den guuni o kuanu bi koaguudiba, ki fii ki gedi u dogu.

² U jetaagu yogunu n den pundi, o den soani naacenyendo bi koaguudiba yeni kani, ke wan ban gaa bi kani o yaa biinu o kuanu bonbaakaala nni.

³ Bi den cuo o ki pua o leni i gbiami, ki yaadi o nukuomu.

⁴ O go den soani naacentoa bi kani. Bi den pua o yuli ki go fiagi o.

⁵ O go den soani toa bi kani ke bi kpani o. O go den soani toaba ke bi pua bine, ki kpani bine.

⁶ O koadaano bibuadiga bebe n ji den sieni. O den juodi ki soani o bi kani ki yedi: ‹Bi baa fangi n bijua wani.›

⁷ Ama bi koaguudiba den yedi biyaba: ‹One n tie o faajielo, cedi tin kpa o mani, o faali baa tua ti yaa yaali.›

⁸ Lani, bi den cuo o, ki kpa o ki luni o u kuanu puoli.»

⁹ Lani, Jesu den buali: «O koadaano baa tieni lede? O baa guani ki cua ki bolini bi koaguudiba, ki teni o kuanu nitoaba.

¹⁰ Naani yii cogi i Diani nni yaa maama n tie ne? Bi tanmaaba n den yie ki luni yaa tanli, Tua li tanpuukaali.

¹¹ Likuli den ñani o Diedo kani, Ki tie bonlidinkaala ti nuni po.»

¹² Jufinba nikpiaga den bandi ke Jesu pua mi kpanjama yeni ki maadi leni bane. Bi den moandi ki baa cuo o, ama bi den jie ku niligu, ki fii o kani ki ban caa.

Loma badiciamo Sesari lubili

¹³ Lani n pendi, bi den soani Jesu kani Farisieninba bi tianba leni o bado Herodi buakaaba, ke ban dia o ku madiagu ki cuo o o maama nni.

¹⁴ Bi den cua ki yedi o: «Canbaa, ti bani ke a tie moamoandaano, ŋaa jie oba kuli, ŋaa gagidi oba kelima bi niba n nua ke o tie maama po, a bangi bi niba U Tienu sanŋoadima leni i moamoani mo. Naani li pia u sanu tin pa Loma badiciamo Sesari li lubili, bi laa pia? Tin pa, bi tin da pa yo?»

¹⁵ Jesu yua n den bani ke baa maadi leni bi pala kuli, den buali ba: «Be yaa po ke yi dia nni ku madiagu ki bua ki cuo nni? Cuani mani li kujapienli na min le!»

¹⁶ Bi den teni o li ke o yedi ba: «Ŋme yaa nannanli leni ŋme yaa diani nne?» Bi den guani ki yedi o: «Sesari yaali yo.»

¹⁷ Jesu den yedi ba: «Pa mani Sesari, yaala n tie Sesari yaala, ki pa U Tienu mo, yaala n tie U Tienu yaala.» O maguankaama yeni den paki ba boncianla.

Sadusieninba buali, bi tinkpiba fiima po

¹⁸ Sadusieninba yaaba n tua ke bi tinkpiba fiima ki ye, bi siiga tianba den cua Jesu kani ki buali o, ki yedi:

¹⁹ «Canbaa, Musa den diani ki bili ti po li bali maama nni, ki yedi ke o nilo kpelo yaa kpe ki ŋaa o pua kaa pia biga, wan taa o kpelo yeni pua ki baa o kpelo po u buolu.

²⁰ Jabilele den ye ki taa baayendo, ke o kpelo taa o pua ki kpe, kaa ŋa biga.

²¹ O lielo moko den taa o ki kpe, kaa ŋa biga. Li den tua yeni leni o taalo moko.

²² Bani jabilele yeni kuli den taa o, ama oba ki den ŋaa buolu. O pua mo den ti yuandi ki kpe.

²³ Bi tinkpiba fiima yogunu, bani jabilele yeni siiga, o pua baa yaa tie ŋme yaa yua? Bani jabilele yeni, yendo yendo kuli den taa o ke o tua o pua.»

²⁴ Jesu den guani ki yedi ba: «Yin kaa bani i Diani n yedi yaala, kaa go bani U Tienu paalu yeni, lani n teni ke yi ye mi tudima nni.

²⁵ Yaaba n kpe yaa guani ki fii yaa yogunu, bi jaba kan go taa puoba, bi puoba mo kan go kuni jaba. Ama bi baa yaa tie nani malekinba yeni tanpoli po.

²⁶ Yaala n tie bi tinkpiba fiima po, naani yii cogi Musa n den diani yaa tili nni, U Tienu n den yedi yaala, yaa fatuugu n co kani: N tie Abalahama, Isaaka leni Jakob Tienu.

²⁷ U Tienu naa tie tinkpila Tienu ka, o tie yaaba n fo Tienu yo. Yi tudi boncianla.»

Li bali maama mayuli

²⁸ Li bali maama banda siiga yendo den gbadi ban nia yaala, ki bandi ke Jesu guani Sadusieninba yaa maama n dagidi. Lani, o den nagini Jesu kani ki buali o: «Li bali maama nni kuli, mile n tie li mayuli?»

²⁹ Jesu den guani ki yedi o: «Li mayuli tie mine: Isidayeli buolu, cengi mani, o Diedo ti Tienu, wani bebe n tie o Diedo.

³⁰ Ŋan bua o Diedo a Tienu leni a pali kuli leni a miali kuli leni a yantiali kuli leni a fidu kuli.

³¹ Yaala n ŋua mo tie: Ŋan bua a lielo mo nani ŋan bua a yuli maama yeni. Li bali maama nni kuli, mayutoali ki go ye ki cie mine.»

³² Li bali maama bando den yedi o: «Canbaa, yeni a maadi moamoani ke U Tienu tie yendo, ke toa ki ye, kali wani.

³³ O nilo yaa bua wani leni o pali kuli leni o yantiali kuli leni o miali kuli leni o fidu kuli, ki go bua o lielo nani wan bua o yuli maama yeni, lani n cie ban padi a padijuukaana leni yaa padibuoli n sieni kuli.»

³⁴ Jesu n den sua ke o bando yeni guani o leni mi yanfuoma, o den yedi o: «Ŋaa foagi leni U Tienu diema.» Lanyogunu liiga, baa go den pia papaali ki buali o bualiba kuli.

Kilisiti n tie yua

³⁵ Jesu n go den bangi bi niba U Tienu diegu nni, o den buali: «Li gaa lede ke li bali maama banda tua ke U Tienu n Gandi Yua, tie Davidi bijua?

³⁶ U Tienu Fuoma Yua den teni ke Davidi oba kadi ki yedi: ‹O Diedo den yedi n Diedo: Kali n jienu po, Hali min baa guli a yibalinba, Ŋan ŋmaa ba.›

³⁷ Davidi oba yini o, o Diedo, li nan go gaa lede ke o tie wani Davidi bijua?» Yaa niligu n yabi den cengi Jesu maama leni li pamanli.

Jesu jaligi li bali maama banda

³⁸ Wan den bangi ba yaa yogunu, o den yedi: «Fangi mani yi yula leni li bali maama banda, yaaba n bua ki yaa goadi leni a liadiciama, ki go bua bi niba n yaa fuondi ki kpiagidi ba mu daamu nni.

³⁹ Bi go bua ki yaa kaa i nician-kalikaani li bali maama bangima diena nni, ki go bua yaa kaani n gagidi mi jecianma kani.

⁴⁰ Ama bi nan janbidi a kpepuona ki fenli bi diena, ki jaandi i jaandifoagi ki kpali ke bi tie jajaandimoana. Bi yaa buudi cuonu baa yaa bia ki cie.»

O kpepuoluodo paabu

⁴¹ Jesu den kaa U Tienu diegu nni ki tiegi ku ligitiagu, ki diidi ku niligu n kpiendi i ligi maama. A piada boncianla den kpiendi i ligi ke li yabi.

⁴² O kpepuoluodo mo den cua ki kpieni falinolie.

⁴³ Jesu den yini o ŋoadikaaba ki yedi ba: «N waani yi i moamoani, o kpepuoluodo na puni ki cie yaaba n kpieni i ligi ku ligitiagu nni kuli,

⁴⁴ kelima bikuli ñani bi ŋalimano nni bi ligijode ki kpieni. Ama o kpepuoluodo ne wani, ba leni o luoma kuli, o ñani wan pia yaala kuli, yaala n tie o miali yema piama kuli, ki kpieni.»